1 मिनु पिप अग्रीप्‍पामी पावल कली “इ लोव़ मार बाक्‍मे, मेको देनो” दे लोव़ पचा गेवा बाक्‍त। मिनु पावलमी गुइ का पोक्‍शा, 2 “अग्रीप्‍पा सरकार, यहूदीपुकीमी शुश दोस गेतीमी। मिनु मेको दोस आ पर्बम हजुर नु लोव़ पचा तङानु, गो ग्‍येरसाक्‍यी। 3 मारदे हना यहूदी आन पतीके नु गारचा ङा मगारचा ङा लोव़ नेल्‍ल हजुरमी, रिम्‍शो पा तुइश्‍शो बाक्‍नीनी। लोव़ शुश बाक्‍ब। मोपतीके मब्रीथु, हजुरमी, नेंशा गेचा नङ। 4 गो आल रे यरूसलेममी बाक्‍शा, यहूदी नेल्‍लेमी आं कली तुइश्‍शो बाक्‍नीमी। 5 मेकोपुकी गो शुश धर्म पाइब फरिसी का बाक्‍ती, दे ङोंइती रे तुइक्‍नीमी। मेकोपुकीमी गो फरिसी का बाक्‍ती, दे सांकछी दुम्‍ने चाप्‍नीम। प्रेरित २३:६; फिलिप्‍पी ३:५ 6 परमप्रभु यावेमी आंइ किकी पिपी आन कली लोव़ गेशो बाक्‍माक्‍त। मिनु मेको लोव़ आ पर्बम दोस ताइब दुम्‍ती। प्रेरित २८:२० 7 मिनु मेको लोव़ नेल्‍ल खाप्‍ब, दे आंइ १२ थर ङा यहूदी नेल्‍लेमी थमा सुइश्‍शा, परमप्रभु यावे कली नाक्‍दो नाक्‍त ठेयब सेल्‍शा बाक्‍नीकी। मेको आन थमा सुइश्‍शो खोदेंशो पा गो यो थमा सुइक्‍ब का नङ। मेको थमा सुइश्‍शो आ पर्बम आं कली दोस गेतीमी, अग्रीप्‍पा सरकार। प्रेरित २४:१५ 8 परमप्रभु यावेमी बेक्‍शा लशो आन कली सेंपाइश्‍शा गेना हना यो ब्रोंइशा बाक्‍चा गेब देंशो लोव़ थमा सुइक्‍तीक लोव़ ममाइ ङा? हजुरपुकी, एको लोव़ मारदे थमा सुइक्‍ने मचाप्‍नीनी? प्रेरित २३:८

9 साइ गो दोपा यो मेको नासरथ ङा येसु आ नें क्‍याम्‍चा, दे मिम्‍शो नङ। प्रेरित ९:१-२९; प्रेरित २२:३-२१ 10 यरूसलेममी मेको आ नें क्‍याम्‍तीक गेय पा गाक्‍ती। ठेयब चढ़ेबपुकी रे अधिकार तशा, थमा सुइक्‍ब शुश आन कली जेल्‍खानमी चोक्‍पाइक्‍तामी। मोशो ला ममाइ, थमा सुइक्‍ब आन कली सदमेनु, गोमी ‘रिम्‍शो पाइतीनी’ देंती। 11 थमा सुइक्‍ब आन कली आंइ ग्रुम्‍तीक खिं खिंमी कीशा चाक्‍शा तुप्‍शा, येसु आ नें मरिम्‍शो सेल्‍पाइश्‍शा, मुल ङा मेरे मेको लां मखोइक्‍नीकी देंपाइक्‍तामी। नेल्‍ल आन कली साइक्‍पाइक्‍नुङमी, दे जोंब बोक्‍शा गाक्‍ती। यरूसलेममी ला ममाइ, ङोन ङोन रागी लशा, खेदा पा श्‍येत गेतामी।

12 मोपा श्‍येत गेना गेन गाक्‍ङानु, काबु ठेयब चढ़ेब आन अधिकार तशा, वारच नु गारशा, दमस्‍कस सहर गे लाइतक। 13 अग्रीप्‍पा सरकार हजुर, मुल नोफा दाइश्‍शा नेनीन। नाक्‍ती उइक्‍थ दुम्‍मेनु गाक्‍कानु, मार दुम्‍त देंशा हना, नां पशो क्‍येङा छेङछेङ सरीङ रे यिशा, आंइ एर ओंथ कोंइताक्‍व। 14 मोदेंशो छेङछेङ दुम्‍शो तशा, गो नेल्‍ल दिङ दाङ गोल्‍तक। मिनु हिब्रू लोव़ पा आं नें थिशा ‘सावल, सावल आं कली मारदे खेदा पा श्‍येत गेयी? गे आंमा श्‍येत जाइनेवे’ दे लोव़ पशो नेंता। 15 मिनु गोमी ‘प्रभु, सु ननी’ दे हिल्‍लो पङानु ‘इ खेदा पशो येसु नङ। 16 मुल छुल बोक्‍को। इ कली योव़शा आं लोव़ नेंपाइक्‍ब सेल्‍तन। मुलाक्‍त इ कली तपांइसाक्‍यी। मुल ङा मेरे इ कली तपांइसीन सीन बाक्‍नुङ। मिनु मुलाक्‍ती तशो नेंशो खोदेंशो पा नोले यो नेंनेवे, ताइनेवे। मेको लोव़ नेल्‍ल नेंपाइक्‍ब सेल्‍तन। 17 आं लोव़ शेंथ सोइक्‍नन। आं लोव़ नेंपा गाक्‍ङेनु, यहूदी नु अर्को रागी ङा मुर आन गुइ रे प्रोंइनुङ। 18 मारदे हना मेकोपुकी मिक्‍च ताइब दुम्‍मल। छिङछिङमी बाक्‍शोपुकी छेङछेङमी बाक्‍चा तामेक्‍ल। सैतान आ अधिकारमी बाक्‍शोपुकी परमप्रभु यावे आ अधिकारमी बाक्‍ब दुम्‍मल। मेको आन पाप क्‍याम्‍चा पुंइसीशा, आं कली थमा सुइश्‍शोमी आं मुरपुकी नु काथा दुम्‍शा, आं मुर दुम्‍मल’ देंशो नेंता। प्रेरित २०:३२

19 अग्रीप्‍पा सरकार, परमप्रभुमी कोंइशो कोंइतीक तशा, आ लोव़ नेंशा, मेको लोव़ टीब दुम्‍ती। गलाती १:१६ 20 दमस्‍कसमी जाक्‍दीश्‍शा, लोव़ शेंचा गोव़ता। मिनु यरूसलेममी, यहूदीया रागी हिरशा गाक्‍ती। अर्को रागी ङा मुर आन रागी रागी हिरशा गाक्‍ती। मोपा गाक्‍ङानु, मुर आन कली ‘पाप पचा प्रोंइशा, इन थुं परमप्रभु यावे गे हिरदीने। मिनु परमप्रभु कली शिरशो गेय पा इन थुं थमा पा हिरशो बाक्‍त, दे कोंइदीने’ दे शेंना शेंन गाक्‍ती। 21 मोदेंशो शेंशो आ पर्बम यहूदीपुकीमी परमप्रभु यावे आ खिंमी ग्‍याइश्‍शा दोस गेशा, साइक्‍चा पुंइसीब, दे साइक्‍चा माल्‍तीमी। प्रेरित २१:३०-३१ 22 खेदा पा शुश श्‍येत गेयीमीनु, परमप्रभु यावेमी श्‍येत फाल्‍तीक सक्ति गेती। मोपतीके गो ठेयब थुं पा इन ङोंइती राप्‍शा, ठेयब मुर आइक्‍च मुर नेल्‍ल इन कली आं लोव़ मोसा नु परमप्रभु यावे आ लोव़ पाइब आन लोव़ नु गारब, दे रुपीन। लूका २४:४४-४७ 23 मेकोपुकीमी ‘ख्रीस्‍तम श्‍येत जचा माल्‍ब’ दे ब्रेक्‍शो बाक्‍शो बाक्‍तेक्‍म। मिनु बेक्‍शो रे सेंसीशा ब्रोंइशा बाक्‍ब। बेक्‍शो रे सेंचा पुंइसीबपुकीमी नेल्‍ल आन क्‍येङा ङोंइती मेको येसु ख्रीस्‍त बेक्‍शो रे सेंसाक्‍व। मिनु मोपा यहूदी नु अर्को रागी ङा मुर नेल्‍ल आन कली छेङछेङ दुम्‍शो खोदेंशो पा आन लां कोंइब दुम्‍त” दे पावलमी सांकछी गेशा शेंदीमी बाक्‍त। १कोरिन्‍थी १५:२० 24 मोपा लोव़ पना पन लदानु, हुकुम पाइब फेस्‍तसमी आ लोव़ ख्रोइश्‍शा “पावल, गे बौला, शुश शेंसीशा जोक्‍ब तुइक्‍ब दुम्‍शा, निप्‍स ग्‍यशो कका दु‍मे बाक्‍त” दे ठेयब सेंदा पा देंमेनु, 25 पावलमी “माननीय फेस्‍तस हजुर, गो बौला मनङ। गो थमा पा आं तुइश्‍शो रिम्‍शो लोव़ पाता। 26 अग्रीप्‍पा सरकारमी आं देंशो लोव़ नेल्‍ल रुप्‍शो बाक्‍ब, दे तुइक्‍ताक्‍ङ। मोपतीके आं ग्राकी लोक्‍शा लोव़ पाता। सरकारमी ख्रीस्‍त आ पर्बम ब्रशो शुश लोव़ नेंशा रुप्‍शो बाक्‍माक्‍त। ख्रीस्‍त आ पर्बम दुम्‍शो चहिं का निक्‍शीमी ला तुइश्‍शो मनमी। शुशेमी तुइश्‍शो बाक्‍नीमी। यूहन्‍ना १८:२० 27 अग्रीप्‍पा सरकार, परमप्रभु यावे आ लोव़ पाइब आन लोव़ थमा सुइक्‍नुङ मदेंतीनी हना यो, इन थुंमी थमा सुइक्‍नीनी, दे तुइक्‍ताक्‍ङ” देंमाक्‍त। 28 मिनु पिप अग्रीप्‍पामी “लोव़ का निक्‍शीमी गो ख्रीस्‍त कली थमा सुइक्‍ब दुम्‍ती” देंमेनु, 29 पावलमी “लोव़ का निक्‍शी पशा हना यो, शुश पशा हना यो, दोपा यो आं खोदेंशो दु‍मीन, दे मिम्‍नुङ। सरकार ला ममाइ, एकेर खुम्‍सीशा बाक्‍ब नेल्‍ल आं खोदेंशो दुम्‍मल। तन्‍न ग्‍याइश्‍शा साङलोम पाइश्‍शा जेल्‍खानमी चोक्‍चा चहिं मपुंइसमल, दे पुंइ‍नुङ” देंमाक्‍त। 30 मो देंमेनु, पिप छुल बोक्‍शा गाक्‍माक्‍त। मिनु हुकुम पाइब, बेरनीस नु मेकेर बाक्‍ब नेल्‍ल छुल छाल बोक्‍शा गाक्‍मा बाक्‍त। 31 मिनु गाक्‍मानु “एको मुर रिम्‍शो बाक्‍माक्‍त, जेल्‍खानमी चोक्‍चा ङा, साइक्‍चा पुंइसीचा ङा मबा” देंमुशा गाक्‍मा बाक्‍त। 32 मिनु पिप अग्रीप्‍पामी हुकुम पाइब फेस्‍तस कली “एको मुरुमी सिजर कली आं मुददा कोव़चा गेने, दे मपुंइशो हना, प्रोंइशा सोइक्‍ने चाप्‍स वा” देंमाक्‍त। प्रेरित २५:११