32
येरमीयामी रू ग्याप्शो
1 परमप्रभु यावेम येरमीया कली लोव़ पाप्तु। मेना यहूदा ङा पिप सिदकीयाहम सासन पशो १० बर्स दुम्मेनु, नेबुकदरेसर आ सासन पशो १८ बर्स दुम्शो बाक्त। 2 मेना बेबीलोन ङा पिप आ लडाइ पाइबपुकीम यरूसलेम पुम्ताक्म। परमप्रभु यावे आ लोव़ पाइब येरमीया चहिं यहूदा ङा पिप आ दरवार खाल पाइब मुर आ जेल्खानम बाक्त। मेको यहूदा ङा पिप आ लाङगाम बाक्त। २राजा २५:१-२ 3 यहूदा ङा पिप सिदकीयाहम मेको कली मेकेर चोक्शो बाक्त। मिनु मेकोमी “गे मारदे मोदेंशो पा परमप्रभु यावे आ लोव़ पाइनेवे? परमप्रभु यावेमी ‘गो एको सहर बेबीलोन ङा पिप आ गुइम गेचशो बाक्नुङ। मिनु मेकोमी एको आंम के सेल्ब। येरमीया २१:७; येरमीया ३४:२ 4 यहूदा ङा पिप सिदकीयाह कल्दी आन गुइ रे मब्रोंइब। मेको थमा पा बेबीलोन ङा पिप आ गुइम गेचा पुंइसीब। मिनु मेको नु कोव़मुशा, लोव़ पाइब। 5 मेकोमी सिदकीयाह कली बेबीलोन लाइक्ब। मिनु गो मेको कली मकोव़ङु सम्म मेकेर बाक्ब। गे कल्दी नु लडाइ पाप्तीवी हना मग्रानेवे’ दे परमप्रभु यावे आ लोव़ पवी” देंशा चोक्शो बाक्त। येरमीया ५२:११
6 मिनु येरमीयामी परमप्रभु यावेम आं कली लोव़ पाप्तु। मार लोव़ पाप्तु देंशा हना, 7 “इ बकान्छा शाल्लुम आ तौ हनामेल इ बाक्तीक जाक्शा, इ कली ‘अनाथोथम बाक्शो आं रू ग्यापीन। मारदे हना ग्याप्चा अधिकार इन के बाक्ब’ देंब” देंत। लेवी २५:२५; रूथ ४:३-४ 8 मिनु नोले परमप्रभु यावेम देंशो खोदेंशो पा आं बकान्छा आ तौ हनामेल पिप आ खिं खाल पाइब आन लाङगा जाक्शा, मेकोमी “बेन्यामीन आ रागी अनाथोथम बाक्शो आं रू ग्यापीन। मेको ग्याप्चा अधिकार इन केन बाक्ब। मोपतीके गे मेको ग्याम्सीन” देंत। मिनु गो एको परमप्रभु यावे आ लोव़ बाक्माक्त, दे तुइक्ताक्ङ।
9 मोपतीके गो आं बकान्छा आ तौ हनामेल आ अनाथोथम बाक्शो रू ग्याप्ता। मिनु गो मेको कली चांदी के १७ शेकेल नाक्शा गेता। शेकेल का ११.५ ग्राम ङा चांदी के क्येट बाक्ब। 10 मिनु गो कागज ब्रेक्शा, छाप थोक्शा सांकछीपुकी वोइश्शा चांदी के शेकेल नाक्शा गेता। 11 मिनु गो आं रू ग्याप्शो ब्रेक्शो छाप थोक्शो कागज ताक्ता। छाप थोक्शो नु छाप मथोक्शो कागज यो ताक्ता। 12 मिनु गो मेको रू ग्याप्शो ब्रेक्शो कागज आं बकान्छा आ तौ हनामेलम आ ङोंइती, सांकछी नु पिप कली खाल पाइब आ लाङगाम बाक्शो यहूदी आन ङोंइती माहसेयाह आ चच, नेरीयाह आ तौ बारुक कली गेता। मेको सांकछी नेल्ल आन नें यो कागजम ब्रेक्शो बाक्तेक्म। 13 गो मेको नेल्ल आन ङोंइती बारुक कली 14 “मुर नेल्ल आन परमप्रभु यावे, इस्राएली आन परमप्रभुमी मार देंत देंशा हना, मेको शुश नाक्त सम्म लील, दे मेको रू ग्याप्शो कागज, छाप थोक्शो नु मथोक्शो, निम्फा खप के ग्योंब कामी कुर पावो” देंत। 15 मारदे हना मुर नेल्ल आन परमप्रभु यावे, इस्राएली आन परमप्रभुमी “मेको रागीमी खिं, रू नु अङगुर रू ग्याप्नीम” देंत। येरमीया ३२:१५
16 मिनु गो नेरीयाह आ तौ बारुक कली मेको रू ग्याप्शो कागज गेङा नोले, गो परमप्रभु यावे कली एको लोव़ पा 17 “परमप्रभु, परमप्रभु यावे, इन ठेयब सक्ति नु दिंशो गुइम गे सरीङ नु रागी सेल्तीनी। इन कली मारेइ गेय मचाप्चा ङा मबाक्ब। येरमीया २७:५; उत्पत्ती १८:१४; लूका १:३७ 18 हजार हजार पाला सम्म इन गेना हना यो दाक्तीक कोंइनीनी। तन्न आम आफ आन हेंथे पशो आन नोले जाक्ब आन आल आन कली रपाइक्नीनी। गे ठेयब नु सक्ति पाइश्शो परमप्रभु बाक्नीनी। इन नें मुर नेल्ल आन परमप्रभु यावे बाक्ब। प्रस्थान २०:५-६ 19 इन अर्ती ठेयब नु इन गेय नेल्ल क्येङा सक्ति पाइश्शो बाक्नीम। मुर आन पशो मारेइ मारेइ इन ङोंइती तचा ङा पा बाक्नीम। गे मुर नेल्ल आन कली कोव़नीनी। गे नेल्ल आन लां नु आन पशो तशा इनाम गेनीनी। रोमी २:६ 20 गे इजीप्त रागीमी चिन्ड नु छक लाक्चा ङा गेय कोंइताक्नी। मिनु मुल सम्म इस्राएल नु मुर नेल्ल आन दातेमी इन नें ठेयब सेल्तीनी। 21 गे इन मुर इस्राएली आन कली इजीप्त रे चिन्ड नु छक लाक्चा ङा गेय इन सक्ति नु बोल नु शुश हिंचा ङा श्येत कोंइशा ग्रुंइताक्नी। 22 मिनु गे मेको आन किकी पिपी आन कली कसम जशो, मेको दूध नु खुदो शुश बाक्शो रागी गेतीनी। 23 मिनु मेकोपुकी ओव़शा, मेको रागी आन के सेल्तेक्म। तन्न मेकोपुकीमी इन देंशो, इन अरेशो नु मार पचा माल्बा शेंशो मबिस्सम। गे मेको आन कली पन देंशा शेंशो लोव़ मेकोपुकीमी मटीमे। मोपतीके गे एको ठेयब श्येत नेल्ल मेको आन तार चाक्तीनी। 24 कोव़ङीन, एको सहर आन के सेल्चा कली नु गारो ङोइक्चा कली लां सेल्चा कली मार मार तेल्तेक्म। मेको सहर कली तरवार, अन्काल नु मुर बेक्तीक रोइम पतीके, मेको लडाइ तोइब कल्दी आन गुइम दुम्त। गे मार देंनी, मेको दुम्त। गे आंमा ताइनीनी। 25 मो हना यो परमप्रभु, परमप्रभु यावे, गे आं कली ‘एको सहर कल्दी आन गुइम दुम्त हना यो, क्येट गेशा, सांकछी आन कली ब्रेश्शा, रू ग्यापो’ देंतीनी” दे येरमीया देंत।
26 मिनु परमप्रभु यावेम येरमीया कली लोव़ पाप्तु। 27 मार, लोव़ पाप्तु देंशा हना “गो परमप्रभु यावे, ब्रोंइशो नेल्ल आन परमप्रभु नङ। मार, तेकोइ गेय आं पने मचाप्चा ङा बाक्बा ङा?” देंत। गन्ती १६:२२; येरमीया ३२:१७ 28 मोपतीके परमप्रभु यावेमी “गो एको सहर कल्दी आन गुइ नु बेबीलोन ङा पिप नेबुकदरेसर आ गुइम गेचा चिक्ताक्ङ। मिनु मेकोमी एको सहर ग्राब। 29 एको सहर कली लडाइ तोइब कल्दी जाक्शा मी सुइक्नीम। तेको खिं तारी आं कली गाइक्पाइक्चा कली बाल देवता कली चढ़ेमे नु देवी देवता आन कली तूचा थोव़क चढ़ेशा लुक्तमे, मेको नेल्ल क्रोइक्नीम। येरमीया १७:१३ 30 मारदे हना इस्राएल ङा मुर नु यहूदा ङा मुरुम आन ठिटा रेन आं ङोंइती मरिम्शो गेय ङा लाक्शा अरु मारेइ मपामे। थमा पा इस्राएल ङा मुरपुकीम आन गुइ ङा गेयम आं कली गाइक्पाइक्चा ङा लाक्शा, अरु मारेइ मपामे। 31 एको सहर सेल्मे नाक्त रे मुल सम्म आं कली गाइक्पाइश्शा, चुरपाइश्शा पतीमी। मोपा गो एको कली आं ङोंइती रे तिल्नुङ। 32 मेको इस्राएल नु यहूदा ङा मुरपुकीमी आं कली गाइक्पाइक्चा कली आन मरिम्शो पशो आन पर्बम पाइनुङ। मेको आन पिप, आन सरकार ङा गेय पाइब, आन चढ़ेब, आं लोव़ पाइबपुकी, यहूदा ङा मुरपुकी नु यरूसलेममी बाक्बपुकी नेल्लेम मोदेंशो पाम्तेक्म। 33 मेकोपुकीमी आं कली आन ची हिरशा कोंइशो बाक्नीम। आन कुल ममाइ। गो मेको आन कली शेंना शेंन बाक्ती हना यो, मनेनेम रिम्शो पचा कली ममिम्तेम। येरमीया २:२७ 34 मेकोपुकीमी आं नें वोइश्शो खिंम आन ग्रांग्रा दिशो देवी देवता वोइक्तेक्म। मिनु आं खिं कली ग्रांग्रा दिशो सेल्तेक्म। 35 मेकोपुकीम हिन्नोम आ तौ आ बेंसीम बाल देवता आन थान सेल्तेक्म। मिनु मेकोपुकीमी मेकेर आन तमी तौ आन कली मोलेक कली चोशा चढ़ेम्तेक्म। गो मेको आन कली मेको मअरेङमी। गो मेको गेनायो ममिम्तु। मोदेंशो ग्रांग्रा दिशो गेय पशा, यहूदा ङा मुर आन कली पाप पपाइक्तेक्म” देंत। येरमीया ७:३१; येरमीया १९:५; इजीकीएल २०:२५-२६
36 मोपतीके परमप्रभु यावे, इस्राएली आन परमप्रभुमी “गेपुकीमी एको सहर आ पर्बम ‘तरवार, अन्काल नु मुर बेक्तीक रोइम बेबीलोन ङा पिप आ गुइम गेशो बाक्ब’ देंनीनी। 37 कोव़ङीन, गो मेको आन कली आं गाइश्शो, चुरशो नु ठेयब ग्युश्रा बोक्तीकेमी तेको रागीम खेरुमी, मेको रागी नेल्ल रे ग्रुम्पाइक्नुङमी। गो मेको आन कली लेंशा एको रागीम लेश्शा चाक्नुङमी। मिनु मेको आन कली रिम्शो पा मारेइ मदुम्थु बाक्पाइक्नुङमी। ब्यवस्था ३०:३ 38 मिनु मेकोपुकी आं मुर दुम्नीम। मिनु गो मेको आन परमप्रभु दुम्नुङ। येरमीया ७:२३ 39 गो मेको आन कली थुं का दुम्तीक नु गाक्तीक लां का गेनुङमी। मेकोपुकी गेना हना यो आं कली मान पा हिंनीम। मेको आंम आन कली नु आन आल आन कली रिम्शो दुम्ब। इजीकीएल ३६:२७ 40 गो मेकोपुकी नु गेना हना यो लीब कबल का पाइनुङ। गो मेको आन कली रिम्शो पचा कली गेनायो मप्रोंइनुङ। मिनु गो मेको आन थुंमी आं कली मान पा हिंतीके वोइक्नुङ। मोपा मेकोपुकीम आं कली मप्रोंइनीम। येरमीया ३१:३१-३४ 41 गो मेको आन कली रिम्शो पना पन ग्येरसीनुङ। मिनु थमा पा गो आं थुं नु आं सोक्त नेल्लेम मेको आन कली एको रागीम वोइक्नुङमी” देंत। ब्यवस्था २८:६३; आमोस ९:१५
42 परमप्रभु यावेमी “दोपा गो एको मुर आन कली ओं पा शुश श्येत गेङा, मोपा गो मुल आं देंशो रिम्शो पतीक नेल्लेम, मेको आन कली रिम्शो पाइक्नुङमी। 43 एको रागीम रू ग्याप्नीम। मेको आ पर्बम गेपुकीम ‘एको मुर नु बस्तु भाव मारेइ मबाक्शो रागी बाक्ब। मारदे हना एको कल्दी आन गुइम गेशो बाक्ब’ देंनीनी। 44 मेकोपुकीम क्येटीम रू ग्याप्नीम। मेको आन नें ब्रेक्शो ग्याप्शो कागज, सांकछी वोइश्शा, छाप थोक्नीम। मोदेंशो बेन्यामीन आ रागी, यरूसलेम आ एर ओंथ, यहूदा ङा सहरम, पहाडीम, शेफेलाहम नु नेगेबम मोदेंशो पाइनीम। मारदे हना गो मेको आन शोंप लेश्शा गेनुङ” दे परमप्रभु यावेम देंत। येरमीया ३२:१५; येरमीया २९:१४,३०