22
पावलमी सांकछी गेशो
1 मिनु पावलमी हिब्रू लोव़ पा “आं आफ नु लोक्बपुकी, लोव़ का निक्शी नेनीने” देंमेनु, मेकोपुकी थम सिक्सी पा नोफा दाइश्शा बाक्मा बाक्त। 2 मारदे हना पावलमी हिब्रू लोव़ पवानु, मेकोपुकी क्येङा सिक्सी पामे बाक्त। प्रेरित २१:४० 3 मिनु मेकोमी “गो सिलीसीया ङा टारसस सहरमी जरमेशो यहूदी नङ। आल रे इं यरूसलेममी बाक्शो नङ। आं कली शेंब गमालीएल बाक्ब। मेको ठेयब शेंबमी आं कली इं किकी पिपी आन अरेशो लोव़ नेल्ल शेंताक्यी। मिनु गो मेको नेल्ल पना पन बाक्ती। इन पशो खोदेंशो पा गो यो थुं का पा परमप्रभु यावे कली मान पा बोल पाता। प्रेरित ९:१-२९; प्रेरित २६:९-२०; प्रेरित ५:५४ 4 मोपा बाक्ङानु, ख्रीस्त आ लां खोइक्ब आन कली साइक्चा सम्म ङा श्येत गेतामी। मीश मुर वोंइश मुर आन कली खेदा पा ग्याइक्पाइश्शा, जेल्खानमी चोक्पाइक्तामी। प्रेरित ८:३ 5 एको आं देंशो थमा बाक्ब, दे ठेयब चढ़ेब नु जोक्ब तुइक्ब खाल्पा नेल्लेम तुइक्नीमी। मेकोपुकीमी दमस्कसमी बाक्ब यहूदी ग्रुम्तीक खिं ङा ठेयब मुर आन कली चिठी ब्रेक्शा, ख्रीस्त कली थमा सुइक्ब आन कली ग्याइश्शा यरूसलेम चाक्चा, दे अधिकार गेतीमी। मिनु थमा सुइक्ब आन कली ग्याइक्थ दमस्कस लती।
6 दमस्कस सहर जाक्दीत्चाङानु, १२ बजे खोइ दुम्शो बाक्त। मिनु मार दुम्त देंशा हना, सरीङ रे जेव हाक्सीशा यिशा, एर ओंथ नेल्ल थम छेङछेङ दुम्त। 7 मिनु गो दिङ गोल्ती। मिनु ‘सावल, सावल मारदे आं कली खेदा पा श्येत गेयी?’ देंशो नेंता। 8 मिनु गो ‘प्रभु सु ननी?’ दे हिल्लो पङानु ‘गेमी खेदा पशो नासरथ ङा येसु नङ’ देंशो नेंता। 9 गो नु काथा गाक्बपुकीमी छेङछेङ दुम्शो ताम्तेक्मे। लोव़ पशो चहिं मारेइ मनेनेम। 10 मिनु गो ‘प्रभु, मुल गो मार पाइनुङा?’ देंङानु, प्रभुमी ‘मुल छुल बोक्शा दमस्कस लावो। मेकेर जाक्दीनेनु, मार पचा माल्नेवे, मेको नेल्ल तुइक्पाइक्चा पुंइसीनेवे’ देंशो नेंता। 11 मेको छेङछेङम पतीके गो मिक्च मताइब दुम्ती। मिनु गो नु काथा गाक्ब वारचपुकीमी आं गुइ ग्याइश्शा कीशा, दमस्कस सहरमी चाक्दीत्तीमी।
12 दमस्कसमी हनानीया नें पाइश्शो मुर का बाक्माक्त। परमप्रभु यावे आ अरेशो नेल्ल टिशा, रिम्शो पाइब बाक्माक्त। मेकेर बाक्ब यहूदी नेल्लेमी मेको आ पर्बम ‘रिम्शो पाइब बाक्ब’ देंमा बाक्त। 13 मेको मुर आं कली ग्रुम्थ जाक्त। मिनु आं ङोंइती राप्शा ‘आं लोक्ब सावल, मिक्च ताइब दुमो’ देंमेनु, गो मिक्च ताइब दुम्शा, आं ङोंइती राप्शो ताता। 14 मिनु हनानीयामी ‘इं किकी पिपीमी आन परमप्रभु यावेमी इ कली योव़शा, आ दाक्शो पचा, दे तुइक्पाइक्ते। मेको ठीक पाइब कली तशा, आ लोव़ नेंतीवी। 15 दोदेंशो पा ग्रुमी, मार लोव़ नेंनी, मेको नेल्ल शुश मुर आन कली तुइक्पाइक्नेवे। 16 मुल कोव़शा मबाक्को, छुल बोक्शा प्रार्थना पा, हे प्रभु येसु, आं पशो पाप क्याम्शा गेयीनी, दे पुंइशा, ब्वाक्कुमी ख्रुम्शा ग्रुंइने पुंइसो’ दे माइक्ती।
17 मिनु नोले यरूसलेम लेत्ती। मिनु काबु परमप्रभु यावे आ खिंमी प्रार्थना पा बाक्ङानु, प्रभुमी कोंइतीक कोंइदीनु, 18 गो प्रभु कली ताता। मिनु प्रभुमी ‘यरूसलेम थु प्रोनो। मारदे हना एकेर बाक्बपुकीमी गेमी आं पर्बम शेंशो लोव़ मनेंनीम’ देंत। 19 मिनु गो ‘प्रभु, गो थमा सुइक्ब आन कली जेल्खानमी चोक्पाइक्तामी। ग्रुम्तीक खिं खिं हिरशा, थमा सुइक्ब आन कली माल्शा तुप्पाइक्तामी, दे तुइक्नीमी। 20 इन पर्बम लोव़ पाइब स्तीफानस कली फुल्लु क्रोम्शा सदमेनु, रिम्शो पाइतीनी, दे माइक्तामी। साइक्ब आन प्रुइश्शा वोइश्शो वा खाल पा बाक्शो नङ। मेको लोव़ नेल्लेम तुइश्शो बाक्नीम’ देंङानु, प्रेरित ७:५८; प्रेरित ८:१ 21 प्रभुमी ‘मेकेर रे लावो। मारदे हना ङोन ङोन बाक्ब अर्को रागी ङा मुर आन कली आं पर्बम शेंथ सोइक्नन’ देंत” दे पावलमी देंमाक्त। प्रेरित १३:२ 22 ङोन ङोन बाक्ब अर्को रागी ङा मुर आन कली ख्रीस्त आ पर्बम शेंथ सोइश्शो नङ देंमे चोटीन आ लोव़ थुम्चा मगेथु “एको कली मसाइक्थु मप्रोंइय। ओं देंशो मुर कली ब्रोंइचा गेचा मदुम्ब” दे शुश रेयके पामे बाक्त। प्रेरित २१:३६ 23 मिनु आन जोंब बोक्शा, आन फेक्शो वा बेरपा फुरक फ्रशा, राम्शी पोक्शा, मरिम्शो पामे बाक्त। 24 मिनु लडाइ पाइब आन ठेयब मुरुमी मेकोपुकीमी मोदेंशो मरिम्शो पशो तशा, पावल कली आगा ओंइपदा बाक्त। मिनु मुरपुकीमी एको मुर कली तशा, मारदे आन जोंब बोक्मा, एकोमी मार मरिम्शो पवा, दे तुइक्चा कली कोर्रामी युक्शा, हिल्लो पने, दे आ सिपाही आन गुइमी गेमी बाक्त। 25 मिनु सिपाहीपुकीमी पावल कली फ्रेंशा कोर्रामी युक्चा चिक्तमेनु, पावलमी मेकेर आ नेक्था राप्शा बाक्ब कप्तान कली “इं रोमी ऐन कानुनमी रोमी नागरिक आन कली मारेइ दोस मग्रुंइथु, गे कोर्रामी युक्चा ताइनीनी?” देंमाक्त। प्रेरित १६:३७; प्रेरित २३:२७ 26 मिनु कप्तानमी मुल मार पचा, दे सिपाही आन ठेयब मुर कली हिल्लो पथ लमाक्त। मिनु “कोर्रामी युक्चा पुंइसीचा ङा मुर ममाइ बाक्त। आं यो रोमी नागरिक बाक्त” दे तुइक्पदा बाक्त। 27 मिनु लडाइ पाइब आन ठेयब मुर पिशा “गे थमान रोमी नागरिक नवे? लो देंनो” देंमेनु “नङ, हजुर” देंमाक्त। 28 मिनु लडाइ पाइब आन ठेयब मुर “गो शुश क्येट थाप्शा, रोमी नागरिक दुम्शो नङ” देंमेनु, पावलमी “गो दा जरमेशो रेन रोमी नङ, हजुर” देंमाक्त। 29 मेको लोव़ नेंशा, कोर्रामी युक्शा हिल्लो पचा चिक्बपुकीमी “हेत्त, मो पचा मदुम्शो बाक्माक्त” देंमा बाक्त। मेको मुर रोमी नागरिक बाक्माक्त, दे तुइक्तमे ङा मेरे लडाइ पाइब आन ठेयब मुर यो हिंमाक्त। मारदे हना रोमी नागरिक आन कली फ्रेंपाइक्चा लायो मदुम्बाक्माक्त। 30 मिनु मेको लडाइ पाइब आन ठेयब मुर “मेको मुर आ दोस मार बाक्म?” दे रुप्चा माला बाक्त। मोपतीके आ दीसा नाक्ती ठेयब चढ़ेब नु कछडी बाक्ब मुर आन कली खुप्पाइश्शा, पावल कली आ गुइ ङा साङलो प्रुइश्शा लाइश्शा, खुम्सीशो मुर आन ङोंइती राप्पदा बाक्त।