Mulumbe Waina wa Yesu Klistu walalembwa ne
Maliko
Busansulushi
Mulumbe Waina walalembwa ne Maliko ni libuku limo pa mabuku ana a Mulumbe Waina a mucipangno ca linolino ayo alambangasha buyumi bwa Yesu Klistu.Alalembwa panyuma pa lufu lwa Yesu Klistu ne Mateyu,Maliko,Luka kayi ne Yohane.Mulumbe Waina walalembwa ne Maliko eufupi pa mabuku ana a Mulumbe Waina.Cikute kuboneketi e libuku lya kutanguna kulembwa pa mabuku aya ana a Mulumbe Waina mu myaka yakwana makumi asanu ne cimo kushika ku makumi asanu ne abili panyuma pa kusemwa kwa Klistu.Bantu bangi bayiya bashometi lyalalembelwa ku Loma,kwambeti ayuminishe Baklistu ba ku Loma.
Maliko uyu weshibikweti Yohane Maliko walendapo pamo ne Mutumwa Paulo ne Banabasi,nsombi impuwo yakendi yalayanda konongeka pacindi ncalabashiya bonka pa bulwendo (Incito 13:13). Kumasuba akuntangu walendapo pamo ne Banabasi (Incito 15:37-39). Maliko walikuba munendi Petulo kwine (1 Pet. 5:13). Nekukabeti Maliko nkalikubapo kamboni wancinencine pa buyumi bwa Yesu; Nomba bantu bangi bayiya bashometi Maliko ewalikulemba bukamboni bwa Petulo buli mulibuku lya Mulumbe Waina walalembwa ne Maliko.Mulumbe Waina uwu,walanga pabeshikwiya ne ciyisho ca Yesu ne cindi ca mapwililisho.
Mitwi ya makani
Maliko latatikinga libuku ili (1:1-13).
Kufumapo lasansululunga incito ya Yesu kacili mucimpansha ca Galileya (1:14 mpaka 8:21).
Cakonkapo lambanga shabulwendo bwa Yesu ku Yelusalemu (8:22 mpaka 10:52).
Maliko lapwishinga kulemba sha Yesu pacindi ncalikuba ku Yelusalemu, ne sha lufu lwa Yesu ne kupunduka kwakendi (11:1 mpaka 16:8).
1
Kukambauka kwa Yohane Mubatishi.
(Mateyo 3:1-12; Luka 3:1-18; Yohane 1:19-28)
1 Ici ecitatiko ca Mulumbe Waina ulambanga sha Yesu Klistu, Mwanendi Lesa. 2 Walatatika mbuli ncewalalembwa mulibuku lya Yesaya mushinshimi, Lesa walambeti,
“Ninkatume mutumwa wakame
pantangu pakobe, uyo eti akabambe nshila yakobe,
3 Pali liswi lya muntu labilikishinga mu cinyika limbangeti,
Bambani mukwakwa mwakupita Mwami,
Lulamikani nshila njoti akapitemo.”
4 Neco, Yohane walashika mucinyika kakambauka nekubatisha bantu. Walambila bantu eti, “Shiyani bwipishi mubatishiwe, kayi Lesa namulekelele bwipishi bwenu.” 5 Neco, bantu bangi bekala mu cimpansha ca Yudeya ne mu Yelusalemu balaya kuli Yohane akunyumfwa. Abo balikulyambilila bwipishi bwabo walababatisha mu mulonga wa Yolodano.
6 Yohane walikufwala mwinjila wa bweya bwa ngamila, kayi ne lamba wa cipaya mubukome. Byakulya byakendi byalikuba bikobo ne bwiki bwamucisuwa. 7 Walikukambauketi, “Panyuma pakame, palesanga ukute ngofu kupita shakame. Ame nkandelela kukotameti nsungulule ntambo sha nkwabilo shakendi. 8 Ame ndamubatishanga ne menshi, nsombi nendi nakamubatishenga ne Mushimu Uswepa.”
Kubatishiwa ne kusunkwa kwa Yesu.
(Mateyo 3:13—4:11; Luka 3:21-22; 4:1-13)
9 Paliya kupita masuba angi, Yesu walafuma ku Nasaleti mucimpansha ca Galileya. Walabatishiwa ne Yohane mu mulonga wa Yolodano. 10 Mpwalikufuma mu menshi, walabona kwilu kwalacaluka, kayi Mushimu Uswepa waleseti nkulimba nekwikala palyendiye. 11 Popelapo palanyumfwika liswi kwilu lyakwambeti,
“Obe njobe Mwaname
ngondayandishisha,
ndakondwa muli njobe.”
12 Popelapo Mushimu Uswepa walapesheti enga mucinyika. 13 Walekalako masuba makumi ana, kasunkwa ne Satana. Walikuba pakati pa banyama, nsombi bangelo balikumunyamfwilisha.
Yesu Lakunga basulishi bana
(Mateyo 4:12-22; Luka 4:14-15; 5:1-11)
14 Pacindi Yohane mpwalabikwa mujele, panyuma pakendi Yesu walaya ku Galileya kuya kukambauka Mulumbe Waina wa Lesa. 15 Walikwambeti, “Cindi cilashiki, Bwami bwa Lesa bulaseng'ene pepi! Kamulapani, kayi kamushomani Mulumbe Waina.” 16 Nomba pacindi ncalikwenda mu mbali mwa lwenje lwa Galileya, walabona Shimoni ne Ndileya pabukwabo, kabawala tombe mulwenje, pakwinga balikuba basulishi banswi. 17 Neco Yesu walabambileti, “Kamunkonkani, ninkamwiyishe kuba basulishi ba bantu.” 18 Popelapo balashiya tombe twabo ne kumukonkela.
19 Kayi mpwalendako pang'ana, walabona Jemusi ne Yohane banabendi Sebedayo, mu bwato kababamba tombe twabo. 20 Naboyo pacindi copeleco Yesu walabakuwa. Balashiya mushali wabo Sebedayo mubwato pamo ne basebenshi, balo balaya pamo ne Yesu.
Muntu wekatwa ne mushimu waipa.
(Luka 4:31-37)
21 Yesu pamo ne beshikwiya bakendi balaya ku Kapelenao, mpobwalashika busuba bwa Sabata bwakupumwina, Yesu walengila mung'anda yakupaililamo ne kutatika kwiyisha. 22 Nomba bantu balamunyumfwa ncalikwiyisha balakankamana, pakwinga nkalikwiyisheti beshikwiyisha ba milawo ya Mose, nsombi nendi walikwiyisha ne ngofu sha bwendeleshi.
23 Pacindi copeleco muntu wekatwa ne mushimu waipa, neye walesa mu ng'anda yakupaililamo, muntuyo walabilikisheti, 24 “Tukute mulandu cini kuli njamwe Yesu wa ku Nasaleti? Sena waleshila kutushina? Ame ndimwinshi, njamwe Waswepa wa Lesa.”
25 Nomba Yesu walaucancilila mushimu waipa ne kuwambileti “Komwena, pula mu muntuyu.”
26 Panyuma pa kumuwishila panshi kanyukuma, mushimu waipa walabilikisha cangofu, ne kufumamo popelapo. 27 Bantu bonse balakankamana ne kutatika kwipushana pa lwabo bene, “Inga ici nicani? Cakubinga ni ciyisho censu cangofu! Ha, lacancililinga ne mishimu yaipa yonse mwangofu, nayo ilamunyumfwilinga!”
28 Neco, impuwo yakendi lwalamwaikila bwangu mu misena yonse ya mu cimpansha ca Galileya.
Yesu lasengulunga bantu bangi
(Mateyo 8:14-17; Luka 4:38-41)
29 Yesu pamo ne beshikwiya bakendi pamo ne Jemusi ne Yohane, mpobalapula mung'anda yakupaililamo, balaya kung'anda ya Shimoni ne Ndileya. 30 Kumakwendi Shimoni batukashi balikuba bona kabanyumfwa mubili kulungula,Yesu mpwalashika mwakufwambana balamwinshibisha. 31 Yesu walaya mpobalikuba bona walabekata kucikasa ne kubapundusha. Popelapo bulwashi bwalapwa, balatatika kubabambila cakulya. 32 Mansailo, lisuba mpolyalebila, bantu balatatika kumuletela Yesu balwashi bonse, ne abo bekatwa ne mishimu yaipa. 33 Bantu bonse bamu munshi balabungana pa lubansa. 34 Yesu walabasengula balikukolwa malwashi apusana pusana, walapulisha mishimu yaipa, kayi nkali kwisuminisha kwambapo, pakwinga yaliku mwinshiba.
Yesu lakambaukunga mu Galileya
(Luka 4:42-44)
35 Kumaca kapacili pashipuluka, Yesu walapunduka mung'anda ne kuya kumusena kwabula bantu nkwalaya kupaila. 36 Nomba Shimoni ne banendi balatatika kumulangaula. 37 Mpobalamucana balambeti “Bantu bonse balamulangaulunga.”
38 Nomba Yesu walabakumbuleti, “Katuyani kumbi ku minshi ili pepi, kwambeti enkambaukeko, pakwinga encondaleshila.” 39 Kayi walaya mu manda abo akupaililamo mu Galileya monse, kaya kukambauka ne kupulisha mishimu yaipa.
Yesu lasengulunga shimankuntu
(Mateyo 8:1-4; Luka 5:12-16)
40 Shimankuntu walesa kuli Yesu ne kumusuntamina ne kumusengeti, “Nakamuyanda, inga munswepesha.”
41 Yesu walepilwa moyo neco, walatandabula cikasa cakendi ne kumwikata ne kumwambileti, “Ee ndayandishishinga, swepesha.” 42 Pacindi copeleco, mankuntu alashimangana, walaswepa. 43 Nomba Yesu walamwambileti enga kwabo, ne kumucenjesheti, 44 “Konyumfwa, kotaya wambile muntu naba umo sobwe, nsombi uye uliboneshe kuli Shimilumbo, ne kubenga milumbo ilayandikinga mu milawo ya Mose pacebo ca kuswepeshewa kwakobe kwambeti kube bukamboni kubantu.”
45 Nomba mpwalafumapo, nendi walatatika kwambila uliyense ne kumwaya makani mumisena ingi, neco Yesu calamwalila kwingila mu minshi mwakubonekela. Nsombi walapitilisha kwikala enka ku musena kwabula bantu. Nikukabeco bantu balikabesa nkwalikuba kufuma mu mbasu shapusana pusana.