1 आपोल्‍लोस मोपा शेंना शेंन गाक्‍शा, कोरिन्‍थ सहरमी जाक्‍दीम्‍माक्‍त। पावल चहिं एफिससमी जाक्‍दीम्‍माक्‍त। मिनु प्रभु आ लां खोइक्‍ब आन कली ग्रुमा बाक्‍त। 2 मिनु पावलमी मेको आन कली “गेपुकीमी थमा सुइक्‍ब दुम्‍नीनु, परमप्रभु यावे आ सोक्‍तीम प्रिंचा पुंइसीनी?” दे हिल्‍लो पवानु “ममाइ, गो परमप्रभु यावे आ सोक्‍त मतुइक्‍नीकी। मेको आ पर्बम मनेंशो यो बाक्‍नीक” देंमा बाक्‍त। प्रेरित २:३८ 3 मिनु पावलमी “मो हना सु आ नेंमी ब्‍वाक्‍कुम ख्रुम्‍शा ग्रुंइचा पुंइसीनी?” दे हिल्‍लो पवानु “यूहन्‍नामी देंशो टिशा, ब्‍वाक्‍कुमी ख्रुम्‍शा ग्रुंइचा पुंइसाक्‍क” देंमा बाक्‍त। 4 मिनु पावलमी “यूहन्‍नामी मुर आन कली ‘पाप पचा प्रोंइशा इन थुं परमप्रभु यावे गे लेत्‍तीने। मिनु आं नोले जाक्‍ब कली थमा सुतीने’ दे ब्‍वाक्‍कुम ख्रुम्‍शा ग्रुंइदीमी बाक्‍त। यूहन्‍ना आ नोले जाक्‍शो चहिं येसु बाक्‍ब” दे शेंदीमी बाक्‍त। मत्ती ३:११ 5 पावल आ लोव़ नेंशा, मेकोपुकीमी “लो दुम्‍ब” दे येसु आ नेंमी ब्‍वाक्‍कुमी ख्रुम्‍शा ग्रुंइचा पुंइसमा बाक्‍त। 6 मिनु पावलमी आ गुइ आन पिया तारी वोदानु, परमप्रभु यावे आ सोक्‍तीम ब्रीमा बाक्‍त। मिनु आन मतुइश्‍शो लोव़ पा प्रभु कली ठेयब सेल्‍मे बाक्‍त। मिनु परमप्रभु यावे आ सोक्‍तीम गेशो लोव़ पामे बाक्‍त। प्रेरित ८:१७; प्रेरित १०:४४,४६ 7 मोदेंशो दुम्‍शोपुकी १२ जना खोइ बाक्‍मा बाक्‍त।

8 मिनु पावल महिना सां सम्‍म यहूदी ग्रुम्‍तीक खिंमी परमप्रभु यावे आ राज्‍य ङा लोव़ शेंना शेंन बाक्‍माक्‍त। सुइ तशा महिंथु, ठेयब थुं पा “थमा सुइश्‍शा परमप्रभु यावे आ राज्‍य ओव़ङीन” दे शेंना शेंन बाक्‍माक्‍त। 9 मिनु आ लोव़ नेंबपुकीमी थमा मसुइक्‍थु, नक लां आ पर्बम ग्रुम्‍तीक खिंमी शुक्‍शी लोव़ पतीके मेको मेकेर शेंचा प्रोना बाक्‍त। मिनु शेंसीचा दाक्‍ब आन कली चहिं काथा लाइश्‍शा, टिरान्‍नस आ इस्‍कुलमी नेंचा दाक्‍ब आन कली खुप्‍शा, नाक्‍त किंत किंत शेंना शेंन बाक्‍माक्‍त। 10 मिनु बर्स निक्‍शी सम्‍म मोपा शेंना शेंन बाक्‍माक्‍त। मोपतीके एसीया ङा यहूदी नु ग्रीक नेल्‍लेमी परमप्रभु यावे आ लोव़ नेंचा तामे बाक्‍त।

11 मिनु परमप्रभु यावेमी शुश छक लाक्‍चा ङा गेय पावल आ गुइ रे पा कोंइदा बाक्‍त। प्रेरित १४:३; २कोरिन्‍थी १२:१२ 12 मुरपुकीमी आन फेक्‍शो वा, रूमाल लाइश्‍शा, पावल कली थीबाक्‍मा बाक्‍त। मिनु लेश्‍शा चाक्‍शा रोइ पाइब आन कली थीपदमेनु, साबाक्‍मा बाक्‍त। वोलमी तशो आन वोल ग्रूशा प्रोक्‍बाक्‍मा बाक्‍त। प्रेरित ५:१५ 13 मिनु वोल आन कली खेरशा गाक्‍ब यहूदी का निक्‍शीमी पावल आ तस खोइश्‍शा, प्रभु येसु आ नें थिशा, वोल ग्रुंइशा खेरचा गोव़मे बाक्‍त। मेकोपुकीमी “पावलमी शेंशो येसु आ नेंमी ग्रूङो” दे वोल आन कली खेरचा बोल पाइबाक्‍मा बाक्‍त। लूका ९:४९ 14 यहूदी ङा ठेयब चढ़ेब स्‍केवा माइश्‍शो मुर आ ७ जना तौपुकीमी मोदेंशो पाइबाक्‍मा बाक्‍त। 15 मिनु काबु वोलमी मेको आन कली “येसु कली तुइक्‍नुङ। पावल कली यो तुइक्‍नुङ, गेपुकी चहिं सु ननी?” देंमाक्‍त। 16 मिनु वोलम थिशो मुरुमी प्रेक्‍शा, ग्राम्‍शा, ग्‍याइश्‍शा खोल्‍शा तुप्‍स ङा तुप्‍स पा हुश चुइश्‍शा, मेको आन वा खाक्‍शा, शिश्रा सेल्‍मी बाक्‍त। मिनु नेल्‍ल प्रोक्‍मा बाक्‍त। 17 मेको लोव़ तेइ तेइ ब्रशा, एफिससमी बाक्‍ब यहूदी नु ग्रीक नेल्‍लेमी नेन्‍मे बाक्‍त। मिनु “येसु आ नेंमी हेंथे मब्‍वाक्‍चा बाक्‍माक्‍त” दे रुप्‍शा हिंशा, प्रभु येसु आ नें कली मान पा ठेयब सेल्‍मे बाक्‍त। 18 मिनु येसु कली थमा सुइक्‍चा क्‍येङा ङोंइती आन मन्‍तर तन्‍तर पशो आ पर्बम “मुल ङा मेरे मपाइनीकी” दे थमा सुइक्‍ब नेल्‍ल आन कली नेंपदमे बाक्‍त। 19 मिनु शुश मन्‍तर तन्‍तर पाइब आन मन्‍तर तन्‍तर ङा किताब चाक्‍शा, मेको मुर आन ङोंइती चोव़मे बाक्‍त। मेको किताब कली ५० हजार चांदी के द्राकमे थाप्‍शो बाक्‍माक्‍त। द्राकमे का देनार यो देंशो बाक्‍त। मेको नाक्‍त का ङा गाल्‍च चांदी के क्‍येट बाक्‍ब।

20 मिनु परमप्रभु यावे आ लोव़ तेइ तेइ ब्रशा सक्ति पाइश्‍शो दुम्‍शा बारना बारन लमाक्‍त। प्रेरित १२:२४ 21 मेको नोले पावलमी “गो मासीडोनीया नु आकाया लां पा यरूसलेममी जाक्‍दीत्‍नुङ। मेकेर काबु निक्‍बु बाक्‍शा, रोम सहर मजाक्‍दीत्‍थु मप्रोंइनुङ” दे थुं पवा बाक्‍त। प्रेरित २३:११ 22 मोदेंशो थुं पशा, तिमोथी नु इरास्‍तस आस कली मासीडोनीया सोइक्‍तीम्‍सी बाक्‍त। आं चहिं एसीया उइ बाक्‍माक्‍त। २तिमोथी ४:२०

23 एफिससमी बाक्‍मेनु, मार दुम्‍माक्‍त देंशा हना, प्रभु आ नक लां खोइक्‍चा आ पर्बम राम्‍शी पोक्‍चा गोव़मे बाक्‍त। २कोरिन्‍थी १:८-९ 24 मारदे हना देमेत्रीयस माइश्‍शो सुन चांदी चेम्‍ब मुर कामी सुन के आरतेमीस देवी आ मूर्ति सेल्‍शा लेयशा, शुश क्‍येट चेम्‍‍बाक्‍माक्‍त। मूर्ति चेम्‍ब शुश बाक्‍मा बाक्‍त। मेकोमी शुश मुर आन कली गेय गेशो बाक्‍माक्‍त। आरतेमीस लतीन लोव़मी दिआना बाक्‍‍ब। 25 मिनु काबु मेको आन कली ब्रेश्‍शा, खुप्‍शा “आं वारचपुकी, आं लोव़ का निक्‍शी नेनीने। मूर्ति चेम्‍शा लेयशा क्‍येट चेम्‍शो नय, दे गो नेल्‍लेमी तुइक्‍नय। 26 मुल चहिं एको पावल नें पाइश्‍शो मुरुमी एसीया नेल्‍ल हिरने थुम्‍शा, इं एफिससमी जाक्‍शा, मुर नेल्‍ल आन कली ‘मुर आन गुइ रे सेल्‍शो मूर्ति देवी ममाइ’ देंशा शुश मुर आन थुंमी मूर्ति पूजा पचा प्रोंइपाइक्‍तीमी। मेको इं मिक्‍चीम ताइतय। 27 मोदेंशो दुम्‍शा, इं गेय ला जाम्‍शो ममाइ, इं मानेशो आरतेमीस ठेयब देवी आ मन्‍दीर आ नें यो जाम्‍शा लचा चिक्‍ताक्‍व। मुरपुकीमी मेको कली सेउ पचा प्रोंइचाम्‍तेक्‍मे। साइ एसीयामी बाक्‍ब नेल्‍लेमी ठेयब सेल्‍शा, मान पना पन बाक्‍शो नमी, मुल मारेइ मान मलीब” दे आन थुं खुरपाइक्‍मी बाक्‍त। 28 मिनु मेकोपुकीमी “इं एफिसस ङा आरतेमीस देवी नेल्‍ल क्‍येङा ठेयब देवी बाक्‍ब” दे शुश रेयके पचा गोव़मे बाक्‍त। 29 मिनु मोदेंशो पा सहर नेल्‍ल ठेयब रेय‍के दुम्‍माक्‍त। मुरपुकी दोरशा जाक्‍शा, सहर ङा दिंममी खुम्‍समा बाक्‍त। मासीडोनीया रे जाक्‍शो पावल नु काथा गाक्‍ब गायस नु अरीस्‍तारकस आस कली ग्‍याइश्‍शा, मेको दिंममी चाक्‍ग्‍मे बाक्‍त। प्रेरित २०:४ 30 मिनु पावलमी मोदेंशो दुम्‍शो तशा, गो यो देल्‍तीकेमी लाइनुङ देंमेनु, थमा सुइक्‍बपुकीमी लचा मगेमे बाक्‍त। 31 एसीया रागी ङा सरकार आ गेय पाइब ङोंइती ङा आ वारचपुकीमी यो “मेक लचा मदुम्‍ब, है” दे लोव़ नेंपाइक्‍थ मुर सोइक्‍तमे बाक्‍त। 32 दिंममी देल्‍शोपुकीमी कामी लोव़ का, अर्कोमी अर्को लोव़ पा रेयके ला पामे बाक्‍त। तन्‍न मारदे देल्‍शो, मारदे रेयके पशो, मेको लोव़ हुलपुकीमी मारेइ मतुइक्‍तमे बाक्‍त। 33 मिनु यहूदीपुकीमी पोक्‍शो अलेकजन्‍डर कली हुल आन ङोंइती राप्‍पाइश्‍शा “लो, लोव़ पावो” दे मदमेनु, मेकोमी आ गुइ हिम्‍शा “सिक्‍सी पा आं लोव़ नेनीने, नेल्‍ल रुप्‍पाइक्‍नन्‍नी” देंमाक्‍त। 34 तन्‍न आ लोव़ पशो रे “एको यहूदी कका बाक्‍माक्‍त” दे तुइश्‍शा “इं एफिसस ङा आरतेमीस देवी नेल्‍ल क्‍येङा ठेयब देवी बाक्‍ब, जाइ आरतेमीस, जाइ आरतेमीस” दे घन्‍टा निक्‍शी सम्‍म रेयके पस ङा पस ग्रीमे बाक्‍त।

35 मिनु नोले सहर ङा ठेयब मुरुमी मेको आन कली रेयके पचा नाइक्‍पाइक्‍मी बाक्‍त। मिनु “इं एफिसीपुकी, आं लोव़ नेनीने। इं एफिसस सहरमी बाक्‍ब आरतेमीस देवी आ मन्‍दीर, आ नें यो नेल्‍ल क्‍येङा ठेयब बाक्‍ब, दे मुर नेल्‍लेमी ममिम्‍नीमी ङा? सरीङ रे दोक्‍शो मूर्ति कली मान पा ठेयब मसेल्‍नीमी ङा? 36 रागी रागीम बाक्‍ब मुर नेल्‍लेमी मानेशा ठेयब सेल्‍नीमी। मिनु गेपुकीमी मार रेयके पनी? मोदेंशो रेयके पचा मदुम्‍ब। 37 गेपुकीमी ग्‍याइश्‍शा चाक्‍शो मुर निक्‍शीमी आरतेमीस देवी आ मन्‍दीर आ नें मक्‍याम्‍देस, देवी कली शुक्‍शी लोव़ यो मपाम्‍स, मारेइ मरिम्‍शो मपाम्‍स। 38 देमेत्रीयस नु आ वारचपुकीमी सुइ कली मुददा पचा थुं पाम्‍तेक्‍म हना, निसाफ पाइब आ ङोंइती लशा, उजुर पचा माल्‍शो। निसाफ पाइब आ ङोंइती चाक्‍शा, दोस ग्रुंइचा माल्‍शो। 39 निसाफ पाइबमी गारपाइक्‍ने मचाप्‍तु हना, गो सहर ङा ठेयब जोक्‍ब तुइक्‍ब नेल्‍ल बुक्‍शा, लोव़ पा गेनीकी। 40 तन्‍न मुलाक्‍ती खोदेंशो रेयके पचा मदुम्‍ब। मोदेंशो पाइतय हना, गो नेल्‍ल मरिम्‍शो पा दोसी दुम्‍नय, दे रुपीने। मारदे हना एको रेयके मारदे दुम्‍मे, मेको देंने मचाप्‍नय” दे माइक्‍मी बाक्‍त। 41 मो देंने थुम्‍शा, मुर आन कली आन खिं खिं सोइक्‍तीमी बाक्‍त।