8
Isa ti ir sargari juwalkey jineboraa
1 Šennoo kul kaŋ ir gʼa har gaaboo manʼti kala: sargari juwalkey jineboraa woo, nga dumoo bara ir se, a goo ma goro Jerantaa kokoy gorodogoo kabe hennaa ga beenaa ra. 2 A goo ma goy Irkoy hugoo ra, maanaa hukkum cimoo kaŋ ir Koyoo nʼa cin, manʼti boro kʼa cin.
3 Sargari juwalkey jineboro kul mana gorandi kala ka hayey kaŋ nondi nda sargari kaa. Woo maaganda se, ba ir sargari juwalkey jineboraa mo, kala a ma sargari kaa. 4 Nda a gar a mma bara laboo ga, a si tee ba sargari juwalkaw, zama borey goo no kaŋ ga hayey kaŋ nondi kaa ka sawa nda ašariyaa. 5 Goyoo kaŋ sargari juwalkey goo mʼa tee manʼti kala himakasinay nda bii, hayey kaŋ ga teendi beenaa ra no i gʼi guna kʼi tee. Sanda Musa, waatoo kaŋ a goo ma hukkumoo cin, Irkoy nʼa yaamar ka nee: «Hawgay, ma hayaa kul tee ka sawa nda fasaloo kaŋ cebandi ma ne tondi hondoo boŋ.»* 8.5 Fattaroo 25.40. 6 Amma sohõ goy nondi Isa se kaŋ bisa woo, zama nga ti waafakandikaa amaana henna ra kaŋ ga goro allaahidu hennayaŋ ga kaŋ bisa amaana žeenaa waney.
7 Nda a gar amaana jinaa woo nka wasa, ihinkantoo kaayanoo sii nda addalil. 8 Irkoy šelaŋ nga jamaa se ngi laybey ga ka nee i se:
«Nga ne, zaariyaŋ ga kaa, war Koyoo kʼa har,
ay ga amaana taaga zaa
Izirayel hugoo nda Žuda hugoo se.
9 A si tee sanda amaanaa dumoo kaŋ huru agay nda ngi baabey game
waatoo kaŋ ay nʼi dii nda kabey kʼi ka fatta Misira gandaa ra.
I mana amaanaa din dii,
woo maaganda se agay mo nʼi naŋ. War Koyoo kʼa har.
10 Amaanaa kaŋ ay gʼa zaa Izirayel hugu-izey se
zaarey wey banda ga, war Koyoo kʼa har,
ay gʼay ašariyawey daŋ lakkaley ra,
ay gʼi hantum biney mo ga.
Ay ga tee ngi Irkoy,
i ga tee ay jamaa.
11 Boro kul si yee ka nga gandaa boraa
wala nga armaa cawandi ka nee a se: ‹Mʼir Koyoo bay!›
Zama i kul ga kaa kʼay bay,
za ikaccu hala ibeeri.
12 Ay ga ngi goy futawey yaafa i se,
ay si yee ka hongu ngi zunubey.»† 8.8–12 Žeremi 31.31–34.
13 Kaŋ Irkoy nee «amaana taaga»‡ 8.13 Sorro 8to., a nka ijinaa tee ižeena, ka gar haya kaŋ gay, a žen, a ga dere ne nda kayna.