1 Taue isa, pannuhu ranie hatae wan sio Yahudiu oamuira Anahatana, Yesus ieu iaiki noi ia mainae isa ne numa. Ia mainae rei mo, ia wain ia onate arihoni akama Yahudi isa. Sio onata wasoni noi rei oasu-asumata Yesus na otarukirai ia-ia. 2 Oyo sira tau ia isa waini ikupu posue ihoka iooi mai Yesus uai anoe. 3 Yesus iasei tau sio matuhete Musa ne maunauna runa sio onata arihoni akama Yahudi. Iahata, “Sani isuisene sio kupua tau ranie hatae wan ita Yahudiu iamuira Anahatana mo, Musa ne maunauna rasopo te tewa?”

4 Ne pusiso oamaturuso man. Reiso Yesus hanai tau ia waini ikupui rei, oyo isuisenei. Isuisenei oyo iaisosiki inuniki.

5 Pusi, oyo iasei tau sio onata rei. Iahata, “Arihoni omi reini pusimo, sani mo hehuke isa te, koropou hatae isa remnahui poe parike anoe tau ranie hatae wan ita Yahudiu iamuira Anahatana mo, ohokai on sin te tewa?”

6 Atinu san rei, pusiso oamaturuso man.

7 Yesus iaiki noi ia mainae ne numa, inoo sio wasoni ohoka na oaiso rei mo, onina na orueso roe uae. Oyo iruni matieue isa osiso. Iahata, 8 “Sani ia isa ioia na ahokaya tau karisaa mausahae mo, pene anina na aruea roe uae. Areimo, pene rotu-tu karisaa upue ioi ia isa waini ia mainae renesi ano oi. 9 Sani ia isa wain ia mainae renesi ihokai, mka ia karisaa upue ieu ikata ia rei noi tanua na iasau ata, ‘Pene anom resaa. Asuka na aruea pani muie kee! Tea mo, ia reini mka iruei mai rei.’ 10 Ne, sani sio umau ooia apusu karisaa mo, eua nina na aru-rue hae muie nea. Na sani karisaa upue inooa mka iasau osia ata, ‘Kakaku, waniku. Mai na aruea mai uae reini nea.’ Areimo, iamuiraya mainae noi sio pusiso. 11 Areimo, tau ia sia man sahoro iuna ruai ia mainae, Anahatana mka iunai ia ikine. Ne ia sia man sahoro iuna ruai ia ikine, mka Anahatana ihitiki iuna ia mainae.”

12 Pusi, oyo Yesus iasau osi karisaa upue. Iahata, “Sani aoi sio umau oai ranie te oai pumono okataya mo, pene aoi me netau. Pene aoi me kaka waniu. Pene aoi sio sui me numa nusue wasoni no kupan kaya man mo, pene. Areimo, tau kani mka ooia honu na aia poe sio no numa reiso asupu sae isa. 13 Ne sani auna karisaa mo, aoi sio mosokinia. Aoi sio wasoni no patana katemaya tewa. Aoi sio wason oeu seu-seu. Aoi sio mata putia. 14 Sio reimo, mka ouni sae isa osia tewa. Tea mo, no sae isa tewa. Ne Anahatana sahoro mka iunre osia na irui iake osia. Mka iunre osia tau orase wani iuna sio wason oamanisa oamahaiso honu.”

15 Yesus waini irue iaiki noi ia mainae isa ne numa. Oyo ia isa iatinu Yesus ianamana rerihoni sio wason oamanisa oamahaiso honu. Iahata, “Anahatana irui iake osi ia wain mka iai nasae ikatai pannuhu irime ne mansiau.”

16 Ne Yesus iruni matieue isa na iatuheteso ata Anahatana ioi sio panesi ouna ne mansiau, ne openeso. Iahata, “Ia isa iuna nasa onate. Oyo ioi sio panesi nai osa. 17 Haineke nanie oaiso, ia rei iaisosi ne manorine na ioi sio wasoni ioiso nea rei. Ioiso iasau ata, ‘Mai na rue roe nea. Tea mo, pusire waron nea.’

18 Ne sana osa-osa oasau ata ohoka iake tewa. Ia waini mataanoe iasau, ‘Pene anom resaa. Tea mo, mato uhane we tuamane mkane. Reiso kahurae ueu unooi ee.’

19 Ia isa honu iasau ata, ‘Pene anom resaa. Tea mo, mato uhane koropou hata nima. Reiso nanie ueu ureare ee.’

20 Ia isa honu iasau ata, ‘Pene anom resaa. Uhoka iake tewa. Tea mo, mato we hutupau pusi.’

21 Pusi oyo, ia manorine rei inuniki poe numa. Oyo iruni pusire osi ia karisaa upue. Iatinu san rei, oyo anoi resaa nai osa. Oyo iaisosi ia manorine rei honu. Iahata, ‘Munata san rei mo, mai na aeua pusu arena onata runa arena kote-kote mai kota reini. Oyo rori sio mosokinia. Rori sio wasoni no patana katemaya tewa. Rori sio mata putia. Rori sio wason oeu seu-seu.’

22 Oyo ia manorine rei iasau ata, ‘Upu, sae wani ano aisosiku runai reimo, unai nea. Ne noo nasae rei mo, wani huie panesi asi!’

23 Oyo ia karisaa upue rei iasau ata, ‘Munata san rei, aeua hokaya arihon kota. Oyo eua pusu arena onata rotu hoka sui arena kote-kote na apamanu ia sia man. Apamanuso na oeu mai oakaponu we numa anoe wani huie asi reini.’ 24 Uasau osimo. Ia sia wain uoiki mataanoe rei nea, ne ihoka tewa mo, mka iai nasae rei tewa oi!”

25 Taue isa Yesus waini ieu ikata sio panesi. Oyo iuni iasau osiso iahata, 26 “Ia sia titue-tue nanie ipusu Au mo, kahurae anoi runa Au renesi inai na amai, sahai, ne hehuka, ne kakau waniu. Erenesi honu mo, kahurae anoi runa Au renesi ruai oi. Sani iuna sani rei tewa mo, mka iuna Au we mampusue tewa. 27 Ia sia wain nanie iuna we mampusue mo, kahurae inoo ruai sani imatai nea. Noo sani ia wain ihana ne hini wan reniene na sio ohunui. Ihana ne hini wan reniene oyo ipusu-pusuku. Ipusu ruai ne maue tewa nea.

28 Reiso, sani nanie opusu Au mo, kahurae orura ia-ia ee. Areimo sani ia isa waini nanie iapuoo ne numa wani ereroke-rokei. Ia reimo, kahurae iruei ireken tau ne numa rei nene hunonie ia-ia ee, samatoro ianei ata kani ai totua pannuhu tau iapuoo numa rotu-tu pusiki te tewa. 29 Pene tu-tu iaunutu hatu tinipae nea, oyo iuna pusi kuai tewa. Mka sio oaumaniki. 30 Mka oasau ata, ‘Masi onoo ee! Ia rei nanie iapuoo numa ne ikua tau iuna pusiki tewa.’

31 Te sani ia aia isa nanie ieu tau manahitane na ia aia tamene. Mka irue irura ia-ia naone ee. Kahurae inoo ata kani ne soratatua nihu hutusa okua onesi no nisau sio nihu hutu ua te tewa tea! 32 Sani munata ianei nea ata ikua tewa, mka iaisosi ne manori sou isa na irori sou karehate. Irori sou karehate na oahita na umau tewa nea. Mka iaisosiki on ne nisau rei waimo hainau asi. 33 Arei iae sani omi oi. Reiso, ia sia arihoni omi reini nanie opusu Au mo, kahurae iarinii pani anoi ia-ia ee. Tea mo, sani ia isa nanie iuna au we mampusue mo, kahurae ieu arihoni ne sae man.

34 Masine mo, iake nai osa tau ereuna muaina ahanare iaka. Ne, sani masine rei masine tewa nea mo, nanie iuna sae tanui asi na masine tewa nea rei? 35 Mka ereuna muaina ahanare iaka tewa nea. Ereuna atuhu nene muaia iae iake tewa nea oi. Reiso nene iake mo, pesiki man. Mka omi san rei oi sani oanori runaku ia-ia tewa.

Ia sia tinai ukuna mo, atinu ia-ia!”