5
Consejo para cain chojni que ditticaon Jesucristo
1 Jai janha rrochjaha consejo nittetonha nganji ra ngain ningoa ra. Ixin cai janha chonda joachaxin inchin jehe na, co janha vicon cain tti anto tangui que conhe Jesucristo, co janha cai tsosayana inchin jehe na are Jesucristo tsí iná. 2 Nttatsanha ñao ra que inchin cuidado que dicao tti ttingaria coleco, jamé ttjiho ra cuidado de ixin chojní Dios, tti chojni que jaha ra chonda ra responsable de sinchecoenhe ra na de ixin Dios. Nchecoenhe ra na conixin ansean ra jian, inchin rinao Dios co jeha ixin afuerza chonda ra que sinchecoenhe ra na, ni jeha ixin rinao ra sacha ra tomi. Nchehe ra ẍa jihi pero conixin ansean ra jian, 3 jeha inchin xinajni sintte ra para ngain chojni que sinchecoenhe ra, sino nchehe ra jian cain nchanho para jamé sicon jehe na ná ejemplo. 4 Jamé sinchehe ra para que are tsí Jesucristo, jaha ra sayehe ra ná premio anto jian, que ẍonhi tiempo ndatsjexin.
5 Jamé jaha ra cai, ẍo ẍa tsjeha nano chonda ra, ditticaon ra tti ttetonha dac̈hichjan que chonda tsje nano. Cainxin ra chonda ra que sitticaon chó ra naná ra conixin jian ansean ra. Ixin ndac̈ho ngain tti jitaxin Palabré Dios:
Dios toñao ngain chojni orgulloso,
pero jehe ttjenguijna tti chojni que ẍaxaonha ixin jehe chojni anto jian.
6 Mexinxin dintteha ra orgulloso ngattoxon con Dios para que jehe sinttasayaha ra are jehe sinchejuzguehe ngoi mundo jihi. 7 Ndache ra Dios cainxin joachjaon que jaha ra chonda ra ixin jehe cain tiempo jinda ra.
8 ẍaxaon ra jian cainxin tiempo co dintte ra listo ixin inchínji tti ningaconha ra rridehe ẍá ná coleón que anto jitoñao co rrittjé va chojni para nasoenxon va. 9 Jaha ra sinttaẍaonha ra inchínji, sino que dintte ra jian ngain tti jaha ra ditticaon ra ixin noa na que cainxin chojni que ditticaon Jesucristo ngoixin mundo tedetan na tangui inchin jaha ra. 10 Pero después que jaha ra setan ra tangui nchion tiempo, Dios sinttachjian jaha ra chojni jian que rrochondaha ni ná cosa jianha, co jehe sinttachjian jaha ra chojni soji co seguro de ngain tti ditticaon ra. Co ẍajeho Dios mé tti anto nttanchaon na jai, vayá na para que ján na sontte na tti jí glorié jehe para cainxin tiempo; ján na conixin Jesucristo. 11 Co jehe Dios tti jiquininxin para cainxin chojni sinchesayehe na jehe co jehe tti rrochonda cainxin joachaxin para cainxin tiempo. Amén.
Nttihi joexinxin joajné Pedro
12 Silvano, tti janha datsoan que jehe cainxin tiempo ditticaon Jesucristo, jehe tti cjin palabrana ngain carta jihi. Co ngain carta jihi janha rrichjaha ra consejo co rrindattjo ra seguro que cain tti jian que jaha ra vayehe ra, mé tjagoa na ndoa que Dios rinao na ján na. Nchehe ra sigue ditticaon ra jihi cainxin tiempo.
13 Cain chojni que ditticaon Jesucristo, nite ngain ciudad de Babilonia, tti ni Dios coinchiehe inchin coinchiaha jaha ra, cain chojni mé rroanha na joajna nganji ra. Co cai Marcos, tti rinaho inchin xanhna, jehe rroanha joajna nganji ra cai. 14 Chjehe chó ra joajna jian inchin nchehe ra ngain xanchó ra.
Cainxin jaha ra ẍo ditticaon ra Jesucristo, Dios rrochjá ra tti c̈hjoin que tsonohe ansean ra. Amén.