1 Elew Teofilo. Tagnà pegsolat ko kamno kedengan, mig-indan a te kedita te ininang i Jesus aw intoladà din heman lekat te ketebò te pegtoladà din 2-3 taman te pegkeengat din doton te langit. Pegkeantay din lekat te nematay, melikit si Jesus migpekità diyà te menge sogounun tapay pinemallì din. Migtoladà heman kandan tepad te peglowan te Timanem. Dalem te kepatan se aldaw, melikit sikandin migpekità diyà kandan. Yan ontò dan netegahan te neantay sikandin lekat te nematay, so kinità dan sikandin. Te wedà pa keengat doton te langit, migpunù si Jesus kandan pineokit te Espiritu Santo.

4 Pegdoma i Jesus kandan, migpunù sikandin te eked dan pa kesayo lekat te Jerusalem, so minikagi sikandin, “Keilangan megtagad kaw te pegketoman te impakang te Timanem, so yan se tapay ko intoladà kenyo. 5 Kedengan, pineokit te wayeg se pegbonyag i Juan. Meneng sebad kemolò se pegbonyag te Timanem kenyo, so te eked kenamay, domateng se Espiritu Santo kenyo.”

6 Pegketipon te menge sogounun i Cristo, mig-insà dan kandin, kagi dan, “Pengolo, megpelowà ka lay den aw lomowan ka lay den kenami menge Judiyo?”

7 Timaba si Jesus, kagi din, “Eked niyo ketegahi aw kano iyan ketoman, so Timanem Amay ko olò se netaga-taga aw kano iyan, so lekat iyan te kandin ibeg. 8 Meneng ikà niyo egkelibel kani. Aw domateng se Espiritu Santo kenyo, ketebangan kaw din amon meg-indan kaw tepad kanak doton te Jerusalem, aw kidoen heman te kedita te ogpeanan te Judiya aw Samarya, aw pengkey taman te kebelad te keneyonan.”

9 Penga niyan te telobo dan pa timengteng ki Jesus, neengat sikandin doton te langit. Neselibengan sikandin te labon. 10 Peglengag dan doton te langit, pegketà dimateng se didowa anghil nenaol te mepotì. 11 Minikagi se anghil, “Sikiyo tege Galiliya, ikà niyo eglengag. Neengat den si Jesus doton te langit, meneng todà sikandin lomikò dini te tanà onawa te pegkeengat din kinità niyo seini.”

12 Penga niyan, nesayo se menge sogounun i Cristo lekat te bontod sìyan iningedanan Olibo. Minolì dan doton te Jerusalem. Sebad kilomitro se kediyò niyan lekat te bontod sìyan. 13 Pegdateng dan doton te Jerusalem, netipon dan doton te gibelayan te balay inogpaan dan. Seini se otaw netipon. Si Pedro aw si Juan aw si Santiago aw si Andres, si Felipe aw si Tomas, si Bartolome aw si Mateo, si Santiago batà i Alfeo, si Simon meyseg, aw si Judas batà te kesangay i Santiago. 14 Melikit dan netipon aw migsebad se pedowan te kedita dan migtawal-tawal diyà te Timanem. Netipon heman kidoen se menge bayi, aw menge kedowa i Jesus, aw inay din si Maria.

15 Doen aldaw netipon se medita otaw egpemenal, dagpò dan menge sebad gatos kelowan. Timindeg si Pedro kidoen aw minikagi, 16 “Menge kedowa ko, netoman den se kagi te Timanem impesolat te Espiritu Santo ki David tepad ki Judas. Sikandin se nengibing te menge otaw migdakep ki Jesus. 17 Benal si Judas se doma day, so sikandin heman se pinemallì i Jesus amon megtelaban kandin.”

18 (Doen kwarta imbegay ki Judas tandà te peg-inang din te medaet, aw yan se imbayad din te pawà. Penga niyan, nedagdag si Judas aw migbeto se getek din. Nelowà se tegaken din aw nematay. 19 Netegahan iyan te kedita te otaw dini te Jerusalem. Iningedanan se pawà sìyan Akeldama. Se kelebadan niyan, “Pawà te Dipanog.”)

20 “Doen kagi tapay insolat diyà te libro te Delangan,

23 Penga niyan, impesolat dan se ngadan te dowa otaw, si Matias aw si Jose iningedanan ki Justo, se doma ngadan din si Barsabas. 24 Penga niyan, migtawal-tawal dan diyà te Timanem, “Pengolo, netegahan no se pedowan te kedita te otaw. Yan petega-tegahi kenami aw sinu se otaw pinemallì no 25 somelilin ki Judas aw meinang sogounun megtelaban kenami, se terbaho tinenanan i Judas pesalo doton te temanan din.”

26 Penga te pegtawal-tawal dan, migbonot dan. Penga niyan, si Matias se nepallì. Impeakop sikandin doma te sempolò tegusà sogounun i Cristo.