Kalata ya cibili ya Paulo ku
Bakolinto
Busansulushi
Libuku lya Bakolinto bacibili lyalalembwa ne mutumwa Paulo pakati pa (55-56 AD). Kufuma pa cindi ncalasemwa Yesu Klistu (1:1) Kalata ya cibili iyi Paulo walalembela ku mubungano wa ku Kolinto. Bayiya bashometi Paulo walikuba lalembepo kalata yakucelemuna bantu baku Kolinto. Iyo kalata yalataika iliya kubonekapo (2:3-4). Libuku lya Bakolinto lyacibili lyalalembwa ne Paulo pa cindi ncalikuba ku Makedoniya (2:13)
Libuku lya Bakolinto lya cibili lyalibela pakwinga Paulo walalembamo bintu bya ku moyo wakendi. Paulo walabonesha kukondwa cebo ca ncito yaina njobakute kwinsa mbuli mwalanyumfwila kuli Tito. Mukalata iyi muli ciyisho cinene cilambanga pa cipangano ca linolino, kayi ne mubungano mowelela kubenga mali akunyamfwilisha bashoma ba ku Yelusalemu (8:9) Calaboneketi batumwa bwa bwepeshi balikufuma kumbi balacana cibela mu minyungwe ya bantu bambi mu mubungano kwambeti bantu babukile Paulo. Balaleta muyeyo ne kutonshanya cebo ca bwendeleshi bwa Paulo. Weco, Paulo ncalalembela kalata yabukalu, kubononesha ngofu sha bwendeleshi bwakendi eti mutumwa wa Yesu Klistu.
Mitwi ya Makani
Paulo latatikinga kalata iyi ne kupa mitende mubungano wa ku Kolinto (1:1-7)
Panyuma pakendi Paulo labeshibishinga sha kushinta bubambe bwa bulwendo,kayi ne sha makani ngwalanyumfwa kulyendido, ne ncebalakumbula kalata yakutanguna (1:8 mpaka 7:16).
Kufumapo Paulo lapanga busele mobelela kubunganyina mali akunyamfwa bashoma baku Yelusalemu (8:1 mpaka 9:15)
Cakupwililisha, Paulo lalicingilishinga cebo cakuba mutumwa kwakendi, kayi ne kubafwakashila (10:1 mpaka 13:10).
1
1 Kalata ilafumunga kuli njame Paulo walasalwa ne Lesa kuba mutumwa wa Klistu Yesu ndi ne mukwetu Timoti,
ndalembelenga ku mubungano wa bantu bashoma Lesa bali mu Kolinto ne kubanse bonse bali mucibela ca Akaya. 2 Inkumbo ne lumuno lwa Lesa Ishetu ne Mwami Yesu Klistu bibe ne njamwe.
Paulo lalumbanyanga Lesa
3 Katumulumbaishani Lesa Baishi Mwami wetu Yesu Klistu Lesa wankumbo, Lesa ukute kutontosha mu nshila iliyonse, 4 ukute kututontosha twaba ne mapensho kwambeti ne njafwe tucikonshe kutontosha banetu bali mu mapensho amushobo uliwonse, pakwinga ne njafwe Lesa latutontoshonga. 5 Nambi tulakumananga ne mapensho angi pacebo ca Klistu, kayi tulatontoshewanga kupitila muli Klistu. 6 Mapensho ngotulakumananga nawo alamupanga katonto kwambeti mupuluke, na afwe katutontoshewa ne njamwe mwela kutontoshewa kwambeti, mucikonshe kwakoma mapensho awo ne njafwe ngotulakumananga nawo. 7 Neco kupembelela kwetu nkotukute muli njamwe nkakulatenkananga sobwe, pakwinga tucisheti mulakumananga ne mapensho akoshana ne ngotulakumananga nawo, ne njamwe ni mukacane kutontoshewa, 8 mobanse bame, tusuni kwambeti mwinshibe lipensho ndyotwalakumana nalyo mu cimpansha ca Asiya lyalikuba linene kayi lyalatulemena cakwinseti twalapwilwa mano. 9 Cakubinga mu myoyo yetu twalikunyumfweti tulatambulu kendi lombolosho lwakufwa. Ici calenshika kwambeti tuleke kulishoma tobene, nsombi kwambeti tushome Lesa uyo ukute kucikonsha kupundusha bafwa. 10 Walatufuna mu mapensho alikuyanda kututwala kulufu, kayi nakatufune, ndashoma kwambeti na tuloshomo nakatufune, 11 mbuli ncomukute kutunyamfwa mu mipailo yenu, neco mipailo yabantu bangi pali njafwe nikakumbulwe ne Lesa, kayi Lesa nakatuleleke. Bantu bangi nibakalumbaishe Lesa.
Paulo labambanga bulwendo
12 Lino pali cintu cilatupanga kulilumbanya tobene pakwinga miyeyo yetu ilatupanga bukamboni bwa kwambeti kulikonse nkotwalapita, makamaka pakati penu, tulenshi bintu byalulama, kayi munshila yashomeka kwelana ne luyando lwa Lesa. Nkatwali kutanguninwa ne mano a muntu sobwe, nsombi lwalikuba luse lwa Lesa. 13 Makalata ngotulamulembelenga nkashupa kwabelenga ne kwanyumfwishisha, nomba ne kukabeco mulanyumfwishishingowa mbasu imo pa bintu mbyotulamulembelenga, 14 nomba ndashoma kwambeti ku masuba akuntangu nimukanyumfwishishe. Pabusuba mbweshakese Mwami wetu Yesu Klistu, mwense nimukalilumbaishe cebo ca njafwe, ne njafwe tukalilumbaishe cebo ca njamwe.
15 Cebo cakushoma kulico, ndayeyanga kwambeti ndimufwakashile nanshi, kwambeti mukapewe colwe mankanda abili. 16 Ndayeyanga kwisa kumufwakashila ndakayanga ku Makedoniya kwambeti, pakufuma uko mukanyamfweko bintu bilayandikinga mu bulwendo bwakame bwa kuya ku Yudeya. 17 Sena mulayeyengeti mpondalikuyeya sha kumufwakashila ndalikuyeyeti mwana wabula mano? sena ndilyeti muntu walisuna pakwinsa bintu, uyo wela kwambeti “Ee” Kayi eti “sobwe” Pacindi cimocimo? 18 Mbuli Lesa ncatabepe bantu, ncendalamulaya nkacalikuba cakusankanya maswi akwambeti “Ee”Nambi “Sobwe.” 19 Pakwinga Klistu Yesu Mwanendi Lesa uyo ngotwalikukambauka ame ndekali Paulo, nambi Sailasi ne Timoti, nkalikuba wakwambeti “Ee” Nambi “Sobwe” Kuli njamwe, nsombi walikuba cindi conse “Ee” Wa Lesa. 20 Nambi malayano a Lesa afula aconi mulyendiye onse akute kuba “Ee” Ecebo cakendi ncotukute kwambileti, “Ameni” Pacindi ncotukute kulumbanya Lesa. 21 Lesa eukute kulengesha kwambeti afwe ne njamwe tube bayuminina nta muli Klistu, kayi ewalatutuma. 22 Ewalatubika cando cakendi cakushomesha, kayi mumoyo wa muntu umo ne umo walatupa Mushimu Uswepa kubeti cishomesho ca bintu byeti bikese.
23 Nomba Lesa ampe cisubulo na ame nkandambanga cancinencine, capesha kwambeti mbule kwisa ku Kolinto nicakwambeti kantakamukansa kayi. 24 Nkatulamukakatishinga bintu mbyomwela kushoma sobwe, pakwinga tucishi kwambeti mukute lushomo lwayuma. Neco njafwe basebenshi banenu pacebo ca kukondwa kwenu.