E Yoanes Ka Hor To A Korlotge Orom To Tittiegom
O Rhek Ruk Ktar Kam Keknen Mang E Yoanes Ka Hor To A Korlotge Orom To Tittiegom
E Yoanes to tittiegom a knovvur to korlolo orom, her endo kat arhe tittiegom ka hor to enda kat. Tittiegom ngang e Yoanes kaela to ka munik te, e Gaius. E Gaius nma nho mang e Yesus ka ngaomevek langto.
Va a mhel langto ta vle kun mnam e Yesus ka ngaomevek to endo, ka munik e Diotrepes. En nma grung orom e Yoanes ka munik, nang kle mrua hover en mruo. Va nma hagam o mia kmel ngaekmol ekam e Yoanes klenar ruk nma meng ngar ngok mar kam kol ka gu.
E Yoanes tittiek ngang e Gaius kam kanprim en mang ka ngaeha ko nam smia nho mang e Yesus ka ngaomevek. Nang ta kle kaittiek kat kam psom e Diotrepes mang ka kerkeknen to kam hak kim o mia enang tok.
E Yoanes thavaeng e Gaius te, en ner mia pis kam ptang endruk ngat kor mnam mar mang e Yesus he kmokpom kar kmenserpagam mar va kam mrua palsie kim e Diotrepes ko kim kalo keik mruo.
1
E Yoanes Tkaen Ka Mamrung Ngang E Gaius
1 Vae, a hor ta tottek ekam dok to a hipun to koma nho mang E Nut kakro ngaomevek.
Gaius, yindo im kor mnam in mang o rhek ruk o minar mang e Yesus, kua kambis to yin, kom kaelongtok mang in.
2 Kua kambis to yin, yindo kom kaelongtok mang in, kom kaurur kim E Nut mang in te, en kmeharom yin he ila ngorsang kam gia vle lya, nop o vrong yayor kam pis kim in, kmikkiem gi enang ko kua mnor mang in tete te, ila vrek tkaisis kngae ka ngmeang hak. 3 Ii, ko her kol a re mang in, ko vgum ngoornopeik akuruk ko ngat pis mo kmok he khavaeng dok te, im her sim kut ikkiem o rhek ruk o minar mang e Yesus he kle kaikkiem mar tete vop. Ko her kol a re to endo mang in tok, va ko ngae sei kam sirei hak. 4 Ii, a sirei to mang yindo koma kvam yin te, kolyie, te sei kam hover dok hak, ko ko her kol a re mang yin enang tok. Nang nong a papat tang hak to tis kam hover a sirei kun mnam dok enang endo koma kol mkor endruk koma kvam mar te, koles e.
5 Kua kambis to yin, yindo kom kaelongtok mang in, yin a mhel to ima venu kam sim ktua ring ya mang ngoornopeik akuruk ngam kaol kpis ko tok kmeha orom E Nut karo reha. Ii, si mar ngma vle ngang in te, mar o gunmia, vanangko ima vle sim ktua ring ya mang ngar ge. 6 He E Nut ka ngaomevek to moti, ngot her kol a re to mang ila keknen to kmelongtok mang ngar enang tok. Ii, tmi kut ya hak yin kmel ngaro nharok ma mmie ko ngam re kar ko va ngaelaut ka gu kam ngae. Ii, ngiak kaeharom tok ngang ngar kngae ge, gi enangthe mup kaeharom ngang E Nut msim tok kat. 7 Ii, ko o mia ruk endruk tok, ngta kpom E Nut karo reha kmelha kpolger o rhek ruk mang e Yesus kun pgegom o tamatan. Nang ngat lua tting mang o tamatan ruk endruk kam tar mar orom o tgoluk akor e. Nop hak. 8 He ekam tok, her mor mruo ruk ngot kor mnam mor mang e Yesus he kmokpom kar, ngruak kol a ngaeha to endo kuon mang ngor kam kle smia tar ngoornopeik ruk enang ngar arhe, he nang mor kam kaum kar mar he kturang ngar enang tok pum a ngaeha to kam polger o rhek ruk o minar mang e Yesus.
O Rhek Ruk Mang E Diotrepes
9 Mare. Ko her ittiegom kuaro rhek akuruk kun mnam kua hor langto yok ngang nguk ruk E Nut ka ngaomevek to ko tok. Vanangko la mur hover to e Diotrepes, endo nama sovet kam kansgum en mruo kam mur kaelel en mruo kam ktong E Nut kles ruk muk ko tok, ta kle va lo kael dok mang kuaro rhek ruk endruk e. Nove. Ta kle va krere kim mar ha. 10 He ekam tok, Gaius, mnam a kolkha to ngua pis ko kmin ko tok, va ngor kle kpalsie kim e Diotrepes kmel en ma mmok ko pum o mia ngaro kerok kam mon karo kerkeknen ruk nam kaeharom mar. Endruk ko nam kaelha krere kim dok kmegom kam kering dok hak, va endo kam havae ko kim o mia kngae mang dok kat. Ii, nam kaeharom tok, nang lo kais kam rum ka svil ko e. Nove! Nam kle va klikim ngoornopeik ruk o gunmia kat, endruk ngma pis orom E Nut karo reha ko tok kat. Va nama hagam akuruk mnam muk ngta svil kmel ngaekmol ekam mar ko ngak pis ko kmar kat. He endruk ngama kokheng e Diotrepes he lua ngan vgum, nang kle kael ngaekmol ekam ngoornopeik ruk endruk, e Diotrepes mruo nama pepet mar kun mnam e Yesus ka ngaomevek to ko tok, mar kam lo kta kaum ktotu pum E Nut kar mar kat e.
11 Kua kambis to yin, yindo kom kaelongtok mang in, ngiak or kam kolkol ekam o kerkeknen ruk endri e. Ngia kle gi kael ilalo keik mang o keknen ruk lyar. Ii, ani mhel to tgi kael kalo keik mang o keknen ruk lyar, her endo ta mrua khenam en mruo ma mmok te, tpal mnam E Nut ka ngausie ka pun. Vanang ani mhel to nam kaeharom o kerkeknen, a mhel to endo ta kle mrua khenam en mruo ma mmok kat te, en nam lua vokom E Nut orom karo keknen e. Nove. 12 Vanangko ngua mhel langto yok e Dimitrias, o mia tgus ngma gu ya pum en orom ngaro rhek ruk o minar. Va dok mruo kat, koma gu ya pum tok kat. Va muta mnor mang kuaro rhek kat te, mar o minar kat.
13 Ii, kua svil kam hoger o rhek kngae kngae mang o papat kavurgem vop, vanangko klua svil kmittiek mo mnam kua hor to enda orom a ye to kmittiek orom e. 14 Ko ko gia nho mkor E Nut te, ngor kle va mur kaol kam ptang nguk, yek kam mi vokom muk kam mia rere kar muk mang o papat ruk endri.
Yu! Koma ngarkie mang in ngang E Nut, he nang En kmeharom ila vrek kmongeik. Va ilenar ruk moti ngat kaen ngaro mamrung ngang in. Va ngiak mon kola langto langto ka munik kmen ko tang ngang langto langto ko tok kat.