1 Managə Jesu ala wala ɓani bam di mwom da, an̰ji swa cwara hara managə ciri də Kapernom bi. Me managə nare ꞌocn̰ dara an̰ji ba yalalə̂ kərə̂ da, 2 nare hara dayar gər̰ə nan̰ kərə̂ me ciri bədə̂ iche me kaw, mana gaba dama yengə daa. Me Jesu waygə gwale gənə̂ Mãr̰ĩ duwa. 3 Mwom da, narje nə̂ ɗang sədə̂gə wodə dəbala gun gə r̰egədəw hara nəm dara gələ̂w gandəw. 4 Me cendi ꞌyo bərmə̂ gaba hara gələ̂w gandəw Jesu di bər̰in̰ bə̂də̂, dara narje di gər̰ə nan̰e. Yande da, cendi nagə daa kulə dəwə̂ me ɓolbə kulə di dəw bam me kal gubu me nol gə aba mwom di gə gəsa duwa gə ꞌya suwar ha asaw nəm Jesu dərə̂wə̂. 5 Mana gə ta-lə̂ da, Jesu di yə̂r nare nə̂ ta di kala day gə dusərə̂gə dəwə̂ mwom da, an̰ji wayəw abe gə r̰egədəw di ba da: «Jan mache, nə̂ biyə̂m acn̰a dəma di bam ɗəm.»* 2.5 Jan mache, nə̂ biyə̂m acn̰a dəma di bam ɗəm.Mana gə ta-lə̂ da, an̰ji ꞌyo labiya bə̂də̂ sən̰. Yarna Markə 2.11-12.

6 Managə narje dwar̰agələ̂ di da, woni gələ̂ bii gə ꞌwoo gənə̂ Moyis duwa kaw dam ilə̂ me. Managə ba gə doy gwale gənə̂ Jesu duwa gə ta di mwom da, cendi ərəmdə gwale dusərə̂gələ̂ me wajə ba da: 7 «Gun gə ka di way gwale ya ba i Mãr̰ĩ de dana mo? An̰ji al i Mãr̰ĩ mə̂ng ta bə̂də̂ mo? Gun mən neyem gaba biyə̂w gə jaw gun acn̰a duwa bam bə̂də̂, i Mãr̰ĩ mən tenene me neyem biyə̂w gun acn̰a duwa bam!» 8 Jesu di da ꞌocn̰ ərmə̂ day di com me waygə ba da: «I dana me anə̂ ərəm ya ta de mo? 9 Wayaw gə gun gə r̰egədəw ‹Nə̂ biyə̂m acn̰a dəma di bam ɗəm›, labaa ‹So daa, me u gəsa dəma daa, ha nəm›, i gwale gə woy me wom nan̰ mo? 10 Laba da, nə̂ ur dara anə̂ ba ꞌwacn̰ana dara əndi gə Gun gorəndəw di, nə̂ i gə dwana də idə biyə̂gə nare nə̂ sən̰a dədə̂ acn̰a day bam di le. Yande da, nə̂ ha ala mani nə̂ anə̂ yə̂rgə ba wom nan̰e di.» Me an̰ji wayəw abe gə r̰egədəw di ba da: 11 «Nə̂ wayəm əndi: So daa, u gəsa dəma daa əsə̂mə̂, me cor ha ulay dəma-lə̂ ɗəm!» 12 Mana gə ta-lə̂ dog, abe gə r̰egədəw di so daa cud nare dərə̂gələ̂, u gəsa duwa me ha yaa nəm ulay. Ər̰ə, narje pad nə̂ yə̂r abe gə r̰egədəw di haralə̂ yaa da, lan̰a algə me cendi ꞌogə Mãr̰ĩ suməw way ba da: «Laba da, də̂ yarang mani nə̂ dii mən kaw də̂ yə̂rgə bə̂də̂ sən̰ di ɗəm. Mãr̰ĩ da, i geche an̰ju ꞌyang!»

13 Targin̰ ɗang da, Jesu cwara hara kuray gə ɓəle gə Galile-yə̂. Nare nə̂ gər̰e hara ꞌyow me an̰ji gəlgə gwale gənə̂ Mãr̰ĩ duwa. 14 Managə an̰ji ilə̂ haralə̂ da, yə̂r Lebi gənə̂ Alpe gorəndəw dam lə̂ mana duwa gaba salaw dole gə geche gə Rom mani-yə̂, me an̰ji wayəw Lebi ba da: «So daa, hare, pam tarən!» Me Lebi so daa me pam tarəw. 15 Targin̰ ɗang Jesu ilə̂ wama mani managə kərə̂ nə̂ Lebi-yə̂, me woni gərsə̂ gwale duwa me nare nə̂ ɗang nan̰ wom gandəw mani mən. I nare woni salaw dole gə geche gə Rom mani me nare nə̂ ɗang woni ala acn̰a me. Cendi pam Jesu gə gər̰ə̂ nan̰. 16 Mwom da, nare nə̂ yab woni gələ̂ bii gə ꞌwoo gənə̂ Moyis duwa ilə̂. Cendi i nare nə̂nə̂ nare nə̂ gə ꞌogəgə Parise. Managə cendi yə̂r Jesu wama gə mani-yə̂ gə nare woni salaw dole gə Rom mani, me nare nə̂ ɗang woni ala acn̰a me da, cendi waygə woni gərsə̂ gwale gənə̂ Jesu duwa ba da: «Aba ciri dan wom gə nare woni salaw dole gə Rom mani me nare woni ala acn̰a nə̂ ɗang mən me, dana mo?» 17 Managə Jesu doy gwale day di mwom da, an̰ji waygə ba da: «Nare nə̂ i mwom bə̂də̂ da, cendi ur dogtə̂r bə̂də̂. I nare nə̂ i mwom me ur dogtə̂r cendi. Əndi da, nə̂ hara ꞌogə i nare nə̂ ꞌocn̰ dara ba gə i woni ala acn̰a. Me nare nə̂ ərəm ba gə i nə̂ təba Mãr̰ĩ dərə̂wə̂ da, nə̂ hara ꞌogəgə i cendi bə̂də̂.»

18 Wala mən, woni gərsə̂ gwale gənə̂ Jã Batis duwa me nare nə̂ gə ꞌogəgə Parise me ilə̂ ꞌwoo asyam-ə̂. Mwom da, nare hara ur Jesu ba da: «Woni gərsə̂ gwale gənə̂ Jã Batis me woni gərsə̂ gwale gənə̂ nare nə̂ Parise day me ilə̂ ꞌwoo asyam-ə̂, me əjəm da, woni gərsə̂ gwale dəma u day bə̂də̂, dana mo?» 19 Mwom da, Jesu cogə lə̂ diyə̂ gə gwale gə diri ba da: «I man me aba ala diyamdrani kwandaw moso ha ꞌwoo asyam managə an̰ji kaw ilə̂ gandagə me mo? Managə an̰ji ilə̂ gandagə sən̰ da, cendi ha ꞌwoo asyam bə̂də̂. 20 Me wala gə ɗang mən haralə̂. Wala gə ta di, gə ha biyə̂ aba diyamdrani hara gandəw. Do me, cendi ha ꞌwoo asyam sən̰.»

21  An̰ji waygə gwale gə diri ɗang ba da: «Gun mən ha ꞌwoo barge gə dərway bəw dara asa gə mabəla managə barge gə mar̰ənge-yə̂ bə̂də̂. Dara barge gə dərway di, ha chawa gə mar̰ənge ɗwaya gə pii di bam. 22 Me gun mən kaw ha bwa gani gə dərway gə ilə̂ sugədə̂-lə̂ managə ɗəjili gə mar̰ənge-yə̂ bə̂də̂ me ca† 2.22 Ɗəjili i gare gə dəlabə gaba bwa gani ya gugələ̂ ta de., dara gani gə ilə̂ sugədə̂-lə̂ di ha chawa ɗəjili gə mar̰ənge di bam bər̰in̰. Gani di me ɗəjili di me ha bwaw i gun di səw. Me ladni duwa da, gə bo gani gə ilə̂ sugədə̂-lə̂ managə ɗəjili gə dərway-ə̂.»

23 Wala mən gə i wala gaba bwa gwayni gənə̂ Juwib day, Jesu day gə nə̂ woni gərsə̂ gwale duwa cilang dage nə̂ geme. Woni gərsə̂ gwale duwa, managə ilə̂ haragələ̂ da, cendi ar geme dəw wom. 24 Ər̰ə, nare nə̂ Parise wayəw Jesu da: «Yə̂r! Woni gərsə̂ gwale dəma ilə̂ ala i na yande mo? I mani nə̂ bii ənda gə ꞌwoo əm bam wala gaba bwa gwayni-yə̂!» 25 Mwom da, Jesu cogə lə̂ diyə̂: «Anə̂ asə mani nə̂ Dabid algə di managə Magtubu dənə̂ Mãr̰ĩ-yə̂ bə̂də̂ mo? Wala mən, an̰ji cherni aləw me, nare duwa nə̂ ilə̂ gandəw kaw, cherni algə me ca. Mani day nə̂ wama ilə̂ bə̂də̂. 26 An̰ji gandə kulə gənə̂ Mãr̰ĩ-yə̂. I aliya gə Abiyatar i geche gənə̂ woni bwasa Mãr̰ĩ day. Dabid wom mapa gə gə chəgədəw Mãr̰ĩ me ꞌyagə nare duwa di me ca.‡ 2.26 Yarna maana dənə̂ Dabid duwa də way dara mapa gə chəgədəw Mãr̰ĩ managə magtubu dənə̂ Samiyel də dii mən 21.1-7. Ɓag da, bii ənda gə ꞌwoo-lə̂ da, i woni bwasa Mãr̰ĩ wom cendi məra. Me Dabid al i acn̰a bə̂də̂.» 27 Me Jesu waygə ɗang ba da: «Mãr̰ĩ al wala gaba bwa gwayni di dara wagə gə nare-yə̂, me an̰ji al wala gaba bwa gwayni di dara ꞌyagə gə nare wamani bə̂də̂. 28 I dara yande me əndi gə Gun gorəndəw di, wala gaba bwa gwayni di kaw, nə̂ i aba ciri duwa əndi.»