1 Mɔ, Paulo, wǝ ɛyɛ lǝ Onanto eto lelabi ǝsuǝ eso mini Kristo Yesu eto ɔtɔnkpee, mɔ nlɛ kukue komfo bɔwɔni kǝtǝ mimba léfo Onanto bɛnɔ nkpe lǝ Efeso nya biyifo bani ku Kristo Yesu nya bietsyue wǝ etiki koto. 2 Lǝ Boanto Onanto ku Bonamute Yesu Kristo lǝ befi mǝ lefonǝ ku diyuǝ bǝtǝ mi.

3 Bitǝ lǝ bɔsɔ Onanto wǝ ni Bonamute Yesu Kristo eto Anto ani. Wǝ ni nwǝ dífi lɛwɔnɔ eto atsyɔkpokpo nya nkpe kato kenke útǝ bo, se buyifo bani ku Kristo eso. 4 Itsyise fɛ Onanto lǝ uyifo kawunsiǝ, wúulǝkǝ bo utsyǝ koko nkǝ lǝ bubǝ buyifo bani ku Kristo, bǝ lǝ buyifo kɛnkɛ ku mba ǝsuǝ lebua lǝmbɔkɛ lǝ ǝsuǝ lǝ wǝ ǝnǝmi. 5 Se Onanto laala bo esoo, wúutsyue utsyǝ koko nkǝ ɛyɛ lǝ bo lɔniyifoyifo ku Yesu Kristo esoo, lǝ bubǝ bofiani wǝ bebi. Nyamfo kon didi wǝ nsusu kokoko nɛ. 6 Lǝ nyamfo eso ele bǝ bɔtɛsɛ Onanto lǝ wǝ lefonǝ kplɛ nǝ úfi útǝ bo kafo faa ɛyɛ lǝ wǝ ubi lala ǝsuǝ eso. 7 Itsyise ɛyɛ lǝ Kristo eto kɔtɔ ǝsuǝǝ, búnyǝ bofo, nyamfo ni bǝ búnyǝ abua eto bufikatsyɛ. Nte Onanto eto lefonɛ kplɛ eto okle ni nǝ úfi útǝ bo mfo. 8 Lefonǝ nǝ eto kakle lǝmbǝ bɔtɛyi. Ɛyɛ lǝ wǝ kobetete ku kase wǝ nsusu nyi lesa saa eso. 9 Útǝ bɔnɔ kasɔ ékpa wuee ketsyue kulakula ka béyifo bǝtsyǝ itǝ kǝ bolosǝ ɛyɛ lǝ Kristo ǝsuǝǝ. 10 Nyamfo ni bǝnkǝ lǝ lefe nǝmǝ ayoo, bookpa eyifosa kenke bakɔ, lesa saa nǝ nkpe kato ku kasɔ nya boofi asa nyamfo kenke bakpe lǝ Kristo eto kalɔ.

11 Onanto ǝtǝ lesa saa ǝbǝ itǝ fe kase óla. Nya Onanto dílǝkǝ bo nkǝ bofiani wǝ betidi ɛyɛ lǝ bo lɔniyifoyifo ku Kristo lǝ lesa nǝ útsyue útsyǝ taa kasɔ ketsyikokɔ kẽ ǝsuǝ. 12 Nyaso bitǝ bomba ni betidi tutɛ Onanto díkǝlǝkǝ útsyǝ kokoko bɔnlɛ kusu bobe itǝ Kristo, lǝ busiǝ nkpǝ bɔtɛsǝ Onanto eto diyǝnde. 13 Nya mi tsya léfiani Onanto eto betidi se bɛnɔ ɔnukualɛtiki nǝmǝ ini Ditiki Sɛɛ nǝmǝ eto letsyabebe, be bínyǝ bofo, itsyise béfo wǝ bɛnɔ eso. Úfi Lɛwɔnɔ Kɛnkɛ nǝ eto kɛnyɛ ɔ́tɛyi útsyǝ nkǝ wootsyese bo, útsyǝ mi lekpo nkǝ biyifo wǝ bale. 14 Lɛwɔnɔ nǝmfo ni nnya Onanto dífi óse uyi útǝ bo nkǝ bo tsya ebunyǝ asa nnya útsyǝ kɛnyǝ útǝ mba ni wǝ bale kokooko. Uyisese ǝmfo lɛ bo bote bǝ Onanto ebutǝ bomba ni wǝ bale nyǝ kedikɔ lǝ wǝ. Bitǝ bɔtɛsǝ wǝ diyǝnde!

15 Lǝ nyamfo esoo, idu lǝ lefe nǝ mínɔ miǝ béfo Bonamute Yesu bɛnɔ, ku kase biala mba kenke díkafo Onanto eto Ditiki Sɛɛ nǝmǝ banɔɔ, 16 maanyɛ Onanto ani bɔsɔ lǝ mi disi. Maakloma mi lefe saa lǝ mɔ olatoto ǝsuǝ. 17 Nya maatɔ Onanto wǝ ni Bonamute Yesu Kristo eto Anto, ɔkɛnkɛnyǝ kenke miǝ utǝ mi wǝ Lɛwɔnɔ nǝ luutǝ bitsyǝ ǝnǝ nya lǝ ulǝkǝ Onanto ǝmǝ ote mi, bǝ lǝ bete wǝ kukɔnɔ. 18 Nya maatɔ wǝ minkǝ lǝ ɔsini mi ǝnǝmi, bǝ lǝ binyǝ nnya eso ókpadi mi óboko nkǝ lǝ bibǝ bete kusubebe ko eso ókpadi mi ku kase atsyɔkpokpo itǝ mba ni wǝ balee, lefo koya 19 ku kase wǝ ǝsuǝale kplɛ nyamǝ nlɛ keyifo kekleke lǝ bomba léfo wǝ bɔnɔ ǝsuǝ. Nya ǝsuǝale nyamfo, nnya nlɛ keyifo lǝ boo, lekateko wǝ ǝsuǝale kplɛ nyamǝ, 20 nnya úfi ótakasǝ Kristo utsyiko ɔkɔmǝ úbǝ nkpǝ nya úfi wǝ útsyǝ lǝ wǝ kodiani lǝ kato kenke. 21 Mfó Kristo nsi ɔnlɛ seka budi nya kato eto sekadidi saa ku kasɔ mfo eto ǝsuǝale saa ǝsuǝ ku ǝsuǝale bamba saa nkpe wǝ kalɔ. Wǝ diye teke kato ǝsuǝale saa ku sekakedikɔ saa lǝ kawunsiǝ kamfo ku nka nsi luubǝ. 22 Onanto éfi lesa saa ókpe lǝ Kristo eto akpa kalɔ nya úfi wǝ útǝ bafokanɔfɔ eto etsyukpa kenke fe asa kenke eto Onamute wǝ nso kenke. 23 Bafokanɔfɔ bamfo ni Kristo eto ǝsuǝ nnya dítǝ ɔflɔ kenke, nya Kristo tsya ni nwǝ lǝǝtǝ asa nnya kenke laaflɔ kalo.