1 Ema zo meni “Yesu nu Kristo” asinoise tuma diamunoya nu ami Anutura nana ena kei awenua asamunowa awa. Zo nu Mamere dubara dumi pamunoya ami da ago awiso nusore pamunoya awa. 2 Nakai Anutura mai awisore dubara dumi pupinowenikaita tepo ni? Awa Anuture dubara dumi pupinoise potai ge nuso awa dimanakai ami kerenamunoya. 3 Anuture dubara dumi pumai amira susu awa ego ewa. Nakai potai ge nuso dipinoise nuanekai. Potai ge nuso awa mou tepo awa. 4 Anutura mai awiso dapikarago ami zebura tani puro osisinowera. Putou nemi zebura tani puro osisinowi? Tuma diai nasokaira putou meni zebura tani puro osisinowia.

5 Ai meni putoure wero zebura tani dapikarago puro osamunoi? Zo nu “Yesu awa Anutura Mai” ago toise tuma diamunoya ami ago wamunoya awa. 6 Yesu Kristo nu ou gutaire orara ni pasinaira tetaire dai kei awenua awa. Oure gege kota, oure orarare dai kei awenua awa. Ozana meni Yesura susu kerenitinowia. Nera kota, Ozana nu ge me susure amira mama. 7-8 Are nena etorobara — Ozana ata ou ata orara — ami poti dara niro susu daimata ei awa kerenitinowera: Yesu nu Anutura Mai. 9 Ema meni poti dara niro sawera gawenakai me inowia awa. Are Anutu meni ge nuso soga wawi me gege inowia awa. Ge me nuso meni eramara ge me dainitinowia. Are nu ge me toise Mai nusora susu poti damu ninua. 10 Zo nu Anutura Mai tuma diamunoya amira nana dubara Anutura ge me itamunoya. Zo nu ge Anutu meni Mai nuso soga inoise senua awa gai me amu wamunoya ami Anuture opi sai ema asamunoya. 11 Susu kereninua awa ego ine itia. Anutu nu nuai me ewanana namorekai potinua. Nuai me ewananara mama awa Mai nuso. 12 Are zo nu Mai nusore dara tairo nuamunoya ami nuai me ewanana pumamunoya. Ota zo nu Anutura Maire dara kaka tayamu wamunoya ami nuai me ewanana oko pumamunoya.

13 Nikare Anutura Mai tuma didinowewa ami ego ninawise sero ge ei awa gainona awa: Nikare nuai me ewanana puro nowewa. Awa gawise sero gainona. 14 Nakai ego gosinowenakai: Nakai Anutura ara tamai awa tamuro amire begomo samunonakai, awa nu ninamunoya. Are begomo samu sero azu inoise kota, zewai wero nuso nana tupewenakai.

15 Nena zota zo emo begomo sanakai ninamunoya, awa gosinowenakai. Are nena emo nu begomo towenakai awa potitinowia, awa dai gosinowenakai. 16 Zo nu otao nuso meni pasina wai gamunoya, pasina awa so wayara bayai amira kota, pasina peu zo wai giro nu emo begomo saise. Begomo sai Anutu meni nuai otao nusore potamunoya. Pasina so wayara gegenai amire kota, pasina peure tona. Pasina mou- mau so wayara gegenai awa itia. Pasina ago ine emo begomo sawise oko tona. 17 Nuai waya dapikarago awa pasina gege. Ota pasina eni awa so wayara gegenai oko inoya.

18 Nakai ego gosinowenakai: Anutura nana ena kei awai meni pasina oko inowera. Anutura Mai meni gosinoise dia inowia, are pasinara mama meni nukare waya wai ine oko itia.

19 Nakai ego gosinowenakai: Nakai Anutura nana ena kei awai, ata Tuara ge tepo nowera nukare awa pasinara mama amira putoura nowera.

20 Nakai ego gosinowenakai: Anutura Mai meni osero kotumai namorekai potinua, are nakai Anutu me giro baititinowenakai. Nakai Anutura Mai Yesu Kristo amire dai nowenakai, are nakai Anutu me amire dai nowenakai. Nu awa Anutu me. Nu nuai me ewananara mama awa. 21 Mai awiso naso, tua opi sai ami emo uma wewo.