Mulumbe Waina wa Yesu Klistu walalembwa ne
Mateyo
Busansulushi
Mulumbe Waina walalembwa ne Mateyo ulatwambilinga Mulumbe wakwambeti Yesu eMupulushi Walaiwa kupitila mulyendiye,Lesa walakwanilisha malayano ngwalapangana ne bantu bakendi mucipangano cakaindi.
Uwu Mulumbe ntewo wa bayuda bonka sobwe, mumukowa mwalasemenwa Yesu kayi nekukula, nsombi ni mulumbe wa cishi conse. Libuku lya Mateyo lyabambwa cena, lilatatikinga ne kusemwa kwa Yesu, shalubatisho lwa Yesu, sha masunko a Yesu, incito shakendi shakusengula mu Galileya, kayi ne shakwiyisha. Kufumapo lilambanga sha bulwendo bwakendi bwakufuma mu Galileya kuya ku Yelusalemu, kayi ne byalenshika nsondo imo kunyuma katanapopwa,kayi ne sha kupunduka.
Uwu Mulumbe ulamwambangeti Yesu eshikwiyisha mukulene, ukute bwendeleshi bwakusansulula cena Milawo ya Lesa, kayi ukute kwiyisha cena sha Bwami bwa Lesa. Kwiyisha kwakendi ingatukubunganisha mu mbasu shisanu. 1 Ciyisho capamulundu cilambanga pabwikalo,incito, kayi ne colwe cakuya kwikala mu Bwami bwa Kwilu (5-7). 2 Malailile kuli batumwa likumi ne babili, ne bulwendo bwabo (10). 3 Pa mikoshano ilambanga sha Bwami bwa Kwilu (13). Ciyisho cancinencine ca Ncito ya batumwa, kayi ne ciyisho pamasuba ano akupwililisha amusemano uno, ne kwisa kwa Bwami bwa Lesa (24-25).
Mitwi ya makani
Bamashali bakulukulu ne kusemwa kwa Yesu Klistu (1:1; 2:23).
Incito sha Yohane Mubatishi, 3:1-12.
Lubatisho ne kusunkwa kwa Yesu, 3:13 mpaka 4:11.
Incito sha Yesu mu Galileya, 4:11 mpaka 18:35.
Bulwendo bwa kufuma mu Galileya kuya ku Yelusalemu, 21:1 mpaka 27:66.
Kupunduka ne kubonekela kwa Mwami 28:1-20.
1
Bamashali bakulukulu ba Yesu
(Luka 3:23-38)
1 Uwu e mulongo wa bamashali bakulukulu ba Yesu, mushukulu wa Dafeti, uyo walikuba mushukulu wa Abulahamu.
2 Abulahamu walasema Isake, nendi Isake walasema Yakobo, Nendi Yakobo walasema Yuda ne bakwabo, 3 Yuda walasema Pelesi ne Sela muli Tamala, Pelesi walasema Hesiloni, Nendi Hesiloni walasema Lamu, 4 Lamu walasema Aminadabu, nendi Aminadabu walasema Nasoni, nendi Nasoni walasema Salumoni, 5 Salumoni walasema Bowasi muli Lahabi, nendi Bowasi walasema Obedi muli Lute, nendi Obedi walasema Jesi, 6 Jesi walasema Mwami Dafeti, nendi Dafeti walasema Solomoni mu mukashi walikuba wa Uliya. 7 Solomoni walasema Lehabyamu, nendi Lehabyamu walasema Abiya, nendi Abiya walasema Asa, 8 nendi Asa walasema Yehosafati, nendi Yehosafati walasema Yolamu, nendi Yolamu walasema Usiya, 9 Usiya walasema Yotamu, Nendi Yotamu walasema Ahazi, Nendi Ahazi walasema Hezekiya, 10 nendi Hezekiya walasema Manase, nendi Manase walasema Amoni, nendi Amoni walasema Yosiya, 11 Yosiya walasema Yekoniya ne bakwabo pacindi bana Baisilayeli mpobalikumantwa busha ku Babulo.
12 Baisilayeli mpobalamantwa busha ku Babulo, Yekoniya walasema Salatiyele nendi Salatiyele walasema Zelubabele, 13 nendi Zelubabele walasema Abiyudi, Abiyudi walasema Eliyakimu nendi Eliyakimu walasema Asolo, 14 Asolo walasema Sadoki, nendi Sadoki walasema Akimu, nendi Akimu walasema Eliyudi, 15 Nendi Eliyudi walasema Eliyasala, nendi Eliyasala walasema Matani, Matani walasema Yakobo, 16 Nendi Yakobo walasema Yosefe ibendi Maliya, uyu Maliya e walasema Yesu lakwiwangeti Klistu Mupulushi Walaiwa usa. 17 Neco, kufuma pali Abulahamu kushika pali Mwami Dafeti, palikuba misemano likumi ne ina, kayi kufuma pali Mwami Dafeti kushika pacindi bana ba Isilayeli mpobalamantwa busha kuya ku Babulo, napo palikuba misemano likumi ne ina, kayi kufuma pacindi ca kumantwa busha ku Babulo kushika pacindi ca Klistu, napo palikuba misemano likumi ne ina.
Kusemwa kwa Yesu Klistu
(Luka 2:1-7)
18 Lino kusemwa kwa Yesu Klistu kwalenshika munshila iyi. Pacindi Maliya banyina Yesu mpobalikuba bamamikilwa kuli Yosefe. Nomba kabatana baya kumalili, Maliya walacanika ne libunda kupitila mu ngofu ya Mushimu Uswepa. 19 Yosefe walikuba muntu walulama, nkalayanda kumusebanya pantangalala, walayeya kupwisha bubambo bwa cikwati kwakubula kwishiba bantu. 20 Kaciyeya cakwinsa mungelo wa Mwami Lesa walamubonekela muciloto ne kumwambileti, “Yosefe mwanendi Dafeti kotatina kumumanta Maliya kuba mukashobe, ili libunda ndyakute ni ngofu ya Mushimu Uswepa. 21 Nakatumbuke mwana mutuloba uyo ngoshi mukatumbe lina eti Yesu, pakwinga nakapulushe bantu bakendi ku bwipishi bwabo.”
22 Ibi byalenshika kwalikuba kukwanilisha ncalamba Mwami kumushinshimi kwambeti 23 “Mulindu nakabe ne libunda ne kutumbuka mwana mutuloba uyo eti akakwiweti Emanuele, uku ekwambeti ‘Lesa uli nenjafwe’ ” 24 Yosefe mpwalapunduka walensa ncalamwambila mungelo wa Mwami Lesa, walamumanta Maliya kuba mukashendi. 25 Nomba nikukabeco uliya kuya nendi kumalili sobwe mpaka panyuma pakutumbuka mwana mutuloba. Yosefe walamupa Lina eti Yesu.