22
David nu Suŋgoŋge sinzaŋna ta tuku gare-garekina
(Mune 18)
1 Suŋgoŋge David Saul tuku wai mbolŋge ŋgueu mbal ŋakmba tuku wai mbolŋge te-luka tina le nu Suŋgo tuku nyu te-duŋga mune te ulna.
2 Ye piti sinamŋge minet ta Suŋgo nu fonde kareŋnu taŋaŋ ye tumba koryate.
3 Nu ndame kune taŋaŋ ye ka sinam taŋge kuirket.
Nu kandim taŋaŋ ye kigraibkate le ŋgueu mbalŋge ye ŋayo sili ndayade.
Nu ye kigraibkate le ye mine mayewet.
4 Sine Suŋgo tuku nyu te-duŋgube.
Ye nu wika yabaŋet le nu ye ŋgueu mbal tuku wai mbolŋge te-luka tate.
5 Yu mbalo sugo sugo tiŋga ye kaiyam bafude taŋaŋ nane ye ŋayo siliyam bafunaig.
6 Nane ye tumba muli-muliyinaig le ye kume dirmba 7 wamdus piti ŋak minmba yiŋe Mbara Suŋgo ye turyuwa ŋga wiken le nu nuŋe tukul wande mbolŋge ye tuku wi ta isna.
8 Taŋamba Kuate nu nane tuku gubrana le kilke samba buru-burukina.
9 Nu tuku fumbe burok kumam pa guwa prona.
Miŋge kumam pa suŋgo kraŋer-kraŋerka tui fat taŋaŋ pirsi-parsinaig.
10 Nu samba malaŋga talka gau dabuk dabuk mbol tiŋga ndekina.
11 Nu eŋel mbol minyokina le bubre pinderka kinit taŋaŋ fumba tumba ndekina.
12 Ma furir suŋgo sawe ma kimkanu suk nu tumba soŋgina le 13 teliŋ sana le ma kilŋamba ndekina.
14 Taŋana le Suŋgo samba mbolŋge kuaila fudukate taŋaŋ kueŋka sakina le 15 ma teliŋmba tui fat taŋaŋ ŋgueu mbal ninde farna le kua ka sili-silinaig.
16 Suŋgo nu ŋgueu mbal tuku gubra kagli firka nane saniŋge likumba miŋgembi bubre fitkina le yu paraka yu sinamok agaŋ ta ŋakmba kilim kinaig.
17 Taŋanaig le Suŋgo nu wai sirmba ye te-luka tina.
18 Ŋgueu mbal saŋgriknu ye te-ibeŋyam bafunaig le Suŋgo nu ye te-luka tina.
19 Ye piti suŋgomba ŋak minen le nane pro ye ndoŋ kame bunaig ta Suŋgo nu ye kusre ndayina.
20 Nu ye tuku garena tukunu nu ye te-luka tina le ye mine mayewen.
21 Ye maŋau tiŋreknu ndo dubimba minen le nu lafumba wam mayenu ye mbol kina.
22 Ye Suŋgo tuku tukul pasa ndo dubiwen sulumba Kuate ŋgumne ndawen.
23 Ye nu tuku tukul kame mara mindek idus timba dubiniŋmba minmba nu tuku pasa pitai ndawet.
24 Ye nu tuku am mbolŋge purfeŋnu minmba une maŋau ke ndaken.
25 Ta tuku Suŋgo nu ye tuku maŋau ta lafumba maŋau mayenu ye mbol kina.
26 O Suŋgo, sine ne kusre ndanube ta ne mata sine kusreke nda.
Sine maŋau purfeŋnu ndo kumba minbe ta ne maŋau mayenu ndo sine mbol kate.
27 Sine mbar maŋau kumba minbe ta ne lafunu ŋayonu sine siŋgit.
Sine maŋau tiŋreknu ndo dubibe ta ne lafunu maŋau tiŋreknu sine mbol kate.
28 Sine siŋgine nyu yabukube ta ne sine kile-luka kilit.
Sine siŋgine nyu payamkube ta ne sine tuku nyu kile-ibeŋkamŋgat.
29 O Suŋgo, ne ye tuku bulu taŋaŋ ma furir pitaite.
30 Ne ye sinzaŋya le ye ŋgueu mbal tuku fonde kareŋnu lukamba nane kile-ibeŋkamŋgit.
31 Kuate tuku maŋau purfeŋnu ndo. Pasa nuŋe ta tiŋreknu ndo.
Nu kandim taŋaŋ nuŋe mbal kigraibkate.
32 Suŋgo nu Mbara ndindo. Nu ndo ndame kune suŋgo taŋaŋ sine kilmba korsiŋgit.
33 Kuate nu ye kuirkam tuku ma mayenu. Nu ye kambim tuku ndin mayenu fuŋgit.
34 Nu ye tuku kupe saŋgri pilete le ye saŋgri tiŋga kinenumet.
35 Nu ye tuku wai saŋgri pilete le ye tui kareŋnu didiket.
36 O Suŋgo, ne ye sinzaŋyumba naŋe kandim saŋgrinu ye sumba kaiyate le ye nyu ŋak minet.
37 Ne ye ndin mayenu tumyate le ye kupe basleŋga bari ndaŋget.
38 Ye ŋgueu mbal kogroŋka ŋakmba kilmba ŋaigo siglike suluwen le 39 nane gororomba ye tuku kupe tugum taŋge ndekinaig.
40 Ne ye saŋgri pileyina le ye kame mbolŋge ŋgueu mbal ŋakmba kile-ibeŋken.
41 Ne ye sinzaŋyina le ŋgueu mbal ŋakmba kua ka sili-silinaig le ye nane kilmba ŋaigo sigliken.
42 Nane wikinaig ta andeŋge nane kile-luka kile ndakina.
O Suŋgo, ne mata nane ismba nda isanu sukna.
43 Ye nane kilmba tidoŋ firfirken le nane kukedu suk pronaig.
44 Israel mbal afu nane ye ndoŋ kame bumba ye te-ibeŋyam bafunaig le ne ye te-luka tumba nane tuku gabat madiyina.
Taŋgo pino buk nane ye gilai ta nane kile ye tuku miŋge kumnemŋge minig.
45 Rawe mbal ye tugum promba dagol tidroŋga lokade. Nane ye tuku pasa ismba dubide.
46 Nane naŋgine tumbraŋ fonde kareŋnu ŋak ta kusreka kuru-kuruka ye tugum prode.
47 Suŋgo nu abo tugu ŋak. Nu ye tuku ndame kune suŋgo taŋaŋ ye tumba kaiyate. Kuateŋge ye te-luka tina. Ta tuku sine nu tuku nyu te-duŋgube.
48 Nu ŋgueu mbal ŋakmba kile-ibeŋka ye sinzaŋyate le nane ŋakmba ye kumnemŋge minig.
49 Yiŋe ŋgueu mbal ŋgamukŋge nu ye kor mayeyate.
O Suŋgo, ne yiŋe ŋgueu mbal ŋgamukŋge ne ye kigraibka ye sinzaŋ mayeyina sulumba ne ye madiyumba nane tuku gabat pilna le minet.
50 Ta tuku ye kile kasomok mbal tuku am mbolŋge gare-gareka ne tuku nyu te-duŋget.
51 Kuate nu ye gabat suŋgo mini ŋga madiyina.
Mara mindek nu ye turyina le ŋgueu mbal ŋakmba kile-ibeŋken.
Nuŋe raŋgun mayenu kume pur maŋau mara mindek ye mbolŋge yiŋe ndare mbolŋge tuturmba minmba minamŋgat.