Batagaa kaŋ Pol nʼa sanba Filemoŋ se
Citaaboo fahamandiroo
Filemoŋ manʼti kala boro kayante, šikka sii kaŋ Kolos koyraa Egilizoo boro no. Pol cere no. A goo nda baɲɲa kaŋ maaɲoo ti Onezim, kaŋ na hasaraw tee a se, a zuru. Ir si bay takaa kaŋ nda Pol nda Onezim dii cere, zama Pol sii kala kasaa ra. Onezim naanay Isa, Pol na batagaa woo hantum kʼa sanba Filemoŋ se kʼa wiri a ga a masi Onezim dii koyne sanda baɲɲa, amma a mʼa dii nga armaa Almasihu albarkaa ra.
Pol na Filemoŋ nda borey kaŋ goo Filemoŋ hugoo ra foo, ka albarka daŋ Irkoy se Filemoŋ naanay boryaa maaganda se.
Boro ga dii batagaa woo ra kaŋ Pol si Filemoŋ gaabi, a si hini fur a ga. Amma a mma Filemoŋ hongandi borotaray taagaa kaŋ goo Isa ganakey nda cere game.
1
Boraa kaŋ se batagaa sanbandi maaɲoo
nda fooyanoo kaŋ teendi a se
1 Agay Pol kaŋ ti kasa-ize Almasihu Isa maaganda se, nda ir armaa Timote ka batagaa woo sanba ir baakaa nda ir goykasinaa kaŋ ti ni Filemoŋ se, 2 nda ir woymaa Apiya, nda Aršip kaŋ ti ir hangasinoo tangamyanoo ra, nda Egilizoo kaŋ ga marga ni Filemoŋ hugoo ra. 3 Ir Baaba Irkoy nda ir Koyoo Isa Almasihu anneemaa nda alaafiyaa ma kaa war ga.
Filemoŋ bajoo nda nga naanaa
4 Ay ga albarka daŋ ay Koyoo se, ay ga honga ni waati kul ay ŋaarayrey ra, 5 zama ay maa ni bajoo kaŋ nʼgʼa tee Irkoy boro henanantey kul se nda naanaa kaŋ nʼnʼa daŋ ir Koyoo Isa ra. 6 Ay ga Irkoy ŋaaray naanaa kaŋ ra ir nda ni ga marga ma koy nda jine ka tonton, hala ma gomnoo kul bay kaŋ ir duu a Almasihu ra. 7 Ay duu ɲaali beeri nda binekanay ni bajoo maaganda se, zama agʼarmaa, nʼna Irkoy boro henanantey biney yaynandi.
Pol na sawalyan ceeci Onezim se
8 Woo maaganda se, ba kaŋ Almasihu bande ay goo nda fondo ka ni yaamar ma hayaa tee kaŋ ga hima, 9 amma ay baa yʼa wiri ni ga baji maaganda se. Agay Pol, aru žeena ti agay, koyne mo sohõ ay manʼti kala kasa-ize Almasihu Isa maaganda se. 10 Ay ga ni ŋaaray ay izoo Onezim* 1.10 Onezim maanaa ti «nafante». se kaŋ ay nʼa hay† 1.10 Manʼti a nkʼa hay sanda nga ize gundoo, amma kasaa ra, a nʼa tuubandi. Woo se a ga nee a se «ay izoo». kasaa ra. 11 Waatoo din nafaw kul sii ma ne a ra, amma sohõ, a goo nda ir se nafaw, agay nda ni kul.
12 Ay gʼa yeeti ni ga, nga kaŋ ga hima nda sanda ay jere faa. 13 Ay baa yʼa naŋ ay jere, hala alhaadimaa kaŋ nʼga yadda kʼa tee ya ne, a mʼa tee ya ne ni dogoo ra kasaa kaŋ ra ay goo Alhabar Boryaa maaganda se. 14 Amma ay si baa ay ma haya kul tee bila ni ibaayoo, hala goy hennaa kaŋ nʼgʼa tee masi koy tee gaabi haya, a ma tee haya kaŋ nʼgʼa tee nda ni boŋ.
15 A ga hin ka tee woo maaganda se Onezim dere ni ga alwaati kayna hala ma yee ka duu a, a ma tee ni wane hala abada. 16 Manʼti baɲɲa no koyne, a bisa baɲɲa, ir arma hennaa no. A ga hanse ka kan ya ne, amma a ga hima ka kan ma ne ka bisa agay, manʼti adamizetaray hinne ra, amma sohõ, zama ni armaa no ir Koyoo albarkaa ra.
17 Adiši, nda nʼgʼay dii sanda ni hangasinoo, a dii sanda agay no. 18 Nda a na dori tee ma ne wala nʼga haya may a ga, a daŋ ay jindoo ga. 19 Agay Pol kʼa hantum nda agay hunday kaboo, ay gʼa bana ma ne, ay si baa ya nee ma ne kaŋ ni azzaatoo manʼti kala agay wane. 20 Nhuu agʼarmaa, woo tee ya ne ir Koyoo maaganda se. Ay binoo yaynandi Almasihu albarkaa ra.
21 Ay ga naanay ka bay kaŋ hayaa kaŋ ay nʼa har, nʼgʼa tee, woo se ay hantum ma ne. Ay ga bay kaŋ nʼga haya tee ka bisa woo kaŋ ay nʼa har. 22 Koyne mo ma nongu soolu ya ne, zama ay ga naata kaŋ war ŋaarayrey albarkaa ra ay ga taŋandi ka yee war do.
Fooyan kokorantaa
23 Epafras kaŋ goo ay bande kasaa ra Almasihu Isa maaganda se ga ni foo. 24 Ay goykasinawey Marku, nda Aristark, nda Demas, nda Luka mo ga ni foo. 25 Ir Koyoo Isa Almasihu anneemaa ma bara war lakkaley bande.