Kalata ya kutanguna ya Paulo ku
Batesalonika
BUSANSULUSHI
Kalata yakutanguna kuli Batesalonika yalalembwa ne mutumwa Paulo 1:1 Yela kuba kalata yakutanguna njalalemba Paulo iyo yalaba cibela ca Baibulo, kayi yalalembwa byaka 51 panyuma pakusemwa kwa Klistu. Paulo walikuba mu Kolinto mpwalikulemba kalata iyi njalalembela Batesalonika, mubungano ngwalabyala mubulwendo bwakendi bwatubili 17:1-10. Mulibuku lya Ncito mulambangeti mubungano uwu mwalikuba Bayuda, nsombi bangi balikuba Bagiliki.
Paulo liya kwikalisha cindi citali mu Tesalonika panyuma pakubyala mubungano uwu, neco kali lafumuko walatuma iyi kalata yakubayuminisha baklistu. Mukalata iyi muli nkani shingi ne malailile angi ambuli mobela kwikalila baklistu. Paulo walasha mano ku kubwela kwatubili kwa Klistu. Mpani baklistu ba ku Tesalonika emakani ngobalikuyandishisha kwishiba. Paulo walasebensensha kubwela kwatubili kwa Klistu kwambeti kubeti ceshikubanyakilisha kukuba ne bwikalo bwaina bwaciklistu bukute kukondwelesha Lesa. 5:6-8
Mitwi ya makani
Paulo latatikinga kalata iyi pakupa mitende mubungano kulumba Lesa cebo ca endibo
Lino lambanga sha ncito shakendi, ne mulumbe ngwalaleta Timoti 2-3
Cakonkapo, Paulo lapanga malailile angi ancobela kwikala kabali bamunikilwa nekubwela kwatubili kwa Yesu 4:1 mpaka 5:15
Paulo lapwishinga nekupa mitende mubungano nekubasengeti uliyense mumubungano abelenge iyi kalata 5:16-28
1
1 Njafwe, Paulo ne Sailasi kayi ne Timoti. Tulamulembelenga ba Tesalonika momubungano mukasa a Lesa ne Mwami Yesu Klistu. Luse ne lumuno Lube nenjamwe.
Sha buyumi ne lushomo lwa ba Tesalonika
2 Tulalumbumga Lesa lyonse pacebo ca njamwe mwense kayi lyonse tulamushumbulunga mumipailo yetu. 3 Tukute kumwanuka pamenso a Lesa pabintu mbyomwalensa pacebo ca lushomo lwenu, kayi mbuli ncomwalasebensa cangofu lushomo, kayi ne lusuno lwalapesheti musebense mwangofu, kayi ne kupembelela kwenu Mwami wetu Yesu Klistu ncekwashimpa.
4 Mobanse tucinshi kwambeti Lesa umusuni kayi lamusala kuba bakendi. 5 Pakwinga twalamuletela Mulumbe Waina, cakutasebensesha maswi onka, nsombi nengofu sha Mushimu Uswepa kayi cakutatonshanya sobwe. Mucinshi ncetwalikwikala nenjamwe, pakuyanda kumunyamfwilisha.
6 Mwalakonkela bwikalo bwetu kayi ne bwa Mwami Yesu. Necikabeti mwalapita mumapensho anene, mwalatambula Mulumbe Waina mwakukondwa kwalakufuma ku Mushimu Uswepa. 7 Neco mwalaba citondesho kubantu bashoma muli Yesu mu Makedoniya ne ku Akaya. 8 Bantu bangi balanyumfwa Mulumbe Waina kufuma kulinjamwe kutambowa abo baku Akaya ne ku Makedoniya bonka, nsombi impuwo ya lushomo lwenu muli Lesa yalamwaika ku masena onse. Neco lino kuliya ncotwela kwambapo sobwe. 9 Bantu bonse balambanga sha ncemwalatutambula cena pacindi mpotwalamufwakashila, kayi mbuli ncemwalatushiya tumbwanga, nekusandukila kuli Lesa muyumi kwambeti mumusebenselenga. 10 Kayi mulapembelelenga Mwanendi kufuma kwilu. Uyo ni Yesu, Lesa ngwalapundusha kubafu. Euyo latupulushunga ku bukalu bulesanga.