1 Polo I̱ta꞉ Yesu Ketiso hone witolo hata꞉ dipula polo hali I̱ make nika꞉ kame Timodi dikana꞉ma꞉ mo dika꞉ e yankeke some Pailimono neke pa꞉ta꞉ wape pitopa꞉me. 2 Kutupa mo naka꞉ da pa꞉ta꞉ mombolo haleme siosi wanda꞉hali make nika꞉ ana꞉ Apia make nika꞉ ame̱le̱ Ketisona꞉ a꞉nda꞉ peawaasoma꞉ hali Akipasi make iki pa꞉ta꞉ do wape epena꞉ alopa꞉me.

3 Nika꞉ Apa꞉ Koda꞉ pita꞉ nika꞉ Tekehali Yesu Ketiso yaapoma꞉ iki pa꞉ta꞉ mo a꞉ta꞉ma꞉ homa tamba꞉ mina꞉la꞉eki make mo puki lopa꞉niaasa꞉eki make kina꞉e.

4 Pailimono I̱ma꞉ yeni pu moneaaso toma꞉na꞉ta꞉ naka꞉ biki alo hata꞉ta꞉ Koda꞉ pa꞉ta꞉ keiyae pi lo halome. 5 Kutu piki hauta꞉ mo nakana꞉ma꞉ Koda꞉na꞉ wanda꞉hali paeyao pa꞉ta꞉ pukima꞉ homo make kutaa mo Tekehali Yesu pa꞉ta꞉ hone tulao haleeki make opitolo hata꞉ alome. 6 Kame dikana꞉ma꞉ neke ame̱le̱ mo Yesu Ketiso pa꞉ta꞉ hone tulaasa꞉ hau pa꞉ta꞉ta꞉ ota꞉ homeke hone wia ta꞉ma꞉ni pea haloma꞉me. Kota꞉ mo ya yeni pitolo ekita꞉ mo naka꞉ hone tulaleeki pa꞉ta꞉ yama꞉ Ketisona꞉ epeke putupa꞉ ku hala꞉eki paeyao handoelena꞉ Koda꞉ma꞉ walena꞉ I̱ma꞉ ipiki pa꞉ta꞉ yeni pitolome. 7 A꞉ta꞉e. Ya kameo. Naka꞉ pukima꞉ homele ekima꞉ ya puki pa꞉ta꞉ ta꞉na꞉ tieke peaya꞉ ekima꞉ hana꞉ noka꞉paeya꞉me. Koto pele ekima꞉ta꞉ nakana꞉ma꞉ mo Koda꞉na꞉ wanda꞉hali paeyaona꞉ puki mea tiawaaleme.

8 Koto ekima꞉ta꞉ I̱ma꞉ naka꞉ Ketiso yankeke hata꞉ pipita꞉ pa pua hata꞉ dupi dupi laa lapeke ya꞉la꞉pate 9 paa neke pa꞉ta꞉ pukima꞉ homolo ekima꞉ pa honke ala꞉eki homeke pitolome. Do honke alo ekita꞉ I̱ Polota꞉ koke hali hata꞉ kone pa Yesu Ketisona꞉ e pokoeke handaa dipula mea pitaalemeke pita꞉ kone alome. 10 Ya Ketiso weki homeke Onisimasi pa꞉ta꞉ nakana꞉ma꞉ pulu pele ekina꞉ neke pa꞉ta꞉ honke alome. I̱ do dipula pita꞉ kone ipiki pa꞉ta꞉ Ketisona꞉ pi waloa꞉ ekima꞉ta꞉ I̱ta꞉ ipika꞉ apa꞉ haowa꞉me. 11 Amba꞉ ipikita꞉ naka꞉ epeke e pokaasa꞉ weki na haya꞉pate ameta꞉ neke I̱ diki epeke tamba꞉ mea꞉peke some hala꞉me.

12 Koto peleke ameta꞉ I̱ma꞉ ipiki neke pa꞉ta꞉ ya pukima꞉ homoloeki tonka꞉na꞉ epena꞉ alome. 13 I̱ma꞉ Yesuna꞉ Pi Seliapo wala꞉tiki pu haoweke handaa dipula do pilume. Do pilu pa꞉ta꞉ nakana꞉ma꞉ I̱ tamba꞉ mulu pele tupa꞉ta꞉ Onisimasima꞉ naka꞉ anke teke mina꞉ ipikita꞉ I̱ yaapo pa haena꞉e laa hone pa꞉la꞉me. 14 Kotota꞉ ya hone pa꞉la꞉eki ya꞉la꞉pate nakana꞉ma꞉ I̱ tamba꞉ muelena꞉ yeke ti wopu na lolueke. Pa nakana꞉ma꞉ naka꞉ hone pa꞉la꞉ tupa꞉ puelena꞉ yeke waleke kitolo yu wia halome. Pa naka꞉ hone pa꞉la꞉eki na handeke hata꞉ I̱ma꞉ hau ma꞉nda꞉ na pulueke.

15 Onisimasima꞉ neke mina꞉pa꞉lake hauta꞉ pa nate hosikima꞉ homeke pia꞉pate paa handa꞉ mika꞉na꞉ta꞉ kota꞉ hoto paeyaota꞉ neke yaapo hao halieke. 16 Pate ame ipikita꞉ amba꞉ hande pa hameke e pokea꞉ some tupa꞉ dia꞉me ameta꞉ koto hau ota꞉ topo pea dika꞉ epeke Ketiso kame talo ipula꞉me. Ame ipikita꞉ ota꞉ ya tamba꞉ mina꞉la꞉ epeke hali hala꞉pate wetepe naka꞉ pa hameke e pokalia꞉ hali make naka꞉ Tekehali Ketiso pa꞉ta꞉ hala꞉ kame makee hone witolo ipiki pa꞉ta꞉ pukima꞉ homo halipikie.

17 Koto ekima꞉ta꞉ nakana꞉ma꞉ I̱ta꞉ naka꞉ ta꞉ma꞉nie hone wika꞉na꞉ta꞉ kota꞉ ipikita꞉ I̱ handa꞉ mu halo pele tupa꞉ kone pa handa꞉ mia꞉peke. 18 Mo wekima꞉ neke pa꞉ta꞉ hoke hau ma꞉nda꞉ o tondiki ma꞉nda꞉ mu pia꞉ka꞉na꞉ta꞉ kota꞉ I̱ma꞉ epeaaluekema꞉ I̱ pa꞉ta꞉ la kia꞉peke. 19 Ya kikima꞉ kone wape pitolo hata꞉ alota꞉ I̱ Poloma꞉ naka꞉ yenkita꞉ ana꞉na꞉ kulueke laa do wape pitolo handa꞉e. Paa naka꞉ Ketiso pa꞉ta꞉ haleeki I̱ pa꞉ta꞉ yama꞉ mele ekina꞉ na alopate. 20 Pilisi I̱ma꞉ ta꞉na꞉ma꞉ homonota꞉ kota꞉ nakana꞉ma꞉ mo Tekehali pa꞉ta꞉ hone witolo ya Ketiso kame hata꞉ ya honke loa꞉ ekita꞉ ota꞉ pia꞉peke.

21 Ya honema꞉ta꞉ do wapena꞉ honke alo hauta꞉ pilipikie hone ota꞉ witolome. Kota꞉ ya alo tupa꞉ta꞉ ota꞉ lombei peao pilipikie hone witolome. 22 Pi ma꞉nda꞉ta꞉ dupae. Ya honema꞉ta꞉ iki paeyaoma꞉ Koda꞉ pa꞉ta꞉ yeni pu haleme ekina꞉ hombo peaaso I̱ta꞉ neke pa꞉ta꞉ a꞉pono lelieke. Koto ekina꞉ta꞉ I̱ hapeke da panda꞉ ma꞉nda꞉ tikitiki yao wia꞉peke.

23 Ketisona꞉ hauna꞉ I̱ ame̱le̱ mandake dipula pilupa꞉ hali Epa꞉petasima꞉ neke pa꞉ta꞉ a꞉talo pi tapaala꞉me. 24 Kutaa make ya e mandake pokoloma꞉ haliweki Maka A꞉tisakusi Dimasi make Luku ikana꞉ma꞉ make a꞉taloe alememe.

25 Koto ekina꞉ Tekehali Yesu Ketisona꞉ a꞉ta꞉ma꞉ homa tamba꞉ mina꞉la꞉eki iki homeke homeke ame̱le̱ nate paeyao u haena꞉e alome.