1 Uresẽ ja que ama nimia ndese ra. —Malta, ɨ que a je ra. Ejoõ acua je, ɨ que hue jenda ure je ra. 2 Hue jenda turãte que ure je ra. Tata que emendi ure je ra. Urechee sacuã. Tiquindiiseĩte que eriqui ure je ra. 3 Pablo que nyea queru mbuchuuta ra. Nyea mbucha mose que mbeɨ usẽ asi Pablo echɨ ra. Mbeɨ que Pablo o shɨu ra. 4 Eo resebe tuchɨ que eñɨ nda. Nyebe hue jenda ñee ñee nyue. —Mbia ɨquia ɨquiasa Pablo reae. Oso chee que ama ndɨsha sɨ no. A mbeɨ riqui eshɨu a no. Mano nda cote reae. Huɨɨcuã mose, ɨ rei que hue jenda nyue ra. 5 Pablo que mbeɨ mbaba tátaa ra. Erasiã mbeɨ que Pablo je ra. 6 Mbia que mae nguiatu Pablo rese ra. —Ma eruru. Embusiate rei rae. Mano ndae, ɨ rei que ra. Mbia que mae nguiatute rei u nguiã erese. Erasiã mbeɨte que ee ra. Nyebe mbia ucheẽ mbuchebi nguiã. —Dios mo ndei Pablo, ɨ que mbia cote ra.

7 Hue robeɨchõ ngue ererecua mbae ibi ra. Ejoõ acua rerecua. Publio, ɨ que ererecua je ra. Urererao que uchuchúaa ra. Urembuquiaru turãte que ra. —Jẽitõ mocoɨ̃ jiri, ɨ que ure je ra. Tres días que ureitõ erese ra. 8 Publio ru rasite que ra. Eracute que ra. Eruushɨ ruquite que ra. Pablo que oso erea ra. O que echono earõ nda. Ñee ngue Dios je ra. Nyerõ ngue cote ra. 9 Aquere que mbia rasi ngaẽ ngaẽ ja Pablo je cote ra. Ejoõ jenda ja. Dios que embucherõ ja ra. 10 Mbia que mbae mee mee tuchɨ ure je ra. Urecuata mose que mbae chuchã nyuchã tuchɨ canoa ye ra. Urechɨurã.

11 Ejoõ acua que urecu beɨ ra. Tres meses. Canoa cuasu mo abe que chɨ beɨte aque rɨ̃ nda. Alejandría jenda rei aque canoa. Dios Nyeremo, ɨ que aque canoa je ra. Aque canoa ye que ureso cote ra. 12 Siracusa, ɨ que sucha tubɨrɨã mo je ra. Huee que urecuasẽ nda. Huee que ureitõ mocoɨ̃ nda. Tres días. 13 Hue sɨ que ureso siquiibi cot e ra. Urecuasẽ ngue Regio ra. Huee que ureitõ nda. Isamamɨ ngue quɨrɨrɨã ureɨchu urequite quiti ra. Canoa maña turã. Co mɨɨ ngue ureque ama ndiite re ra. Urecuasẽ ngue Puteoli ra. Huee que urequichi beɨ canoa sɨ cote ra. 14 Jesús quiato mo ngue uretea huee ra. —Jenguchõ na urerese, ɨ que ure je ra. Ae urecuchõ nguiã una semana erese. Aquere que ureso Roma nguiti cote ra. Ibi rɨ̃. 15 Jesús quiato que jirandu urerese cote ra. Roma jenda. Nyebe ecuaẽ nguiã urerobeɨshɨ̃. Foro de Apio, huee que urerobeɨshɨ̃ nda. Tres Tabernas, hue abe que urerobeɨshɨ̃ ɨshɨ̃ nda. —Ɨaanye, ɨ que Pablo mae mose Jesús quiato rese ra. Pablo ia tuchɨ erobeɨshɨ̃ mose. 16 Urecuasẽ ngue Roma cote ra. Sucha tubɨrɨã tuchɨ que Roma nda. Soldados rerecua que ecuasa mondo ja mbia ɨcuã ndaarõsa je cote ra. Pablo mbuchao que ra. —Ndechuchua chõ eɨco nde, ɨ que ee ra. Soldado mɨɨ ngue Pablo reaquiatu beɨ quia ra.

17 Urecuasẽ namo jiri mose que Pablo judíos rerecua munua j a ra. Roma jenda. Pablo que ñee ee ra. —Seresenda, mbae ɨcuã ngue asaã eãte judíos je ra. Nanderameɨ ñee abe que amumba eãte ra. Judíos que semeeño Romanos je ra. Jerusalén seɨco mose. 18 Romanos ngue ñee tuchɨ seje ra. “Nandehuɨ esɨ”, ɨ rei ngue serɨɨ̃ cote re. “¿Mbaerã nda nandeɨquia re? Mbae ɨcuã mo ngue esaã eãte”, ɨ que serɨɨ̃ nda. 19 “¡Jẽhuɨchɨ̃ nda esɨ jẽ!” ɨ beɨ que judíos quia ra. Romanos je. Judíos quia ñɨ huɨ sereãte nguiã sesɨ. “Semondo ererecua tuchɨ je”, ae chee que se ra. Ererecua saa ra acheẽ ɨcuã eã ndei judíos rɨɨ̃. 20 Nyebe “Jenyu. Tamae jendese. Tacheẽ jẽje”, ae que jẽje ra. Mbia mano je ra quera sɨ, nande chõ ndaque equia co. Ũquɨ̃ je chõ secuasa riqui nguiã co, ɨ que Pablo judíos je ra. 21 Judíos rerecua que ñee Pablo je ra. —Jerusalén jenda que ucheẽ mbesa eãte ɨmbu ure je ra. Ae ngaẽ ngaẽ nguia hue sɨ, ũquɨ̃ abe que ñee ɨcuã eãte quia nderɨɨ̃ nda. 22 Ndecheẽ urechandu rã. Mangue chooño eã mbia ñee ɨcuã ɨcuã jenɨɨ. Jesús quiato rɨɨ̃. Nyebe echeẽ ure je, ɨ que Roma jenda Pablo je ra.

23 —Aque mose ra urechu ndecheẽ andu, ɨ que judíos Pablo je ra. Aque mose que ecuaẽ jate cote ra. Pablo chuchúaa. Isamamɨmbe. Pablo que embaaquiatu quiatu tuchɨ ra. Tenda mondo chee. Jesús rɨɨ̃ ngue eriqui ñee ñee mbia je ra. Moisés chɨmbesa que esenei senei ee ra. Dios cheẽ mbuchecuasa chɨmbesa abe que esenei senei ee ra. Ɨ̃ nda mbia Jesús ɨcua. —Dios quiarei ererecua tuchɨ, ɨ tuchɨ que Pablo judíos je ra. 24 Emo emo ngue Jesús isi ra. Pablo cheẽ mose judíos je. Eataque que Pablo cheẽ isiteã teã nda. Ɨchõɨño neɨ equia ee reaẽ. 25 Pablo cheẽ nduɨ ja eã ngue ra. —Nyao rei erecha, ɨ que eataque ra. Nyebe Pablo ñee ee. —Espíritu Turã ngue Isaías mbucheẽ turã nanderameɨ je cose ra. Ẽɨ̃ ngue ñee nda: