1 Mayae na bere hele here no unulu bele waheikoke wanen mae Allah bele wahaeukoke nekewaube, rabuhine ban Allah Naei a elewolere oboroiboi nane merau u mekai beko na hibi-hibi mokowaube. 2 Nebei hee mai wali nda kani kelana wali beko nibine hakowaube, walobo yun naei are hubara haeisa yanewaunge. Ro miyae Allah Naei a elelere asasi koyate yo naei kena einye nebei walobo yun naei kaliare mokoimeyele. 3 Bere eyae nanemene nebei yo naei wali wanen. Nebei hee aei wali bekore kena haehae kandeke nane merau u bene beko yae nekandeke. Eyae Allah yae ehee bukulure hayemmele holona yo wanen mae nekewande. 4 Nebeibe Allah yanekoi yase bele Kiyae aere buhae hele heume. 5 Allah Naei a elewolere eyae asasi kandeke aerene wahaendekoke nekewande hororebe, Allah mokoumeboke wali neme bele ro miyae imabonde naeise Wali Ondofolo Naei a elelere hila rabo halemale. Allah kena buhae aere ban mae hewombene mare hole molombokembe. 6-7 Yesus Wali Ondofolole walora Allah aere kena nime haba yae mokoumekoke. Allah yae walobo yoni-yoni bele malaikat yoni-yoni bele naei bene aere waleumeboke nane merau anuwau bumane hele Yesus Wali Ondofolo Naei mbainye eumenuweuboke. Bena honoifoyole heena nekenate ro miyaere kelemmiyende Allah ro miyaere kena buhae na kaban sele aere ban mae heumile naeise, nda me u foi sele mokoumeboke. 8 Allah na kena buhae aere ban mae hewombe yae Yesus Wali Ondofolo Naei a elelere hila rabo halaeunge walora mai wali hole molombokembe. Nebei rambun Allah Nenaeijae mokouboke, mai me u mokowaubene ban. 9 Mai wali holere molombokembe naeise mai me u foi mokowaubene ban. Nebei mekainye aei u nolo u kainye ro miyae hi na uware ekaei sului. 10 Rabuhine ban eyae Allah yae mokowoume ro miyae. Na bere hele Allah me u foi yoni-yoni mokoungehake. Nebei me u foi yoni-yoni mokomande naeise, eyae Yesus Wali Ondofolole walora ro miyae u mekai neme mokoumeboke.

11 Nebeinye mayae Yahudi ban ro miyae bene nekenayembe, mare Yahudi ban ro miyae yae honowayembe. Yahudi ro miyae na era hena huluinye ro uwa elan mae neisayate. Nebei me u ro miyae yae mokowate, Allah yae ban. Mayae nebei era hena omokoinye, Yahudi ro miyae mare ele moinya yo yae ro royayembe. 12 Nebei hee mayae Wali Ondofolo bele wahaeukokebe nekaube, Israel yohone me ebaei. Allah yae Israel ro miyaere are heteungekoke Neyae weumi are hakonainyelena foi mokommile. Nebeibe mayae Yahudi ban ro miyaere Allah nebei are ewei. Mayae walire rabo ban nane merau Allah ban mae nda kani kelane nekaweke. 13 Mayae na bere Allahle wali nibi isian nekewaube yo. Nda hee Yesus Wali Ondofolo a huluinye nekaubene, Yesusle ha rileuboke yae mayae Allahle holona yore yaeuboke.

14-15 Na bere Allah a ukeunge Musale walora wali heere foloukoke are Yahudi ro miyae hakowate. Yahudi ban ro miyae ehakoiboinye, nebei holo bee yokeijo yae nekewate. Nebeisa Wali Ondofolo meke kelewoumi Naei a elelere hila rabo halenate ro miyae wali hena bona yaronate, Musale walora wali heere folaikoke hubara haeisa yaneyainyelene ban. Nebei mekai yaere Yesus mokoungeboke Musale walora wali heere folaikokere elae ban yeuboke. Naei merau raungehike Yahudi ro miyae bele Yahudi ban ro miyae bele Naei a elelere hila rabo halenainyele walora jemaat neme mbaise yembonde, rei mai nekenayende. 16 Ohaline Yesus Naei wali kinyeumiboke, hereke, benen waleungeboke. Nebei mekai yaere Allahle ro be ro yoinye ro miyae naei beko bako mokandere aheukoke baeufoke, nane merau Yesusle walora nebei Yahudi ro miyae nane merau Yahudi ban ro miyae Allah bele foi mokoumiboke. 17 Yesus Wali Ondofolo meke mayae Yahudi ro miyaere bele Yahudi ban ro miyae belere huwengkokembere. Neyae eleukoke bere Yahudi ro miyae Allah ro rowainye, Yahudi ban ro miyae Allahre onewainye. Nebei yoho bee yokeijo yae nekewate. Nda hee Yesusle me kelee u keleene nebei yoho bee na hului aka baeke wanen holo mbainye nekenainyendere. 18 Yesusle walora eyae nanemene Yahudi ro miyae bele Yahudi ban ro miyae bele Roh mbai walora Ako Allah bele elande borande.

19 Nebei mekainye mayae Yahudi ban ro miyae Yahudi ro miyae wanen mbai Allah Naei eleuboke wekeumi holona ro miyaere yaeuboke. Mayae yo meiko-meiko yo ban nane merau ele moinya ro miyae ban. 20-21 Imaere nda mekai heyate: mekele hu, nelae, wa, fenaa, yan, rambun hi bele ahuneiboyate. Allah Naei imae nebei wanen mae heuboke. Yesus Wali Ondofolo kose hu wanen. Yesus Naei abu ako bele Allah Naei yenjo kayaayo bele mekele hu wanen. Yesus Naei me kelee u keleene orulaiboke ro miyae, wa, fenaa, yan, rambun hi bele wanen. Nebei rambun ha yae ahunenaibonde yae imaebe henate wanen, ro miyae Yesus Wali Ondofolo Naei a elelere hakainye yae Allahle holonare inyaibonde. Neyae Allahre ei mom-mom imae wanen yembonde. 22 Wali Ondofolo Naei a elelere hakaunge yae mayae Allah yae nekele imaebe namman heimeyembe, Naei Roh walora Neyae mai kena u einye nekeyele.