1 ’Mu tu uaꞌñxidhaꞌ ap guñ chujuandam tuk na mu tu juan Eepeso jiñ aꞌmkam ja bui guiꞌ nam tɨ jɨɨgiꞌñ jiñ bui. Jaꞌpnip jaꞌk mi chu daasaꞌ: “Guiꞌ na ja daaꞌ gux xijum gook chiichiaꞌ, na miꞌ ɨrban kɨɨk na paiꞌ xikoolh tuut guiꞌ na bhaan jum tuttu gu kañdhiir nar jix uam totbikdam, nap sap baꞌ miꞌ dhɨr ja aagiꞌñdhaꞌ guiꞌ nam tɨ jɨɨgiꞌñ buiñor, jaꞌpni kaiꞌch: 2 Jix bhaiꞌx maat iñ na pim jax jaꞌk tu dudua aapiꞌm na pim jiñ bui tɨ jɨɨgiꞌñ, gio na pim jɨꞌk tuꞌ jax buaꞌt oipo. Jix maat iñ ɨp na pim puiꞌ na pim jax bax biiñak aañ jiñ bui, sia ku pim bɨxchuꞌ bhaan jum tulhiiñ, gam nam bɨɨx aixim jam tɨtdadaꞌ guiꞌ nam jix buam tomaat. Siax bhaiꞌx maat iñ na pim cham ja kɇkɇɇ guiꞌ nam maakam tu iatgiꞌñ mi jaꞌp oipot puiꞌ xim tɨɨtgɨt nam aañ jir jiñ chujuandam tuk, na pim guꞌ bax maat nam bhaan pɨx tu iatgiꞌñ. 3 Jix maat iñ ɨp nar maaꞌn na pim jax tɨ jɨɨgiꞌñ jiñ bui sia kum giilhim jam tulhiiñchuꞌn gu jaꞌtkam na pim bañ kaichuꞌ. 4 Maaꞌn kap dai cham puiꞌ ka duiñchuꞌ pim nañ jax jix aaꞌ, cham tuꞌ bɨɨx jam jujur kɨꞌn jix biiñak kat tuꞌ kaꞌm kañ ñɨiꞌñ japim, jaꞌp na jax moo janoꞌ na pimɨt jax tɨ jɨɨꞌñ jiñ bui na pim joidham bɨɨx jam jujur kɨꞌn jix biiñak kat. Xib ampɨx puiꞌx oodam tɨ jɨɨgiꞌñ japim jiñ bui. 5 Baꞌ aañ puiꞌ ɨlhiiꞌñ xib na pim gio soiꞌp jum ɨlhdhai miꞌ puiꞌ ba jimiaꞌ na pim jax jaꞌk tuiꞌñgɨt bɨɨpɨꞌ dɨr, na pim joidham tuꞌ kaꞌm nɨidhat miꞌ puiꞌ jiimɨt na jax jix aaꞌ gu Dios. Piam ku pim guꞌ cham pu tu duñiaꞌ nañ jax jam tɨtda, jaꞌk bhɨɨyaꞌ iñ guiꞌ na tu jam bɨꞌñxiꞌñ na pim baꞌx chu maax kɨr jup tuꞌiiꞌ, baꞌ puiꞌx chukgam kɨr ji biꞌyaꞌ pim, nañ guꞌ xiꞌ pɨk cham ka xi ñakgaim na pim jax tu jim. 6 Siamri dho maaꞌn kap miꞌ puiꞌ duiñchuꞌ pim nañ jax ɨlhiiꞌñ aañ, na pim cham ja kaichgɨt puiꞌ jaꞌk jup tu bua nam jax tu jim guiꞌ nam Nikolaitas jum tɨɨtɨꞌ, puiꞌ cham jup ja kɨɨgalhiꞌñ japim na jax aañ. 7 Baꞌ gu jɨꞌk nam kɇɇji miꞌ puiꞌ jimiaꞌ na jax tu aꞌgadaꞌ gux Dhuuduꞌ kam jix Uañ Iiꞌmdaꞌ mu jaꞌp chichiop nam paiꞌm jumpadat tu daan jiñ bui guiꞌ nam bañ kaichuꞌ, ja baidhikaꞌ iñ bhammɨ jaꞌk na paiꞌ joidham jix chu abhaar, na bɨxchuꞌ bha tɨ ɨꞌxchix. Ja chiñiaꞌ iñ baꞌ nam jugiaꞌ gu bhaidhaꞌ na bhaiꞌp kɨɨk nam kɨꞌn gammɨjɨ pu ba duduakaꞌx jɨjɨkgɨm, sia guiꞌ nam nakgair maaꞌn nam jax jix biiñak kaꞌ aañ jiñ bui sia kut jax bɨɨx aixim jix buam jum duukam bhaiꞌ jam daam ji chu jii, nam guꞌ bhammɨ jaꞌk gammɨjɨx jɨjɨkgɨm bap tuiꞌkaꞌ.”

8 ’Mu jaꞌk jap jup tu uaꞌñxidhaꞌ gu jumaiñ chujuandam tuk na mu jaꞌk jup tu juan jiñ aꞌmkam na paiꞌ Esmirna tɨ tɨɨꞌ ja bui guiꞌ nam bañ kaichuꞌ. Jaꞌp jap tɨɨdaꞌ: “Guiꞌ na bɨjɨk dɨr pux jaiꞌch, gio na gammɨjɨ pu bax jaiꞌch kaꞌ yaꞌ dɨr jaꞌp jaꞌk, nat maaꞌnnim duadɨk giop bam mu dɨr koiꞌñgaꞌn tɨr na mɨt tɨi mua, nap sap baꞌ miꞌ dhɨr ja aagiꞌñdhaꞌ guiꞌ nam ba tɨ jɨɨgiꞌñ buiñor, jaꞌpni kaiꞌch: 9 Jix bhaiꞌx maat iñ na pim giilhim bɨxchuꞌ bhaan jum tulhiiñ mi jaꞌp na pim jax tu oiꞌdhaꞌ, gam na pim gampaiꞌ pɨx tuꞌiiꞌ na pim cham jir tu biaꞌ kam. Ku baꞌ guꞌ aapiꞌm cham jax jum aaꞌndaꞌ ji, na guꞌ kam aajim na paiꞌ dhuuk jam aꞌm tu biꞌyaꞌ gu gɇꞌgɇr jup tum duuꞌnkam bhammɨ jaꞌk jix dhaam, sia ku pim guꞌ xib cham tuꞌ biaꞌ. Jix maat iñ ɨp nam xi jam bhaamkidhat giilhim jam aꞌga guiꞌ nam puiꞌm aaꞌ na gɇꞌkam kɨꞌn ja aꞌm tɨ nɨiꞌñ gu Dios, nam guꞌr Judea kam, nam guꞌ paa gi miꞌ puiꞌp jiim na jax jix aaꞌ gu Dios puiꞌ xi kaiꞌchɨt. Na jax jaꞌk jix aaꞌ gu jaꞌook dho gi guꞌ jɇɇꞌ ji, puiꞌ xi chu buim am dho na jax ja tɨɨdaim. 10 Baꞌ aapiꞌm cham tuꞌ bhaan jax jim aagɨt gammɨjɨ muiꞌ xix biiñak kaꞌ buiñor gu Dios. Chaꞌpim jax jum aaꞌndaꞌ sia kut bɨɨx aixim jix buam bhaiꞌ ji chu jam jii. Xi ñakooꞌndaꞌ pim sia noꞌ mɨt bhaiꞌ ji jam tulhiiñchuda gu jaꞌtkam bhaankamuꞌn gu jaꞌook, na guꞌ jax chuꞌm tanoolh puiꞌ jaꞌk ja jurtudaꞌ nam jam tulhiiñchudai jam kuupaꞌ, ku guꞌ dhiꞌ na bhaan pɨx matgilhiaꞌ ji noꞌ pim moox biiñak jiñ bui piam ku guꞌ cham. Gio guꞌ cham tuꞌ muiꞌ tanoolh jum tulhiiñaꞌ pim, mambhɨɨx tanoolh pɨx. Baꞌ noꞌ pimɨt nakoo sia ku pim puꞌñi giilhim jum tulhiiñ, jam makiaꞌ iñ gu gɇꞌgɇr jup tum duuꞌnkam nar jam namkiꞌ kaꞌ. 11 Na guꞌ gu jɨꞌk nam kɇɇji miꞌ puiꞌ jimiaꞌ na jax tu aꞌgadaꞌ gux Dhuuduꞌ kam jix Uañ Iiꞌmdaꞌ mu jaꞌp chichiop nam paiꞌm jumpadat tu daandaꞌ guiꞌ nam bañ kaichuꞌ, cham tuꞌm tulhiiñaꞌ am gatuuk mu nam paiꞌm tulhiiñaꞌ guiꞌ nam cham tuꞌ kaꞌm tɨgiaꞌ gu Dios.”

12 ’Xib jap baꞌ moo mu jaꞌk jup tu uaꞌñxidhaꞌ guñ chujuandam tuk na mu tu juan jiñ aꞌmkam na paiꞌ Peergamo tɨ tɨɨꞌ ja bui guiꞌ nam bañ kaichuꞌ. Jaꞌpnip mi chu daasaꞌ uꞌuan taꞌm: “Jaꞌpni kaiꞌch guiꞌ na chiñiꞌram dɨr busaak gu tɇb kuxiir na bɨxxik dɨr jix muꞌmuk: 13 Jix maat iñ na puiꞌ na pim jax bax biiñak bɨɨx jam jujur kɨꞌn jiñ bui sia ku miꞌ tu daam kɨɨk gu jaꞌook na pim paiꞌ oiꞌdhaꞌ, ni ku pim cham tuꞌ bhaan jax jum aaꞌ sia kut mua gu jaꞌook guñ chujuandam tuk Antiipas na miꞌ puiꞌ jimdat nañ jax jix aaꞌ, na cham aaꞌ na mi jaꞌp tu aꞌgadaꞌ gux bhaiꞌm kaiꞌchdham jiñ ñiꞌook, na guꞌ miꞌ kiaꞌmiꞌñ tɨ ɨlhiiꞌñ na jɨꞌx Peergamo tɨ tɨɨꞌ. 14 Dai maaꞌn kap moo cham jiñ koꞌraar na pim jax jaꞌk duiñchuꞌ, na pim guꞌ jaiꞌ dhɨt puiꞌ jaꞌk tu bua nat jax tu jii bɨjɨk guiꞌ na Balaam tɨɨgich, nax ɨxchuixim aagiꞌñ gu Balak na jax jaꞌk duñiaꞌ nam baꞌm uaꞌtulhdhaꞌ gu Israel kam jaꞌtkam na cham ja kɨɨgalhiꞌñdhaꞌ. Puiꞌ ku mɨt baꞌ saalh puiꞌ mu jaꞌk ji ja bɨɨnat gu miꞌ kam jaꞌtkam na paiꞌ kio gu Balak, jaiꞌp ba tu daandaꞌ am ja bui gu ja didios tuk jup duñiixim, gam nam tu kuaꞌdaꞌ gu koiꞌ nam ja tɨtkiꞌñdhaꞌ gu ja didios tuk, gio baꞌ nam jix bhaiꞌ ja tɨtdat ja bɨɨm boppodaꞌ gu miꞌ kam uꞌuub. Ku baꞌ guꞌ gu Balaam ji nat tuꞌm daꞌp duu. 15 Gio jaiꞌ dhɨt dhiꞌ nam jiñ bui tɨ jɨɨgiꞌñ nam puiꞌ jaꞌk pɨx iam jup tu daaꞌñchuꞌ nam jax tu jim guiꞌ nam Nikolaitas jum tɨɨtɨꞌ. Dhiꞌjani bhaan jañ baꞌ puiꞌ kaiꞌch na pim cham tuꞌ bɨɨx puiꞌ tu kuugalhdhim nañ jax jix aaꞌ. 16 Baꞌ aañ puiꞌ ɨlhiiꞌñ na pim siamri soiꞌm ɨlhdhai miꞌ puiꞌ xi jimɨi nañ jax jix aaꞌ, jaꞌp japim xi dhui na pim jax jaꞌk tu jim xib. Piam ku guꞌ cham, mu jimɨiñ jam tulhiiñchudaꞌ jam bɨndai dhiꞌ nam Nikolaitas jum tɨɨtɨꞌ. Jaꞌp ji buusniaꞌ nañ jam koodaꞌ kɨꞌn dhi tɇb jiñ kuxiir nañ chiñ am dɨr busaak. 17 Jaꞌpni ku pim baꞌ siamri miꞌ puiꞌ xi jimɨi nañ jax jam tɨtda, na guꞌ noꞌ pimɨt moo miꞌ puiꞌ xi jii nañ jax jix aaꞌ cham tuꞌ bhaan jax jim aagɨt sia ku pimɨt bɨxchuꞌ bhaan bhaiꞌ jim tulhii, aañ bhammɨ jaꞌk jam aichdhaix dhaam jam makiaꞌ gux kɨɨꞌ koiꞌ na manaa jum tɨɨtɨꞌ na pim kɨꞌn gammɨjɨx jɨjɨkgɨm bap tuiꞌkaꞌ. Gio baꞌ moo gu aꞌlhich koꞌkmarak joodai sopkoñxim ɨp na joidham jix chooto na bhaan mi uaꞌñixchuꞌndaꞌ na pim jax jaꞌk ba tɨɨꞌkaꞌ miꞌ dhɨr jaꞌp jaꞌk. Cham jaroiꞌ mat kaꞌ, dai aapiꞌm dɨɨlh. Gu baꞌ noꞌ jaroiꞌ maadɨt jix kaim gu ñioꞌkiꞌñ gu Dios, bɨɨx juraaꞌn kɨꞌn xi kɇɇkɇꞌ na jax tu aꞌgadaꞌ gux Dhuuduꞌ kam jix Uañ Iiꞌmdaꞌ mu jaꞌp chichiop nam paiꞌm jumpadat tu daandaꞌ guiꞌ nam jiñ bui tɨ jɨɨgiꞌñ.”

18 ’Xib jap baꞌ moo mu jaꞌk jup tu ja uaꞌñxidhaꞌ gu Tiatira oiꞌñkam nam jiñ bui tɨ jɨɨgiꞌñ, buiñor guñ chujuandam tuk na miꞌ tu juan ja bui, na baꞌ miꞌ dhɨr ja aagiꞌñdhaꞌ. Jaꞌpnip jaꞌk mu tu uaꞌñxidhaꞌ: “Jaꞌpni kaiꞌch guiꞌ na gɇꞌgɇr mɨmɨim gu buupuiꞌñ, gio baꞌ gu tootnaꞌn nax mɨmɨim jaꞌp na jax gu baiñum toiñdhichdhix kam: 19 Jix bhaiꞌx maat iñ na pim jax jaꞌk tu dudua miꞌ na pim paiꞌ oiꞌdhaꞌ. Jix maat iñ ɨp na pim joidham bɨɨx jam jujur kɨꞌn tuꞌ kaꞌm nɨidhat jix biiñak aañ jiñ bui, gam na pim joidham jix ja joiꞌndat jix bhaiꞌ ja buaꞌt ja palhbuiꞌñ gu jaiꞌ kɨꞌn gu tuꞌ na ja aꞌm jum aaꞌ. Gio xib joidham bax chu joiꞌgɨꞌn japim, cham tuꞌ puiꞌ na bɨɨpɨꞌ dɨr. 20 Guꞌ ji na guꞌ cham jiñ koꞌraar na pim jaiꞌ dhɨt puiꞌ jaꞌk jup tu daaꞌñchuꞌ na jax tu jimdat bɨjɨk gu ubii na Jesabeel tɨɨgich, puiꞌ kaiꞌchdhaꞌ pim na pim Dios bhaankamuꞌn tu aꞌgadaꞌ jaꞌp na jax kaiꞌchdhaꞌ guiꞌ. Paa gip jir sɨlhkam, pu cham tuꞌ kaꞌm nɨiꞌñ japim gu Dios puiꞌ xi kaiꞌchɨt. Tɨɨꞌ na pim jaiꞌx bhaiꞌ ja tɨtdat ja bɨɨm boppo gu uꞌuub, gam na pim tu kuaꞌ gu koiꞌ na tɨkdhix kat gu didios jup duñiixim, puiꞌ ɨp na jax jaꞌk tu buadaꞌ bɨjɨk gu Jesabeel. Dhiꞌjani bhaan jañ baꞌ cham tuꞌx bhaiꞌñ chaat jam bui. 21 Bɨɨx guiꞌ nam puꞌñi jaꞌk tu jam aꞌgiꞌñdhaꞌ na jax tu jimdat gu Jesabeel, tɨix ja joiꞌndat ja nɨɨrkaꞌ iñ nam soiꞌm ɨlhdhai miꞌ puiꞌ ba jimiaꞌ gɨt na jax jix aaꞌ gu Dios, bɨɨx sia aapiꞌm na pim jɨꞌk puiꞌ jaꞌk ba tu jim. Guꞌ ji na pim guꞌ cham tuꞌ soiꞌ xim ɨlhdhak buiñor gu Dios, puiꞌ na pim jax bam uaꞌtulhiꞌñ, na pim jaiꞌx bhaiꞌ ja tɨtdat ja bɨɨm boppo gu uꞌuub, gam na pim tu daan ja bui gu didios jup duñiixim. 22 Baꞌ gu xib na tuꞌ jax tuiꞌkaꞌ, jam tulhiiñchudaꞌ iñ koꞌkdaiꞌ kɨꞌn, cham jax bua sia pimɨt jaiꞌ dhɨt ma koi noꞌ pimɨt cham nakoo. Baꞌ noꞌ pim guꞌ sia cham soiꞌm ɨꞌlhiꞌñ buiñor gu Dios, dho gi baꞌ guꞌx ioꞌm ba jam tulhiiñchudaꞌñ ji, noꞌ guꞌr maaꞌn na pim jax puiꞌ jaꞌk tu jim nat jax chu jii gu ubii na Jesabeel tɨɨgich, 23 nam baꞌ dhiꞌ bhaan jix chotdon kaꞌ bɨɨx nam jɨꞌk jiñ bui tɨ jɨɨgiꞌñ nam muiꞌ kap jum jumpadat tu daan, na guꞌ puꞌñi jaꞌk jup tu ja jimiaꞌ noꞌm jaiꞌ puiꞌ jaꞌk jup tu jim. Gio nam baꞌx mat kaꞌ nañ aañ bɨɨx jix mat kaꞌ nam jɨꞌk jax jum aaꞌndaꞌ gu jaꞌtkam, gam nam jax tu buadaꞌ, gio nam tuꞌ jax jix dhuñiik kaꞌ. Baꞌ bhaan jup ba machiaꞌ am ɨp nañ aañ tu maak na jax jaꞌk ja aꞌm bipioꞌdaꞌ guiꞌ nam puꞌñi tuꞌ pɨx ɨlhdhat cham tuꞌ kaꞌm nɨiꞌñdhaꞌ gu Dios. 24 Guꞌ baꞌ aapiꞌm na pim jɨꞌk cham puiꞌ jaꞌk tu jim na jax tu jimdat gu Jesabeel, cham jañ jam tulhiiñchudaꞌ, na pim guꞌ cham tuꞌ puiꞌ jaꞌk jup tu bua na jax tu buaꞌt guiꞌ, na guꞌ dhiꞌ baꞌ bhaan bax maatɨꞌ kaꞌ gɨt na pim puiꞌp kaichuꞌ gu jaꞌook na jax guiꞌ. 25 Dai nañ jam guguuxiꞌñ na pim cham mɨk buppat gammɨjɨ tɨ jɨɨgiꞌñdhaꞌ aañ jiñ bui janoꞌ juugɨt nañ paiꞌ dhuuk gio bhaiꞌp jimdaꞌ. 26 Gio noꞌ pimɨt miꞌ puiꞌ jii nañ jɨꞌk jax jix aaꞌ, gam noꞌ pim pu gammɨjɨx biiñak jiñ bui sia kut tuꞌx buam jum duukam bhaiꞌ jam daam ji jii, gɇꞌgɇrkam kɨꞌn jam darsaꞌ iñ ja bui bɨɨx gu jaꞌtkam na pim ja sɨlhkaꞌndaꞌ, 27 jaꞌp na jax aañ nat gɇꞌkam kɨꞌn jiñ dhai guñ Gɨꞌkoraꞌ bɨɨx kap na jɨꞌx oiꞌñgaꞌn. Aapiꞌm puꞌñi ɨp gatuuk, jɨꞌmaꞌn japim ja daadaꞌ kaꞌ gu bapaiñum oꞌxia, aapiꞌm baꞌ ja aagiꞌñdhaꞌ bɨɨx gu jaꞌtkam na mɨt tuꞌ bhaan cham am bua nam duduakat ja tutkuꞌ bhaan, baꞌ jaꞌp ji buusniaꞌ na pim ja jaisaꞌ kɨꞌn gu jam oꞌxia jaꞌp na bhiꞌñ jajaꞌ. 28 Gio baꞌ puꞌñi jaꞌk tuꞌm kɨꞌn jam darsaꞌ iñ na jax gu gɇꞌ chiꞌɨɨꞌ na katukgab bha tɨssaꞌn. 29 Gu baꞌ gu jaroiꞌ noꞌ tuꞌ sɨlhkam jix maachim gu ñioꞌkiꞌñ gu Dios, jum aaꞌ na bɨɨx juraaꞌn kɨꞌn xi kɇɇkɇꞌ na jax tu aꞌga gux Dhuuduꞌ kam jix Uañ Iiꞌmdaꞌ mu jaꞌp chichiop nam paiꞌm jumpaꞌn guiꞌ nam bañ kaichuꞌ.”