1 Baꞌ mɨkkat maaꞌn mɨjɨ dɨr ba ji buus suudaiꞌ ɨraab guiꞌ nar nobiiꞌñ gu jaꞌook, puiꞌ ɨɨbhidham tuꞌm jup tu tuukuꞌ, xijum gook jup tu moom, mambhɨɨx baꞌ tu aꞌaaꞌ. Baꞌ bɨɨx jɨꞌmaꞌn kaꞌm gu aꞌgaꞌn ja tuttutuꞌ gu kukrun, bha moomoram baꞌ muiꞌ bha uaꞌñixchuꞌ gu ñiiñioꞌk na jax jaꞌk cham kɨɨꞌ kaꞌm nɨiꞌñ gu Dios. 2 Gu tukgaꞌn guiꞌ jɨꞌ nobiiꞌñ gu jaꞌook nat mɨjɨ dɨr ji buus suudaiꞌ ɨraab, jaꞌp tuꞌm na dɨꞌnbalh, gu tootnaꞌn baꞌ jaꞌp tuꞌm ɨp na gu booji gu tootnaꞌn, gu chiñiiꞌñ baꞌ jaꞌp tuꞌm na gu mabiiꞌñ gu chiñiiꞌñ. Guꞌ baꞌ gu jaꞌook guiꞌ na jaꞌp tuꞌm jup tu tuukuꞌ na gu tɨrook, gɇꞌkam kɨꞌn ba dai guiꞌ jɨꞌ nat mɨjɨ dɨr buus suudaiꞌ ɨraab nar nobiiꞌñ, na sap baꞌ jaꞌxbuiꞌp bar gɇꞌkam kaꞌ na dɨɨlh, gam na bɨxchuꞌx aichuꞌn na pu tu duñiaꞌ. 3 Guꞌ ji na guꞌ panaas jaꞌp tuꞌiiꞌ na maaꞌn muukixchuꞌ gu maꞌooꞌn guiꞌ jɨꞌ nobiiꞌñ gu jaꞌook, panaas kux ioꞌm jix koꞌktolhdhix, cham jɨꞌxdhaꞌ ka dodhiaꞌ kam tuꞌiiꞌ, guꞌ ji nat guꞌ miꞌ jotmodaꞌ bhaiꞌ ji dhua cham jum ɨlhdham. Baꞌ bɨɨx gu jaꞌtkam na jɨꞌx oiꞌñgaꞌn na mɨt tɨɨ nat ba dua gu maꞌooꞌn guiꞌ nar nobiiꞌñ gu jaꞌook, joidham jix bhaiꞌm ɨlhdhak mu jaꞌk ji kai mɨt. 4 Baꞌ dai nam ba tu daandaꞌ buiñor gu jaꞌook guiꞌ na jaꞌp tuꞌm tu tuukuꞌ na gu tɨrook dai na gɇꞌ, nam guꞌ bɨɨx ba kaichuꞌ guiꞌ na miaꞌn jir nobiiꞌñ nat pu pu kaiꞌñkam gɇꞌkam kɨꞌn dai na baꞌ puꞌñi ja iatgidhai bɨɨx gu jaꞌtkam ja chiñiaꞌ nam tu dañiaꞌ buiñor. Tu daandaꞌ am baꞌ gu jaꞌtkam buiñor gu jaꞌook gio buiñor gu nobiiꞌñ jup xi kaiꞌchɨt:

―¡Jaꞌp moo tuꞌ sɨlhkam jir gɇꞌkam ji dhiꞌ nach jaroiꞌ kaichgɨt ba tu daan buiñor! Cham jɨꞌxdhaꞌ jaroiꞌ jax dhoodaꞌ sia pɨk jax kaꞌ gɨt, na guꞌ cham tuꞌ jumaip jaiꞌch na jaꞌxbuiꞌp jir gɇꞌkam na dhiꞌ.

5 Baꞌ guiꞌ jɨꞌ nar nobiiꞌñ gu jaꞌook jup ja tɨtda bɨɨx gu jaꞌtkam na sap dhiꞌr diꞌ gu Dios, na guꞌ puꞌñi jaꞌk aagiꞌñ dɨɨlh gu jaꞌook. Baꞌ bɨɨx ja daam kɨɨkat gu jaꞌtkam na jɨꞌx oiꞌñgaꞌn baik oidhaꞌ daman taak juugɨt. Jup tɨtda ɨp gu jaꞌook na sap bɨɨx aixim aiꞌchuxdhaꞌ gu Dios na jax cham kɨɨꞌ kaꞌm nɨiꞌñ. 6 Baꞌ puiꞌp duu gu nobiiꞌñ gu jaꞌook nat jax chia, jix bhaamut bhaiꞌ ji aꞌga gu Dios, bɨɨx aixim ba aiꞌchuxiꞌñ na jax cham kɨɨꞌ kaꞌm nɨiꞌñ ja bɨndat sia gu noonbiꞌñ nam bhammɨ jaꞌp jup tuꞌiiꞌx dhaam. 7 Gio baꞌ nat bhaiꞌ ji ja tulhiiñchuda guiꞌ nam jɨꞌk tɨ jɨɨgiꞌñ buiñor guch Xoiꞌkam, nat guꞌ sia dhiꞌ puꞌñi jaꞌk chia gu jaꞌook na tu duñiaꞌ. Baꞌ jɨꞌkchi ja koi nam jɨꞌk kaichgɨt gu Dios, na guꞌx aaꞌ nam dai guiꞌ kaichgɨdaꞌ. Bɨɨx ja daam kɨɨkaꞌ na jɨꞌk jaꞌtkam, sia nam jir pa jaꞌk kam, piam siam jaiꞌ maakam tu ñiok. 8 Baꞌ bɨɨx kap na jɨꞌx oiꞌñgaꞌn gu jaꞌtkam ba tu daan am buiñor gu nobiiꞌñ gu jaꞌook nat jɨꞌk pu cham ja dai gu Dios jix ioꞌm bɨjɨk dɨr na baꞌ moo dhi oiꞌñgaꞌn jup ba jaiꞌchdhɨlhiaꞌ, bhaan gu uꞌuan nam paiꞌ daaxix nam jɨꞌk bhammɨ aayaꞌx dhaam, nam paiꞌ gammɨjɨx jɨjɨkgɨm bap tuiꞌkaꞌ, na paiꞌ ja daasaim xib guiꞌ na jaꞌp ji buusan na gux kɨɨꞌ kasnir nam jɨꞌk tɨ jɨɨꞌñdhim buiñor.

9 Gu jaroiꞌ noꞌx aaꞌ na bɨɨx jix mat kaꞌ gu ñioꞌkiꞌñ gu Dios, jum aaꞌ na bɨɨx moꞌram baapsaꞌ miꞌ na paiꞌ jaꞌpnim kaiꞌch: 10 “Bɨɨx guiꞌ nam jɨꞌk daaxix nam ja daꞌngɨi ja kuupaꞌ, puiꞌ ja doodaꞌ am, gio guiꞌ nam jɨꞌk jup daaxix nam tɇꞌtɇb kukxir kɨꞌn ja koodaꞌ, puiꞌm jup ja doodaꞌ, ba aagix am nam jaroiꞌ puiꞌ ja doodaꞌ. Dhiꞌ baꞌ bhaan matgilhiaꞌ na jaroiꞌ moo tuꞌ sɨlhkam bɨɨx juraaꞌn kɨꞌn jix biiñak buiñor gu Dios, noꞌm moo puiꞌ nam jax bax biiñak buiñor siam jax ja bua.”

11 Baꞌ jaꞌxpɨx jumai jaꞌp dɨr jaꞌk dɨbɨɨr bɨtaꞌ bhaiꞌp ji buus gu nobiiꞌñ gu jaꞌook na puiꞌ ɨɨbhidham tuꞌm ɨp gu tukgaꞌn, gook tu aꞌaaꞌ jaꞌp tuꞌm na gu kasnir gu aꞌgaꞌn, puiꞌ jaꞌk tu ñiok na dɨɨlh gu jaꞌook na jaꞌp tuꞌm tu tuukuꞌ na gu tɨrook. 12 Jaꞌxbuiꞌ gɇꞌkam kɨꞌn jup daaxix na gu jumai nobiiꞌñ gu jaꞌook nax xijum gook tu moom. Bɨɨx kap ja daam jup ba kɨɨk gu jaꞌtkam na jɨꞌx oiꞌñgaꞌn, ja chia nam sap tu daandaꞌ buiñor gu jumai nobiiꞌñ gu jaꞌook nax xijum gook tu moom, guiꞌ nat kiaꞌpɨx dua gu maꞌooꞌn na ka muukix kat maaꞌn, sia ku guꞌ cham jɨꞌxdhaꞌ ka dodhiaꞌ kam tuꞌt. 13 Gio na joidham jix bhaiꞌm duukam xip tu bua ja nɨiꞌñchudat bɨɨx na jɨꞌk jaꞌtkam, tai bhammɨ dɨr jaꞌp jix dhaam bhaiꞌ ji iiꞌñxichuꞌn. 14 Baꞌ na mɨt tɨɨ bɨɨx gu jaꞌtkam na jɨꞌx oiꞌñgaꞌn na joidham bɨxchuꞌx aichuꞌn na pu tu duñiaꞌ nam tuꞌ cham ɨlhiiꞌñ, bɨɨx jix bhaiꞌm ɨlhdhak mu jaꞌk jup ji kai mɨt, nat guꞌ dhiꞌ kɨꞌn ba ja iatgi. Baꞌ miꞌ dhɨr dai nat ba ja chia nam sap jup duñiaꞌ guiꞌ na puiꞌp tuꞌm kaꞌ na gu jumai nobiiꞌñ gu jaꞌook nax xijum gook tu moom, guiꞌ na mɨt tɨi sɨi tɇb kuxiir kɨꞌn, guꞌ ji nat guꞌ cham tuꞌ muu. 15 Baꞌ na mɨt paiꞌ dhuuk tɨɨmo na mɨt jup duu, gu nobiiꞌñ gu jaꞌook guiꞌ nat tu chia nam jup duñiaꞌ, xi dhuaꞌñ gup duñiixim na sap baꞌ dɨɨlh ba tu oirɨdaꞌ gio na tu ñiokdaꞌ. Ja chia baꞌ bɨɨx gu jaꞌtkam nam sap tuꞌ kaꞌm nɨidhat tu daandaꞌ buiñor gup duñiixim. Baꞌ guiꞌ nam jɨꞌk cham aaꞌ nam tu dañiaꞌ buiñor, pu bɨɨx ja koi. 16 Gio nat ja chia nam sap jum matgilhdhaꞌ bɨɨx na jɨꞌk jaꞌtkam ja kokobtaiꞌ am piam gu kɨɨꞌn dɨr kam ja noonob am, na bhaan jix maatɨꞌ kaꞌ nam buiñor jup tuiꞌdhiꞌ gu jaꞌook. Bɨɨx jamɨt baꞌm matgilh gu jaꞌtkam na jɨꞌx oiꞌñgaꞌn, puiꞌ na jax guiꞌ nam jir jix chutumñigam gio guiꞌ na cham, sia guiꞌ nam jir tujuandam gio guiꞌ na jɨꞌk cham, gam bɨɨx gu aꞌaalh nam kiaꞌpɨx maaxilhim, gio guiꞌ nam jix ioꞌm bar jagɨꞌgɨr. 17 Baꞌ pu cham bhaaiꞌ nam tu sabaꞌdaꞌ gio nam tu gaꞌraꞌ guiꞌ nam jɨꞌk cham bha daaxdhix ja kokobtaiꞌ am guiꞌ na bhaan jix maatɨꞌ nam buiñor jup tuiꞌdhiꞌ gu jaꞌook piam na jɨꞌk jaꞌkɨlhiꞌñ biaꞌ, nam guꞌ ja oꞌbhagiꞌñ. 18 Yaꞌ baꞌ moox ioꞌm matdaꞌ jum aaꞌ gio na pim jix bhaiꞌ xim gaꞌngadaꞌ na pim baꞌ machiaꞌ na jax chɨɨꞌ guiꞌ na ɨɨbhidham tuꞌm bhaan dhiꞌñi jaꞌkɨlhiꞌñ na yaꞌni daa: Xijum maaꞌn jix chaꞌtmam ooꞌm daman baik ooꞌm xijum maaꞌn (666). Dhiꞌ pim baꞌ bhaan machiaꞌ. Ku guꞌ na jax chɨɨꞌkaꞌ, jir pu chuꞌm kaꞌ ji nam jax chɨɨꞌ gu ya jaꞌp kam jaꞌtkam.