Ebaruwa eya okuwiri eya Paulo yajojera
AWATHESALONIIKA
Amangʼana ku owuimpi
Ebaruwa eya okuwiri eya Paulo yajojera awa ekaniisa eya Thesaloniika yalonda ebaruwa eyasooka ampi, owukasuga emienzi mukaaga. (Warrako owutanikro owua 1 Awathesaloniika.) Kuwonekana mbwe ebaruwa eyasooka ngekatunzia Awathesaloniika, aeniki waawa na amiiga aga okuwona Yesu aa ngawaagalanga okukola ekintu-ukintu ni waingirizia mbwe okuuza okwa Yesu kumiire okutuuka. Kutio, Paulo yawajojera na awagaania ku amaingirizio agafwana gatio.
Awathesaloniika wandi waaingirizianga mbwe okuirania okwa Yesu kwawanga ni kumiire okuikola, na awandi woona waawona mbwe wuri ampi ino, kutio kiwulao ekigera ni wakakola emirimo-umirimo. Kutio, Paulo awalaga mu ebaruwa eya okuwiri eno mbwe, okuirana okwa *Kristo ni kutuukre ampi, owuoni wuuza okuisonga ku ekialo kandi omuntu olwania Kristo aaza okureeta erioga. Awalaga mbwe ewintu ewio wikiari okuikola, ni wiesa okuikola enyinga-unyinga.
Paulo a-ambia Awathesaloniika amaani na awalaga mbwe waimerre wukalu ku okuganya kwawu, kukawa mbwe wawona eminyako-nyaako kandi warindirre okuwona ewintu wino, owutuuko ni wukiari. Walagwa mbwe wasugaane wagie emberi ni wakola emirimo giawu, kandi wakalawane okukola geeza.
1
Amakeezio agasookere
1 Ku awantu awari no kuganya ku Katonda Soifu no *Omwami Yesu *Kristo awari Thesaloniika, mbajojera ebaruwa eno inze Paulo ni ndi alala ni Siila ni Timotheeo. 1Thes 1:1 2 Tusawa mbwe muwe no owusiza no owuolu owuema ku Katonda Soifu no Omwami Yesu Kristo.
Paulo asangaala na Awathesaloniika kandi awa-ambia amaani
3 Waamwifu, kuri kulootu ni tuiranizia Katonda otioo enyinga ziona ku inywe; kuwuene tusugaane tukole tutio aeniki okuganya kwinyu ku Katonda kukoma ni kugia emberi kandi olugonzi lwinyu mwona ku awiina wiinyu lwona lugia emberi okuiongerezia. 4 Olutuunyo olwa mumiire okuwa nalwo no okuganya kwinyu okutadenga-denga ku eminyako-nyaako ne emidambo egia muwitamo no owusiani, kugera ni tuitumbula na amiina giinyu ku amakaniisa aga Katonda gandi. Filiip 2:16; 1Thes 3:3 5 Kuwuene wino ne ewilago ewilagana mbwe Katonda akenga ekiina owuigoloole kandi wiiza okugera muwalwe ki awantu awasugaane okuwa mu *Owuami owua Katonda, owua mwona mumiire okuwa ni munyaka-nyaakra. Filiip 1:28 6 Kuwuene, Katonda ari omuigolovu kandi okwo kulagana mbwe awantu woona awatureetra emidambo ku okuganya kwifu, aaza akuwaoloola na awa-aa emidambo. Awaru 12:19; Owus 18:6 7 Ni ifwe alala ni inywe awawona eminyako-nyaako aaza okutuwuluusia olwa Omwami Yesu arisasulwa na aema ku igulu na ari alala ne *enyankoi waae awari na amaani. Math 25:31; 1Thes 4:16–17 8 Awantu awataeere Katonda owuti alala na awataeere amangʼana amalootu aga Katonda ku Omwami Yesu owuti, wariswawuka mu omurro oguakaka. Awaru 2:8 9 Awantu wano wariwona eminyako-nyaako egiriwamala egitariwua kandi wariteewua ale na asi aa Omwami ari, kandi na aa owunene owua amaani gaae gari. 10 Gano gari-ikola *Owuire owua Omwami ari-irana okueewua owunene na awalowole waae kandi na agingiriziiwue kungulu agati ya awantu awamuganyireko alala ni inywe aeniki mwona mwaganya ku amangʼana aga twawalaga. 11 Gano nigo amangʼana agagera ni tuwasawira enyinga ziona mbwe Katonda awate muwe awantu awasugre no okuetwa okwa awantu waae kandi mbwe atuusie okuagala kwinyu okulootu ne ewintu ewilootu ewia okuganya kwinyu kuagala mbwe mukole. 12 Ni kuweere kutio eriina eria Omwami iifu Yesu rirituukra owunene okuwaemako kandi mwona murituukra owunene okumuemako nikulondokana no owusiza owua Katonda no Omwami Yesu Kristo.