Ⅰ A sɔ̃ɔ 'lɔ na dɔ̃ɔ po, Nãaŋmɩn tun a wʊ 'yɛ'yɛrbɛ sɛ̃ na wʊ 'yɛr 'yɛr dẽdẽme kʊ a sɩ sãamɩne sɔɩ yɔɔ jaa pɔ, Ⅱ tɩchɛ a ber baaraa anyã 'lɔ, wʊ 'yɛr 'yɛr kʊ sɩ tun a wʊ Bie wʊn ir ka wʊn ɩ a bonsɩ a jaa bʊ̃dire. 'Lɔ 'yɔ̃ɔ lɛ wʊ mɩ dɔ̃ɔ tu maal a wɛr wʊ jaa. Ⅲ A Bie lɛ ɩ a Nãaŋmɩn tɩɩr chãa, na wʊ kaara a Nãaŋmɩn kaar jaa chɔ̃, ka a wʊ 'yɛr na tara kpɛ̃ɔ lɛ wʊ tɩɛn a bonsɩ a jaa taalɛ. A lɛ wʊn wa pɛɛ a yelbier baar, wʊ don tɩ jãnɛ a Tɩɩr Sʊɔ nũsʊ̃ɔ jie be a saaju. Ⅳ Lɛ lɛ wʊ pãa gar a malakasɩ ba jaa, ka a yuor 'lɔ wʊn nyɛ, mɩ gar a ba bon.

Ⅴ Bojũu Nãaŋmɩn ba dɔ̃ɔ 'yɛr kʊ a malaka ãsʊɔ jaa ɩka, “Fʊ ɩn a n Bie, dɩna n lɩɛb a fʊ Sãa”, (Yiel Gãn 2:7) bɩɩ 'yɛr go ɩka, “Ɩn ɩ naa a wʊ Sãa, ka wʊ mɩ ɩ a n Bie”? (2 Samuwɛl 7:14) Ⅵ A nɩ mɩ go, a lɛ wʊn waara nɩ a wʊ Bidadɔ̃ɔ ka a wɛr pɔ, wʊ 'yɛr naa, “Vɛ̃ ka a Nãaŋmɩn malakasɩ ba jaa gbur dumo puor wʊ.” (Mosesɩ Gãma Na Tu Anũu 32:43) Ⅶ A malakasɩ 'lɔ, nɩtɔ̃ lɛ a Nãaŋmɩn gãn 'yɛr a ba 'yɛr, “Nãaŋmɩn maal a malakasɩ sɛsɛbɛ kaar. Ba ɩn a wʊ tʊ̃tʊ̃nbɔ kaara fɩka bũu 'lɩraa kaar.” (Yiel Gãn 104:4)

Ⅷ Tɩchɛ, nɩtɔ̃ lɛ a Nãaŋmɩn gãn mɩ 'yɛr a Bie 'yɛr, “Nãaŋmɩn, a fʊ nãalʊ̃ʊ na ben be bɩbir nɩ bɩbir jaa, ka a torfʊ ɩ a fʊ nãalʊ̃ʊ dãgbal. Ⅸ Fʊ nʊ̃n torfʊ tɩ na fʊ 'laar putuyele. A lɛ jũu, Nãaŋmɩn na ɩ a fʊ Nãaŋmɩn, 'mɔɔ fʊ naa ka fʊ do gar a fʊ taaba ba jaa, a lɛ wʊn pʊr a pʊpɛl kãa 'yɔ̃ɔ fʊ.” (Yiel Gãn 45:6, 7) Ⅹ A Nãaŋmɩn gãn lɛ 'yɛr naa, “A pielfʊ daar a fʊ̃ʊ Soro, fʊ̃ʊ lɛ kpar a tẽe par, ka a saaju wʊ jaa ɩ a fʊ nuur tʊ̃mɔ̃. Ⅺ A jaa na wa sɔ̃ɔ naa, tɩchɛ ka fʊ̃ʊ 'lɔ be be, a jaa na wa koraa naa chɩɛr fɔbaa kaar. Ⅻ Fʊn pilãa naa fɩka fuu, naa lɩɛb fɔɔr kaar. Tɩchɛ ka a fʊ̃ʊ 'lɔ chɛnɛ a lɛ nɛ, ka a fʊ yuomo ba tara baarfʊ ɛ.” (Yiel Gãn 102:25-27)

ⅩⅢ Malaka buor sʊɔ lɛ a Nãaŋmɩn dɔ̃ɔ wa 'yɛr kʊ ɩka, “Jãnɛ a n nũsʊ̃ɔ jie, ka n wa de a fʊ dɔ̃dẽme ka ba ɩ a fʊ gbɛɛ dɔɔlfʊ jie”? (Yiel Gãn 110:1) ⅩⅣ A ba ɩ a malakasɩ ba jaa ɩ naa a sɩtʊ̃nsɩ a Nãaŋmɩn na ma ir tʊ̃, ka ba wa sʊ̃nɔ̃ a bala na nyɛ a faafʊ ɛ?