1 मिनु लडाइ पाइब आन ठेयब मुर नेल्‍ले, कारेआह आ तौ योहानान, होशायाह आ तौ येजन्‍याह नु आइक्‍च ठेयब मुर नेल्‍ले येजन्‍याह कली अजारयाह यो ब्रेक्‍नीम। 2 परमप्रभु यावे आ लोव़ पाइब येरमीया आ बाक्‍तीके जाक्‍तेक्‍म। मिनु मेको कली “गो आंइ पुंइशो नेनीन। मिनु परमप्रभु यावे, इन परमप्रभु कली आंइ पर्बम नु लीशो मुर नेल्‍ल आन पर्बम पुनीन। मारदे हना शुश मुर रे का निक्‍शी ला लीतक। मेको गे आंमा ताइतीनी। येरमीया ३७:३ 3 मिनु परमप्रभु यावे, इन परमप्रभुम गो ते लचा माल्‍नीकी, मार पचा माल्‍नीकी, मेको कोंइदल, दे पुनीन” देंतेक्‍म। 4 मिनु परमप्रभु यावे आ लोव़ पाइब येरमीयामी मेको आन कली “दुम्‍ब। गो इन पर्बम इन देंशो खोदेंशो पा परमप्रभु यावे इन परमप्रभु कली पुंइनुङ। मिनु परमप्रभु यावेम मार देंमे, मेको नेल्‍ल इन कली शेंनुङ। गो इन ङोंइती मारेइ लोव़ मख्रुइक्‍नुङ” देंत। 5 मिनु मेकोपुकीमी येरमीया कली “परमप्रभु यावे, इन परमप्रभुमी कोंइशो नु आंइ कली देंशो लोव़ गोपुकीम मपाइतक हना, परमप्रभु यावे आंइ पर्बम थमा नु ठीक लोव़ पाइब सांकछी दुम्‍ल। 6 मेको रिम्‍शो दुम्‍ल कि मरिम्‍शो दुम्‍ल। गो परमप्रभु यावे, इं परमप्रभु आ बाक्‍तीक इन कली सोइक्‍ताक्‍क। गोपुकीम मेको आ अरेशो टीनीकी। मिनु परमप्रभु यावे, इं परमप्रभु आ लोव़ टितीके, गो आंइ कली रिम्‍शो दुम्‍ल” देंतेक्‍म।

7 मिनु १० नाक्‍त नोले परमप्रभु यावेम येरमीया कली लोव़ पाप्‍तु। 8 मिनु येरमीयामी कारेआह आ तौ योहानान नु मेको नु बाक्‍शो लडाइ पाइब आन ठेयब मुर नेल्‍ल, आइक्‍ची नु ठेयब मुर नेल्‍ल आन कली ब्रेत्‍ताक्‍मी। 9 मिनु येरमीयामी मेको आन कली “गे आं कली परमप्रभु यावे, इस्राएली आन परमप्रभु आ ङोंइती पुंइथ सोइक्‍ताक्‍यीनी। 10 मिनु परमप्रभु यावेमी इन कली ‘एको रागीमीन बाक्‍तीनी हना, गो इन कली रिम्‍शो सेल्‍नन्‍नी, मप्रेत्नन्‍नी। गो इन कली ख्रुम्‍नन्‍नी, मतुल्‍नन्‍नी। मारदे हना गो इन कली खतम पोक्‍शो आ पर्बम आं थुं खाइश्‍शो बाक्‍नुङ। येरमीया १:१० 11 मुल गे बेबीलोन ङा पिप क्‍येङा महिनीन। मारदे हना गो इन कली मेको आ गुइ रे प्रोंइचा नु श्‍येत मगेपाइक्‍चा कली गेपुकी नु बाक्‍शो बाक्‍नुङ। 12 गो इन कली शिशी पाइक्‍नन्‍नी। मिनु मेकोमी इन कली शिशी पा इन बाक्‍शो रागीमीन वोइक्‍ब’ देंशो बाक्‍ब। 13 तन्‍न गेपुकीम परमप्रभु यावे, इन परमप्रभु आ लोव़ मटीतीनी हना ‘गोपुकी एको रागीम मबाक्‍नीकी’ देंतीनी हना, येरमीया २९:१७-१८ 14 गोपुकी इजीप्‍त लशा बाक्‍नीकी। मारदे हना मेकेर लडाइ मतांइसीब, तुराही ताप्‍शो सेंदा मनेंसीब, शोब्‍ले जचा मतथु शोव़लुम मबेक्‍सीब। गो मेकेन बाक्‍नीकी देंतीनी हना, 15 यहूदा ङा लीशोपुकी, परमप्रभु यावे आ लोव़ नेनीन। मुर नेल्‍ल आन परमप्रभु यावे, इस्राएली आन परमप्रभुम ‘गेपुकी इजीप्‍त लशा मेकेर बाक्‍चा कली थमा पा मिम्‍शो बाक्‍तीनी हना, 16 तेको तरवार रे पा गे हिंशा प्रोक्‍शो बाक्‍नी, मेको तरवारमी इन कली इजीप्‍तमी साइक्‍ब। मिनु तेको अन्‍काल रे पा, गे हिंशो बाक्‍नी, मेको इजीप्‍तमी इन नोनोले जाक्‍ब। मिनु गे मेकेर बेक्‍नीनी। 17 सु सु इजीप्‍त लशा बाक्‍नीमी, मेको नेल्‍ल तरवार, अन्‍काल नु मुर बेक्‍ती रोइम बेक्‍नीम। गो इन कली खतम पोक्‍तीक रे का यो मब्रोंइनीनी’ देंशो बाक्‍ब” देंत।

18 मुर नेल्‍ल आन परमप्रभु यावे, इस्राएली आन परमप्रभुम “दोपा आं गाइश्‍शो नु चुरशो यरूसलेमम बाक्‍ब मुर आन तार मोंइसे, मोपान गेपुकी इजीप्‍त लाइतीनी हना, आं चुरतीके इन तार मोंइसीब। इन श्‍येत जशो तशा मुर हिंनीम। गेपुकी सराप राइब नु शुक्‍शी पाइक्‍चा पुंइसीब दुम्‍नीनी। गेपुकीम लेंशा एको रागी गेनायो कोव़चा मताइनीनी” देंशो बाक्‍ब। येरमीया २५:९; येरमीया ४४:१२ 19 ए यहूदा ङा लीशोपुकी, परमप्रभु यावेमी इन कली “गेपुकी इजीप्‍त मलने, देंशो लोव़ तुइश्‍शा वोतीन। मुलाक्‍ती गो इन कली हिंच कोंइशा लोव़ पाता। 20 गेपुकीम ठेयब मरिम्‍शो का पाइतीनी। गेपुकीम आं कली परमप्रभु यावे, इन परमप्रभु आ ङोंइती परमप्रभु यावेम, आंइ परमप्रभु मार देंबा, मेको नेल्‍ल आंइ कली शेंदीकी। मिनु गो मेको नेल्‍ल पाइनीकी देंतीनी। 21 मुलाक्‍ती गो मेको नेल्‍ल इन कली शेंताक्‍न्‍नी। परमप्रभु यावे, इन परमप्रभुम मार देंचा, दे सोइक्‍ती, मेको लोव़ इन कली देंती, तन्‍न मुल सम्‍म मटिशो बाक्‍नीनी। 22 मोपतीके मुल एको लोव़ थमा पा तुइश्‍शा वोतीन। इन बाक्‍चा कली लचा दाक्‍शो रागीमीन गेपुकी तरवार, अन्‍काल नु मुर बेक्‍तीक रोइम बेक्‍नीनी देंशो बाक्‍ब” देंत।