1 Seini se solat ko, si Pablo, doma ki Timoteo, kedowa tadon te pegpemenal. Lekat te ibeg te Timanem, siak se sebad sogounun i Jesu Cristo. Seini se solat ko diyà te kedita niyo menge sakop te Timanem kidoen te Korinto, aw diyà te kedita niyo menge sakop din doton te doma ogpeanan te Gresya. 2 Ibeg ko, tebangan kaw te Timanem Amay aw Pengolo tadon si Jesu Cristo. Ibeg ko heman, begayan kaw te Timanem te kelinaw te pedowan.

3 Iduyun se Timanem, Amay te Pengolo tadon si Jesu Cristo. Lekat kandin se keido, aw sikandin heman se egtabang. 4 Pengkey eden se kelimahan ko, ontò a din egtebangan. Yan pengkey eden se kelimahan te doma otaw, meketabang a heman kandan pineokit te tabang imbegay te Timanem kanak. 5 Aw ontò a pemilangen iling ki Cristo, ontò a heman tebangan pineokit ki Cristo. 6 Neketayod a pa te kelimahan amon meketabang a kenyo, aw amon mekelowà kaw lekat te kelimahan. Tinebangan a te Timanem amon meketabang a heman kenyo. Metoman iyan aw meketayod kaw te kelimahan iling te neokitan ko. 7 Metoman se egpelimanan ko tepad kenyo, so netegahan ko ini, aw pemilangen kaw, tebangan kaw heman te Timanem.

8 Menge kedowa ko, ibeg ko, metaga-taga kaw tepad te kelimahan neokitan ko doton te Asya, so ontò iyan dakel aw pelaban mebegat. Eden ko aw yan den se aldaw te pegkematay ko, 9 so aneng-aneng ko metoman a imetayan. Meneng lekat te ibeg te Timanem se peg-aneng-aneng ko kenyan, amon wedad doma seligan ko, olò Timanem, so sikandin se meg-antay te menge otaw lekat te nematay. 10 Penga niyan, impelowà a din lekat te medaet kelimahan sìyan. Sikandin se egseligan ko megpelowà heman kanak, pengkey eden se kelimahan domateng kanak. 11 Mèpiya aw megtabang kaw kanak pineokit te pegtawal-tawal niyo diyà te Timanem, amon megpesiontong se medita otaw diyà te Timanem tandà te pegpelowà din kanak pineokit te pegtawal-tawal te medita otaw.

12 Ontò a neluba, so netegahan ko te ontò metòlid se keogpà ko. Pengkey kenan a pesalo, aw labi pa doton kenyo, metòlid se keogpà ko aw mèpiya heman se tod ko kenà pineokit te kenaken kebiyasa, meneng pineokit te tabang te Timanem kanak. 13-14 Insolat ko olò se mebatog niyo besahen aw kelebetan. Pengkey doen pa kidoen kenyo wedà pekelabet, meneng ibeg ko, mekelabet se kedita niyo amon megpelubahay kidon te aldaw te peglikò te Pengolo tadon si Jesus.

15-16 Na, so netegahan ko te mekelabet se kedita niyo, yan mig-aneng-aneng a te meglegeb a kidoen kenyo te mekedowa, amon ontò kaw meluba, so ibeg ko, mapit a kidoen kenyo te pegpesalo ko doton te Masidonya. Kepenga niyan, todà a mapit kidoen kenyo te pegpesalo ko doton te Judiya, amon meketabang kaw kanak. 17 Pengkey wedà a pa pekedeleg, meneng kenà egdowa-dowa se ibeg ko lomaoy kenyo. Siak kenà iling te doma otaw kenà egkeseligan aw melomì egketodà se aneng-aneng. 18 Egkeseligan se Timanem, aw netegahan din te ontò benal se intoladà ko kenyo. 19 Kenà egdowa-dowa se Batà te Timanem si Jesu Cristo, sìyan intoladà day si Silas aw si Timoteo. Ontò egkeseligan si Jesu Cristo, 20 so metoman se kedita te pakang te Timanem pineokit kandin, aw yan se doun te eg-ikagi kay te kebenalan pineokit kandin amon iduyun tadon se Timanem. 21 Sikandin se egtabang kenami sipat sikiyo amon ontò kidon tomaking ki Cristo. Timanem heman se nemallì kenitadon. 22 Impetaga-taga din te batà kidon din pineokit te Espiritu Santo imbegay din meg-ogpà dini te pedowan tadon, amon ketegahan tadon te metoman se kedita te pakang din.

23 Na, wedà a deleg doton kenyo amon eked a pemegay kenyo te lidò pineokit te pegsagda ko kenyo. Labi pa mèpiya aw megselsel kaw te eked a pa doton. Pinemoyò ko se Timanem megsistigos te ontò benal se inikagi ko seini. 24 Kenà ko se egsogò kenyo tepad te pegpemenal, so nelobos den se pegpemenal niyo. Meneng egtelaban a kenyo tepad te pegpemenal amon meluba kaw.