1 Kutupa Ideli nane palai kawaso tiekena꞉ pomana꞉e laa hone wimiki pita꞉ Polo mandane dipula haliweki ame̱le̱ ami opisa hali homeke Diuliusi pa꞉ta꞉ halaaka꞉na꞉ ipikana꞉ma꞉ta꞉ Okasitani tapake hali hata꞉ handeteke haena꞉yeke pimime. 2 Kutupa A꞉datamitiomo da nane hao epeeke palai kawaso Eisia damanu pa꞉ta꞉ poluekema꞉ haena꞉ mo hande Ma꞉sedonia nane Desalonaika hali A꞉tisakusi ame̱le̱ mo kawasona꞉ pua pita poma꞉me. 3 Da kelepeeke handa mo Saidoni da opolo poma꞉me. Kutupa Diuliusima꞉ Polo pa꞉ta꞉ a꞉ta꞉ma꞉ homolo hata꞉ ipika꞉ yankeke titima꞉ handeteke haena꞉yeke handolo pena꞉ lea꞉me. 4 Kutupa koto pa꞉ta꞉ mina꞉pa꞉lao dawala tukiki pa꞉ta꞉ pua po tilipumanu wenoko nanema꞉ epeeke handa mo Saipotasi nanema꞉ oto pa꞉ta꞉ yapoma꞉me. 5 Kutupa mo Silisia Pa꞉mbilia kenke yaapo nane dawalana꞉ tunkula puata꞉ mo Laisia nanema꞉ hala꞉ da Maita da pa꞉ta꞉ opolo poma꞉me. 6 Koto da pa꞉ta꞉ mo opisa halima꞉ palai kawaso homeke A꞉lekesa꞉ndia da nane hao Ideli nane poluekema꞉ haena꞉ handa꞉ wiaata꞉ niki koto palai kawasona꞉ pitaeya꞉me.

7 Nate mandaneeki manuna꞉ta꞉ yopusiki pua꞉tiki pea ka꞉nda꞉ taapuna꞉ mo Sinaidasi da pa꞉ta꞉ opolo poma꞉me. Kutupa mo po tilipu nika꞉ wenoko nanema꞉ ipulu hata꞉ sa꞉sa꞉ pieke handa mo Kotiti hoki oto pa꞉ta꞉ mo Sa꞉lomono da teke pa꞉ta꞉ poma꞉me. 8 Kutupa mo dawala tea꞉ nane ka꞉nda꞉ taapuna꞉ pulu hata꞉ mo hande Lasea teke pa꞉ta꞉ hala꞉ da Pe Heipeni da pa꞉ta꞉ opolo poma꞉me.

9 Natelekemanu amba꞉ paeyeke handa mo hande Diu wanda꞉halima꞉ nemanu na neke pa hao haemeke nate make paeyeke handa niki ekia꞉nda꞉ peaama꞉na꞉ laa da pua꞉peke na yea꞉me. Poloma꞉ pi alo alota꞉ 10 Haliwekio. Ya hone witolo ekita꞉ doe lea꞉me. Ame do dina꞉ poma꞉ka꞉na꞉ta꞉ hoeyapeke ya꞉la꞉me lea꞉me. Do palai kawaso ala꞉ta꞉ ala꞉ta꞉ homeke na loa꞉me. Haliweki make alupea꞉peke ya꞉la꞉me lea꞉me. 11 Koto leekepate mo opisa halima꞉ Poloma꞉ lea꞉ pi na opiki mo palai kawaso teke halina꞉ pi pita꞉ mo teke handeteke hayeke hali yaapona꞉ pi homeke opia꞉me. 12 Kutupa koto pa꞉ta꞉ kosa꞉ ki epea꞉ka꞉na꞉ hapeke na ya꞉la꞉me laa haliweki paeyaoma꞉ alota꞉ Dawala tukiki pa꞉ta꞉ pua mo Kotiti nane sisima u hayeke alena꞉ Pinikisi da pa꞉ta꞉ opolo poluma꞉pe mata꞉la꞉me laa lememe. Koto pa꞉ta꞉ hamono kosa꞉ ki epea꞉ka꞉na꞉ta꞉ ana꞉ pilieke laa lememe.

13 Kutupa po hosiki ipulu haena꞉ Ameta꞉ pua꞉peke ya꞉la꞉me hone wia mo a꞉nka yola꞉ mea a꞉meiyao mo Kotiti nepoko nanema꞉ poma꞉me. 14 Poma꞉pate po tieke kenke nanema꞉ epeeketa꞉ 15 ota꞉ ambulaeyeke handa mo hande kawasota꞉ wenoko nanema꞉ pua꞉peke na yalo hata꞉ la꞉ka꞉la niki tu mea baeya꞉me. 16 Kutupa puoopu hao mo Kouda hosiki nepoko nanema꞉ puata꞉ ka꞉nda꞉ma꞉ homolo hata꞉ kone mo kawasosiki mea kawaso tieke manda 17 mea a꞉meiyao mo palai kawaso tieke setepe pea mea tonkaluekema꞉ pimime. Kutupa mo Setisi kenke nane puaama꞉na꞉ palaimanu leisi mea wiaata꞉ pa poma꞉ tina꞉ lememe. 18 Kutupa mo kawaso tieketa꞉ lekeleke wotu leeke handa da kelepeeketa꞉ kako ala꞉ta꞉ ala꞉ta꞉ ikali pa꞉ta꞉ mu ba ba pimime. 19 Da ma꞉nda꞉ kelepeeketa꞉ ika꞉ kikima꞉ kone mo hande palaimanu make mo palai endu haya꞉ pumanu make mea baememe. 20 Kutupa mo hande nate hombulanka꞉manu hoto elekeeleke na teeke handa po tieke paa ipulu haena꞉ nikana꞉ma꞉ta꞉ nikita꞉ da꞉ta꞉peke na ya꞉la꞉me laa hone uma꞉me.

21 Kutupa nate paeyao ne na nemeke handa Poloma꞉ta꞉ tiao iki pa꞉ta꞉ pua alota꞉ Haliwekio. I̱ma꞉ hande loa꞉ pi opua꞉pa꞉peke aleo. Kotiti nane na mina꞉pa꞉laemeka꞉na꞉ yoluta꞉ do ala꞉ta꞉ ala꞉ta꞉ la꞉tieke na hao weleke we puma꞉ ekita꞉ na pulu puma꞉me lea꞉me. 22 I̱ma꞉ta꞉ iki pa꞉ta꞉ do alome. Honkopu hape lea꞉me. Hali ma꞉nda꞉ ota꞉ homeke hauta꞉ na pilieke. Do kawaso homeke hoelieke lea꞉me. 23 Ame do timba kone ya panda꞉puniao hata꞉ ta꞉ma꞉ni pea halo Koda꞉na꞉ enisolo homeke I̱ teke pa꞉ta꞉ a꞉pa hata꞉ alota꞉ 24 Poloo ota꞉ paala꞉ma꞉ na homa꞉peke. Neketa꞉ Sisa teke pa꞉ta꞉ pua halipikie lea꞉me lea꞉me. Kutupa opie. Koda꞉ma꞉ neke ame̱le̱ pulimi haliweki paeyao pa kilieke lea꞉me. 25 Koto ekina꞉ haliwekio. Honkopu hape. I̱ma꞉ta꞉ Koda꞉na꞉ pi miniki hata꞉ hande I̱ pa꞉ta꞉ lea꞉ haumanu ota꞉ pilieke hone ulume lea꞉me. 26 Kutu piliepate nikita꞉ hoki ma꞉nda꞉ nane pua talumeke lea꞉me.

27 Natemanu 14 paeyeketa꞉ mo po tilipu ipulu haena꞉ timbata꞉ mo Meditoteiniani dawala ikali tukiki pa꞉ta꞉ pulu hamono buta꞉hokina꞉ mo palai kawaso handeteke haeme haliwekima꞉ Ameta꞉ kenke teke pa꞉ta꞉ puluma꞉me hone wimikime. 28 Koto ekina꞉ pu mea lopa꞉niao 20 pa꞉domi yata꞉pa handaata꞉ hosiki mo pateleke pua paa mea lopa꞉niao 15 pa꞉domi yata꞉pa handemekeme. 29 Kutupa mo toopi pa꞉ta꞉ puaama꞉na꞉ mo palai kawaso hoki nane a꞉nka tonkopu mea lopaota꞉ da kelepena꞉yeke yeni pimikime. 30 Mo palai kawaso handeteke haeme haliwekita꞉ mo palai kawaso mina꞉pa꞉lao pindipa poluekema꞉ mo hande kawasosiki mea ikali manda lopanialuekema꞉ pimime. Mo palai kawaso mineke nane pa꞉ta꞉ a꞉nka mandane ekimanu mea lopaaluekema꞉ makeaaso hata꞉ pimipate 31 Poloma꞉ mo opisa hali ipika꞉ ami haliweki tonka꞉na꞉ iki pa꞉ta꞉ alota꞉ Do palai kawaso handeteke haleme haliweki do pa꞉ta꞉ na pitimika꞉na꞉ta꞉ da꞉ta꞉peke na ya꞉la꞉me lea꞉me. 32 Koto lea꞉ ekina꞉ mo ami haliwekima꞉ hande konau pumanu tunkula hande kawasosiki paa lopena꞉ lememe.

33 Da ka꞉la꞉puluekema꞉ haena꞉ Poloma꞉ paeyaoma꞉ nesiki nena꞉yeke honke wotu alo alota꞉ Ikana꞉ma꞉ nesiki na neke hone elekeeleke witolo hamina꞉ nate 14 paeya꞉me lea꞉me. 34 Koto ekina꞉ I̱ma꞉ do honke alo pita꞉ Ne nape pi ta alo handa꞉pe lea꞉me. Honkopu hamena꞉ nape lea꞉me. Hali ma꞉nda꞉ta꞉ ipika꞉ itiki homeke kone na alupilieke lea꞉me. 35 Koto laaka꞉na꞉ Poloma꞉ palaowa mea haliweki paeyao ame̱le̱ hata꞉ Koda꞉ pa꞉ta꞉ keiyae pi laata꞉ mo palaowa pindipa nea꞉me. 36 Kutupa paeyaoma꞉ ta꞉na꞉ma꞉ homa ika꞉ kone ne nememe. 37 Mo hande kawaso tiekena꞉ 276 haliweki pituma꞉me. 38 Kutupa ne ana꞉na꞉ naaka꞉na꞉ mo kawaso yapa꞉ pu liaena꞉yeke mo widi palaowana꞉ kiliki pusemanu dawala tukiki pa꞉ta꞉ mea lopaememe.

39 Kutupa da kelepea꞉ pita꞉ta꞉ kenke handaata꞉ Hando pa꞉ta꞉pe lemepate ankolo pu wiekeeki homeke handaata꞉ Do kawasota꞉ koto pa꞉ta꞉ talamana꞉e lememe. 40 Koto ekina꞉ mo hande a꞉nka pumanu ka꞉la꞉pa lopa꞉niao oni dawala tukiki pa꞉ta꞉ ulu pena꞉ laata꞉ mo kawaso la꞉ka꞉lao haya꞉ alemanu tonkaeya꞉ pumanu make ka꞉la꞉paata꞉ mo kawaso mineke nane palai homeke mea endiao poma꞉ titolo haena꞉ mo kenke pa꞉ta꞉ a̱i̱ pena꞉yeke pimime. 41 Kutu pimipate mo kawasota꞉ ikali hou pa꞉ta꞉ ta̱la̱ haena꞉ mo kawaso mineke nane ota꞉ panka꞉ pelia hata꞉ taka꞉la꞉pa pulu haena꞉ hande mendeke naneta꞉ mo dawala ikali homa꞉ a꞉pa mea lonke lonke laaso hata꞉ hande kawaso mendeke nane yamba꞉latiki pia꞉me. 42 Kutupa mo ami haliwekima꞉ mo dipula haliweki paeyao ikali pa꞉ta꞉ kiki moka꞉la pindipa puaama꞉na꞉ lumana꞉e hone wimikipate 43 pa ika꞉ opisa halima꞉ Polo tamba꞉ muluekema꞉ mo haliweki hone wimieki tunkula sa꞉sa꞉ pia꞉me. Ipikana꞉ma꞉ pi la alota꞉ Kiki moka꞉lapeke ya꞉la꞉ haliweki amba꞉la dawala pa꞉ta꞉ ponkaniao kenke nane pua꞉pa꞉peke lea꞉me. 44 Kutupa mandane haliwekita꞉ tisunu make kawaso yamba꞉la꞉la꞉eki sasakesunu make mea mina pua꞉pa꞉peke lea꞉me. Koto ekina꞉ niki paeyaota꞉ mo kenke nane pua ana꞉na꞉ opolo poma꞉me.