HIBRU
Peri eite Hibru lo Lu Tewi ma'e Lese Ausawi
Hibru Peri Tutawe
Meni ta Juda lo lu taune ma'e lese ausawi. Eiwerai one towe eite leseye awere? Nomo so'oru ta'ama. Lu tamo apou a'i totesiya, “Pol one towe eite leseye.” Lu tere'e tamo apou a'i totesiya, “Meni tere'e ta one towe eite lese ausawi.” Juda lo lu taune tamo, Jisas ne tote tawesi umasiteye ape, lowe fofowei erasi a'i teritenamiteye. Serene lowe tomu ne'ese a'i tote tawesiyei lowe lo arunatirowawe, Juda lo yo seni si tame atati umasiteyei ne toteteye. Meni ape, one towe eite leseye ape, lowe ma'e apou au te'e atuatuteye. Lowe Jisas ne tote tawesiyei su, lowe lu taune wara'i a'i Owane Sitewi lo nihe se henerairowa. Lowe Moses lo yo peri umasinamiteyei su, lowe marepi hepene he'i a'i anirowata. Serai lowe Juda lo ya'ariyei lo yo seni fa atati arunatirowawe, Jisas ne tote tawesi umasinamite.
1
Jisas Krais, le Owane Sitewi lo meni eime pefine a'i ne.
1 Tu naifa weriyei Owane Sitewi lai peri lo au te'e siye lu lo ma'e au te'eteye. Nowe iyu menei tomu ne'ese se lowe ya'ariyei nomo lo ma'e Owane Sitewi lo peri au te'eteye. Lowe peri lo ape yo tere'e apou ape se au te'e fiyariteye. Ahowa, lowe, lowe ma'e peri lo tewi a'i tewi a'i au te'e fiyariteye. 2 Ahowa, pereye nowe eite henerai su, le meni eime lo nomo ma'e au te'eyei ne eimawe arosai. Tu naifa weriyei Owane Sitewi lai le ma'e awei pani, etiri werese au ta'aneyei ne auwe. Le nowe ye'ewi se le etiri werese werese a'i ape mo aniyei ne ariariyeye. [Jo 1:3] 3 Meni eime lo lai Owane Sitewi lo mi erasi pefine a'i au tewi mitaiyenamiteye. Sosu Marepi werese lo ape, sosu yo seni wara'i werese a'i lo, lowe Owane Sitewi ne aiwawe pefine a'i tene! Kairefiyeyei erasi lo se le omo pani, etiri werese ma'e au te'esiyawe, lowe peri lo wanu umasinamiteye. Le nomo au ta'ane fareraiyeye su, nomo lu taune aseyaro farere a'i henerai. Wiyawi ape ta'ane tepa'asiye su, le Owane Sitewi Pefine a'i lo ereti eyate feni sahe onunamiteyei ne wiye. [Ap 2:33-34; Kl 1:20; Hi 8:1]
Krais lai ipari wisere werese a'i hi ani ararosiya.
4 Owane Sitewi lai meni eime lo erasi a'i ei ani aroweye. Le meni eime lo ape ma'e iyape erasi pefine a'i auwe. Serai le Owane Sitewi lo ipari werese ape mo hi ani ararowe. [Fl 2:9] 5 Owane Sitewi meni eime lo ma'e apou eiye,
“Ne meni eime ano ne. Pereye nowe eite se ane lu taune werese ma'e amerame a'i au te'esiya.” Sng 2:7
Ahowa, le meni eime lo ma'e apou eiye,
“Ane tai pefine a'i no henerai. Sosu ne meni eime pefine a'i ano henerai.” 2 Sml 7:14; 1 Sto 17:13
Ahowa, le peri ape ipari werese lo ma'e ei ta'ame. [Ap 13:33] 6 Sosu aiwawe a'i le meni eime poto hi awei ma'e eimawe arosai su, le ipari werese lo ma'e apou eiye,
“Fene werese le ma'e lowe uporo ape'i onurowawe, le ma'e au te'e wisereye nine'inamite.” Lo 32:43
7 Ahowa Owane Sitewi lai ipari wisere a'i lo ne apou te'eye,
“Ane lowe fiyaru wou au iro henerairowa. Ane lowe wiyawi ano ta'aneyei ne eimawe arosawirowa. Lowe wiyawi yahowa'i siye lu ano henerairowa. Lowe yehe mi wou a'i ne.” Sng 104:4
8 Ahowa le meni eime lo ma'e apou te'eye,
“Ne lai Owane Sitewi a'i ne. Ne me tuto'u tutawe ape sahe mi mi pasi pasi weriyei onunamitorowawe, lu taune werese au noweinoweinamitorowa. Ne marepi farere a'i se lu taune werese lo yo seni au hese ereirowa.
9 Yo seni wara'i pefine a'i apou ape mo, ne lai tote wawesiyenamisiya. Ahowa, yo seni luwaru werese ape mo, ne lai ai marepi totenamisiya. Serene Owane Sitewi pefine a'i no lai ne ariariyeye. Le iyape no erasi pefine a'i ei ani aroweye. Iyape no lai lu feni no lo iyape hi ani ararowe. Serai le ne ne marepi au tote nine'inamisiya.” Sng 45:6-7
10 Le peri tere'e aiwawe a'i meni eime lo ne te'eye,
“Tu naifa, nowe sitewi weriyei se ne, Meni Owane Pefine a'i, ne lai omo pani, etiri werese ta'aneye. Ereti no se, ne etiri werese, omo ni'arawe hire sahe irosiya ape mo, ta'aneye.
11 Etiri werese, ne ta'aneye ape, lowe po'uterowa. Lowe werese uwaserowa. Apou a'i ipari tahe weriyei uwasesiya. Ahowa, ne ta'i a'i mi mi pasi pasi ironamitorowa.
12 Ne etiri werese au noweriyei apou a'i ipari tahe weriyei au noweri fusawirowa. Meni ta ipari tahe weriyei ani erau fusawirowawe, ipari tahe he'i a'i ani asiyei. Ne aiwawe a'i etiri werese, ne ta'aneye ape, ne ani fusawirowawe, etiri he'i a'i ta'anerowa. Ahowa, ne a'i lai mi mi pasi pasi weriyei aiwawe a'i ironamitorowa. Sosu marepi hepene no temeniye po'uterowata.” Sng 102:25-27
13 Sosu aiwawe a'i Owane Sitewi lai meni eime lo ma'e apou te'eye,
“Ne eyate feni ano sahe onura! Ane airame werese no hi ani ararorowa. Lowe no se airame werese a'i no hire sahe ato uwapo'u uweinamirowa.” Sng 110:1
Ahowa, Owane Sitewi lai ipari werese lo ma'e peri ape au te'e ta'ame. 14 Serai Owane Sitewi lo ipari ne, lowe ape mo ne eiwerai awere? Lowe ipari aiwawe a'i ne. Lowe Owane Sitewi lo wiyawi au ta'anesiya. Sosu aiwawe a'i le lowe hi awei ma'e lu taune le ne tote tawesirowa ape, au pati ferafereiyei ne eimawe arosairowa. [Sng 34:7; 91:11]