1 Mi bebii, bitsyue mi antomǝ ku ambemǝ koto fe kase ɛnyɛ lɛ Kristo eto kusu ǝsuǝ itsyise nnya ni lesa nǝ lɛtsyɛ bǝ biyifo nɛ. 2 Kɔfi kpekpe tutɛ ko kɛnyɛtsyǝtsyǝ nkpe ni bǝnkǝ, “Bu fǝ anto ku fǝ ambe.” 3 Isukosǝ ɛtɛyi nkǝ, “Bǝ lǝ ɛlɛkɛko fǝ lǝ ǝsiǝ nkpǝ kǝntsyɛ lǝ kasɔ kamfo ǝsuǝ.”

4 Antomǝǝ, biankpe mi bebi lɛblɔfi. Bomuu, bikulɛsǝ mǝ lǝ binǝ mǝ ku kɔlɛlɛlɛ ɛyɛ lǝ Bonamute eto bofokanɔ eto kusu ǝsuǝ.

5 Ndomufɔ, mimba leeyifo betidi bamba eto nyifoo, bebokosǝ ǝsuǝ kasɔ lǝ bitsyue mi kasɔ mfo eto banamute koto itsyi taa mi ketu kǝmiǝ fe kase bietsyue Kristo eto ditiki koto. 6 Bienyifo nko lǝ lefe nǝ mǝ ǝnǝmi ntǝkǝ lǝ mi ǝsuǝ bǝ lǝ batɛsǝ mi eso bomuu, bifi mi ǝsuǝale kenke biyifo lesa nǝ Onanto laala, fe Kristo eto ndomufɔ. 7 Bilǝkǝ kafo faa biyifo keyifo fe Bonamute ǝmǝ bɛnlɛ ke buyifo kǝtǝ seka, nya inni utidinini saa. 8 Bekloma biǝ Bonamute ebofo utsyuǝ saa kayo, ndomunyǝ feni o-o, nwǝ nsi wǝ ǝsuǝ ǝsuǝ feni o-o ɛyɛ lǝ keyifo sɛɛ ka feeyifo kumǝ.

9 Banamute, mi tsya yifo nkomǝ ke bitǝ mi ndomufɔ. Biankpe mǝ sikpi, itsyise biyi biǝ nwǝ ni mi ku mǝ Onamute ǝmǝ kpe kato. Waambe utidi eto ǝnǝmi lǝ etiki bola kǝlǝkǝ ǝsuǝ.

10 Lǝ kalosǝkɔɔ, kase biyifo bani ku Bonamute, lǝ isi ɛkɛ ale beso ɛyɛ lǝ wǝ ǝsuǝale kplɛ nyamǝ ǝsuǝ. 11 Bekpe mi bemake kenke bia Onanto dítǝ mi bǝ lǝ befo buńyǝ kekleke lǝ Obonsam eto awɛsu bua nyamǝ ǝsuǝ. 12 Itsyise inni bo kuu betidi nlɛ bɔkpɔ. Bomu bo ku awɔnɔ bua eto ǝsuǝale, lɛwɔnɔ eto ǝsuǝale eto baka, kawunsiǝ tuu kamfo eto ǝsuǝale eto baka, ku asa buayifoyifo eto baka ba nkpe kato eto ǝsuǝale bɔnlɛ bɔkpɔnko. 13 Lǝ nyamfo esoo, bifi Onanto eto bemake kenke bekpe. Bǝ lǝ diyi bua nǝmǝ ǝbǝ ditu mii, biofo buńyǝ kekleke kakpɔ lema nǝmǝ isu kalosǝkɔ, nya lǝ ǝsuǝale lǝ isi ibu ɛkɛ mi lǝ ǝsuǝ.

14 Nyaso bińyǝ kekleke! Bifi ɔnukualɛ eto Ditiki Sɛɛ nǝmǝ bekle nkɛ fe abɔsu lǝ bifi kasɛyifoyifo biti fe akɔɛsibi eto situ eto etisa. 15 Ditiki Sɛɛ nǝ lǝǝnǝ diyuǝ kabokoo eto bɔtɛyi, lǝ diyifo mi afɔkpa nya biokpe bisu lema. 16 Ɛwunsǝ lǝ nyamfo ǝsuǝǝ, bifi bofokanɔ bɛlɛ lǝ ani lǝ idi lesa nǝ loota mi ǝsuǝ lǝ lema. Itsyise nnya ni lesa nǝ loofo itǝ mi lǝ olontidi ǝmǝ ata mi wǝ kabe ka nte fe ute wǝ nlɛ bunyǝ fla fla fla nya yaninsǝ ute ǝmǝ. 17 Nya bifi situ eto lemankpakpa nǝ ni Onanto eto nkpǝ bofokǝtǝ biti lǝ disi ku Onanto eto ditiki nǝ ni kalande nǝ Lɛwɔnɔ dítǝ mi bɛlɛ kekleke lǝ kɔni. 18 Bikato ola lefe saa kǝtǝ Onanto. Bɛtɔ Onanto eto bɔwunsǝko kekleke fe kase Lɛwɔnɔ nǝmǝ loote. Lǝ nyamfo esoo, bińyǝ bikabe kusu, nya yaanlo mi ani. Bikato ola lefe saa lǝ mba lefiani Onanto eto betidi kenke eto disi.

19 Beto ola tsya lǝ mɔ disi bǝ lǝ Onanto lǝ ufi lesa nǝ ele bǝ ntɛyi okpe mɛ lǝ kɛnyɛ bǝ lǝ ntɛyi Ditiki Sɛɛ nǝmǝ ku bofokanɔ lǝ sikpi mante mante ǝsuǝ, bǝ lǝ mbe letsya nlǝkǝ asakulakula nnya nkpe lǝ Ditiki Sɛɛ nǝmǝ ǝsuǝ nte. 20 Ditiki Sɛɛ nǝmfo eso mini ɔtɔnkpe wǝ béti bákpe lǝ diyo mfo nɛ. Beto ola bǝ lǝ mfo ni bɔtɛyi ku unnyǝ fe kase ele bǝ ntɛyi ni.

21 Tihiko, bo ɔyimisani lala, wǝ leeyifo asa lǝ Bonamute eto kusu ǝsuǝǝ, ebubǝ ɔtɛyi mi kase minte ku keyifo ka kenke minlɛ mfo. 22 Botsyese ko minlɛ wǝ miǝ ubǝ ɔtɛyi mi kase bonkpe mfo nya lǝ okpe mi nkɛale.

23 Boanto Onanto ku Bonamute Yesu Kristo lǝ bǝtǝ mi bafokanɔfɔ kenke, diyuǝ ku lelabi ku bofokanɔ. 24 Onanto eto lefonǝ lǝ ditǝkǝko betidi ba kenke laala Bonamute Yesu Kristo ku lelabi manlo.