1 दी ताम्‍ङेतिवा ति मिजी तेरुप सुङगी कोर्ला टिवु यिन। दी मिजी तेरुप सुङ ति थल्‍माला जम्‍बुलिङ ज्‍येङ्‍गुप पेला राङ वोतुप यिन, तमा ती ति ङ्‍यिरा थोवु ताङ मिककी थोङ्‍गुप साङ यिन, ङ्‍यिरा ल्‍हावु ताङ थोवा तङ्‍गुप साङ यिन। 2 ती मिजी ति जम्‍बुलिङला फेवु ङ्‍यिरा थोङ्‍सुङ। तुक क्‍यानी ती नाम्‍साङ मिशिवु मिजीकी कोर्ला ङ्‍यिराङ ख्‍यिराङला पङ्‍बु बिन्‍नी सिरिन। ती मिजी ति थल्‍माला के पपा कोन्‍छ्‍योककी मुला नोक, ती ति ङ्‍यिरा पर्ला फेप्‍सुङ। 3 ङ्‍यिरा काङ थोङ्‍गुप ताङ थोवु ति ख्‍यिराङला सिरिन वे। च्‍यिलासिसिन ख्‍यिराङ ङ्‍यिरा मुला डिक्‍जोम च्‍युङ्‍नी तम्‍जी ल्‍यामु वुङ्‍शी। तमा ङ्‍यिरा डिक्‍जोम ति पपा कोन्‍छ्‍योक ताङ खोकी सेवु येशू ख्रीष्‍टकी मुला जो वे। 4 दाक्‍पु तेरीला लोदिमु वुङ्‍शी सिनी ङ्‍यिरे दी ताम्‍ङे ति टिवु यिनो।

5 ङ्‍यिरा येशू ख्रीष्‍ट नेमा थोवु लेन ल्‍यामु ति ख्‍यिराङला शेतिनो। ती ति काङ यिन सिसिन कोन्‍छ्‍योक ति ठछ्‍येली वोतुप वोसिर टेङ्‍बु वे। खोकी मुला काङ साङ नक्‍तोमी वोतुप दोके मेटेङ्‍बु मे। 6 दोजो दाक्‍पु खो ताङ मुला डिक्‍जोम च्‍युङ्‍नी तम्‍जी ल्‍यामु वे सिनी सिवी, यिने नक्‍तोमीला राङ युकुप दोके मेटेङ्‍बु किवी सिसिन, दाक्‍पु ति जिनोक जोप ताङ मेटेङ्‍बु यिन। 7 यिने खो ठछ्‍येलीला वोतुप दोके दाक्‍पु साङ खो मुला राङ ठछ्‍येलीला युकिवी सिसिन दाक्‍पु डिक्‍जोम ल्‍यामु च्‍युङ्‍गिवी। तमा खोकी सेवु येशू ग्‍यङ्‍शिङला कल्‍नी तेन्‍दुप ठक नेसुर दाक्‍पी दिक्‍पातिवा तेरी ताकिवी। 8 दोजो दाक्‍पी ङला याङ दिक्‍पा राङ मे सिवी सिसिन, दाक्‍पी दाक्‍पुला राङ जिनोक जोवु दोके यिन। तमा दाक्‍पी सेमला टेङ्‍बु मेतुप यिन। 9 यिने दाक्‍पी ङ दिक्‍छेन यिन सिनी दिक्‍पा ने ग्‍युर्सुङ सिसिन, दाक्‍पी तेरी दिक्‍पातिवा खोकी माफ नङ्‍गिवी, तमा दाक्‍पुला तेरी मेटेङ्‍बु नेसुर टेङ्‍बु जो नङ्‍गिवी। च्‍यिलासिसिन खो खोङ्‍तेर्मु ताङ टेङ्‍बु वोतुप कोन्‍छ्‍योक यिन। 10 येलुङ दोजो दाक्‍पी ङे याङ दिक्‍पा माक्‍या वे सिवी सिसिन, कोन्‍छ्‍योकला दाक्‍पी जिनोक जोप मी दोके जेवी, तमा खोकी सुङ ति दाक्‍पी मिजीला मेवी।