1 Pegtoladà ka te kedita te allang te keilangan ontò dan tomolò te amo dan, amon wedad otaw megtompuyus te Timanem, aw wedad heman otaw mekesila te ipegtoladà tadon. 2 Aw egpemenal se amo dan ki Cristo, eked kepakay aw eked tolò se allang kandin pengkey telekedowa dan diyà ki Cristo. Meneng keilangan labi pa ontò mèpiya se eg-inangen te allang, so pineokit kenyan, egtebangan dan se otaw egpemenal ki Cristo aw egkedekelan te Timanem te pedowan.

Keilangan megtoladà ka kenyan aw megsoblod ka kenyan diyà te menge otaw egpemenal. 3 Aw doen otaw sebad se ipegtoladà din kenà iling te kagi lekat te Pengolo tadon si Jesu Cristo, aw kenà heman iling te kebenalan pinemenalan tadon, 4 yan se otaw olò egpelangkaw-langkaw, aw wedad palos netegahan din. Kolang se ibeg din te pegdindil tepad te kedegdagan te kagi. Yan se kelekatan te peg-ingà, aw pegkeopal, aw pegbaet-baet, aw wedad pegsalig. 5 Gayed dan egpedindilay so migkedaet se aneng-aneng dan, aw simoway dan lekat te kebenalan. Eg-aneng-aneng dan te megkeyaman dan pineokit te pegpesakop dan diyà te Timanem.

6 Benal doen ontong te otaw megpesakop diyà te Timanem, meneng wedad ontong din kenyan singed aw meg-aneng-aneng sikandin te botong se kedònan din. 7 Pegtebaw tadon, wedad palos kedònan inibing tadon dini te keneyonan. Aw matay kidon, wedad heman palos kedònan ibingen tadon lekat dini. 8 Yan aw doen den kànen tadon aw penenaktun, botong den iyan te keluba te pedowan tadon. 9 Meneng se menge otaw egkeibeg megkeyaman, yan se mesayo meboyo aw keekalan te ibeg dan wedad ontong aw mekedaet kandan, aw yan detengan dan te mekebebaet. 10 Aw egkeibeg se otaw mengewarta, yan se eglekatan te peg-inang din te medita kemolò te medaet. Doen den menge otaw simoway lekat te kebenalan tapay dan pinemenalan tandà te ibeg dan egpengewarta, aw ontò den nepuluk se pedowan dan tandà te kelimahan dan.

11 Meneng so sikona se otaw egtaking te Timanem, pegpediyò ka lekat te kedita te medaet sìyan in-indan ko kamno. Pegpekeaseb ka meg-inang te metòlid, aw toman ka te ibeg te Timanem, aw salig ka kandin. Keilangan dakel se pedowan no diyà te menge doma otaw, aw keilangan medalem aw mèpiya se pedowan nikaw. 12 Pegpekagsen ka toman te insogò kamno tepad te kebenalan pinemenalan nikaw. Pegkinawà ka te kaling pedowan wedad temanan, so yan se doun te tinawal ka te Timanem amon begayan ka kenyan, aw mig-indan ka diyà te medita otaw te nemenal ka te kebenalan. 13 Doen pa ipunù ko kamno te egtengtengen ki te Timanem meg-antay te kedita lekat te nematay, aw egtengtengen ki i Jesu Cristo mig-indan ki Poncio Pilato te kebenalan. 14 Tolò ka te impunù kamno amon wedad palos kemalì no aw wedad isila kamno lamig te aldaw te peglikò te Pengolo tadon si Jesu Cristo. 15 Ipelikò sikandin te Timanem aw domateng se aldaw pinemallì din, so Timanem se ontò melangkaw diyà te kedita. Sikandin se Selotan eglowan diyà te kedita te selotan, aw sikandin se Pengolo diyà te kedita te pengolo. 16 Sikandin olò se eked palos kematay. Eg-ogpà sikandin diyà te ontò kelowahan eked kedepagi te otaw. Wedad palos otaw kimità kandin, aw eked palos sikandin kitai te otaw. Iduyun aw lomowan sikandin te wedad temanan. Metoman iyan.

17 Pegpunù ka te menge otaw doen dakel kedònan songkani te keilangan eked dan pegpelangkaw-langkaw. Eked kepakay aw kedònan dan se seligan dan, so eked ketegahi aw kano iyan pegkewedad. Meneng Timanem se keilangan seligan dan, so bowasag sikandin diyà kenitadon. Egpemegay sikandin te kedita te kelidoan tadon amon mèpiya se keogpà tadon. 18 Pegpunù ka te menge otaw meyaman te keilangan meg-inang dan te mèpiya diyà te menge doma otaw, so yan se ontò keyemanan. Keilangan meagka se pedowan dan megtabang te menge doma otaw. 19 Aw yan se inangen dan, metipon se ontong ibegay kandan doton te langit te modi aldaw, amon kinewaen dan se ontò benal pedowan wedad temanan.

20 E Timoteo, peg-ahà ka te metòlid se pegtoladà no te kebenalan insalig kamno. Ikà eg-inabut te balaw eked keibegi te Timanem aw kebolalaw ipegtoladà te menge otaw eden dan aw doen kebiyasa imbegay te Timanem kandan, 21 so doen menge otaw eg-ikagi te doen kebiyasa dan, meneng pineokit kenyan simoway dan lekat te kebenalan pinemenalan tadon.

Ibeg ko tebangan te Timanem se kedita niyo.