5
ख्रोइक्तीक चिनु ख्रोइश्शो
1 मिनु यर्दन आइक्ची हांबु पच्छिम गे ङा एमोरी आन पिप नेल्ल नु ठेयब समुन्द्र आ नेक्था ङा कनानी आन पिप नेल्लेमी “परमप्रभु यावेमी इस्राएली आन ङोंइती यर्दन खोला मशोक्सीमा सम्म सोव़पाइक्तु” दे नेंशा, मेकोपुकी इस्राएली आन कली तशा, साप्पा हिंशा आन थुं लुक्च लत। यहोसु ३:१६; यहोसु २:२४
2 मेना परमप्रभु यावेमी यहोसु कली “फुल्लु के ख्रोइक्तीक सेल्शा, चिनु मख्रोइश्शो इस्राएली आन कली ख्रोइक्तीक चिनु ख्रोतो” दे अरेप्तु। प्रस्थान ४:२५; उत्पत्ती १७:१२-१४ 3 मिनु यहोसुमी फुल्लु के ख्रोइक्तीक सेल्शा, गिबेआथ-हारालोथमी इस्राएली आन कली ख्रोइक्तीक चिनु ख्रोइक्तु। 4 यहोसुमी मारदे इस्राएली आन कली ख्रोइक्तीक चिनु ख्रोइक्तु देंशा हना, इजीप्त रागी रे पिशो वोंइश मुर नु लडाइ पाइब नेल्ल गोरशो रागीमी बेक्ने थुम्शो बाक्तेक्म। 5 इजीप्त रागी रे पिशो वोंइश मुर नेल्ल आन के ख्रोइक्तीक चिनु ख्रोइक्ने थुम्शो बाक्तेक्म। तन्न गोरशो रागीमी जरमेशो आन कली चहिं ख्रोइक्तीक चिनु मख्रोइश्शो बाक्तेक्म। 6 मिनु ङोंइती परमप्रभु यावेमी आंइ किकी पिपी आन कली “दूध नु खुदो शुश बाक्शो रागी इन चच युइ आन कली गेनुङ” दे कसम जाप्तु। तन्न आ लोव़ मटितीके इजीप्त रे पिशो लडाइ पाइब नेल्ल ४० बर्स गोरशो रागीमी मबेक्मा सम्म हिरचा माल्तेक्म। परमप्रभु यावेमी मेको आन मटितीके मेको आन कली “गे इन कली मेको दूध नु खुदो शुश बाक्शो रागी ओव़चा मगेनुङ” दे कसम जशो बाक्त। गन्ती १४:२२-२३ 7 मेकोमी आन आफ आन पा ङा आन तौ आन कली मेको रागी तचा कली कोल्पाइक्तु। मिनु यहोसुमी मेको आन तौ आन कली ख्रोइक्तीक चिनु ख्रोइक्पाइक्तु। मारदे हना लांमी गाक्तीके मेको आन कली ख्रोइक्तीक चिनु मख्रोइश्शो बाक्तेक्म।
8 मिनु नेल्ल मुर आन कली ख्रोइक्तीक चिनु ख्रोइक्ने थुम्मे नोले, मेकोपुकी ख्रोइश्शो गार मसाम सम्म आन बाक्तीकेमी बाक्शो बाक्तेक्म। 9 मिनु परमप्रभु यावेमी यहोसु कली “मुलाक्त ङा नाक्ती इजीप्त ङा इन मुने नेल्ल क्याम्ताक्ङ” देंत। मोपतीके मुलाक्त सम्म मेको आन बाक्शो बाक्तीके कली गिल्गाल देंशो बाक्नीम। यहोसु ४:१९
पास्सा चाड मानेशो
10 इस्राएलीपुकी गिल्गाल सहरम बाक्शो बाक्तेक्म। मिनु मेकोपुकीमी महिना ङा १४ नाक्ती पास्सा चाड मानेम्तेक्म। मेको यरीको ङा दिंमम बाक्शो बाक्तेक्म। प्रस्थान १२:६,३९; लेवी २३:१०,१४; २राजा २३:२१:२२; होसे ९:१५ 11 पास्सा चाड आ दीसा नाक्ती मेकोपुकीमी मेको रागी ङा सिश्शो अन्न रे पा बोरब ओख्ती मसुप्शो शोब्ले नु कारशो अन्न जाम्तेक्म। 12 मेको रागी ङा अन्न जामे नोले, आ दीसा नाक्त रे मन्ना शोब्ले यिचा नांइसाक्व। मेकोपुकीमी मेको नाक्त रे कनान रागी ङा अन्न जाम्तेक्म। प्रस्थान १६:३५
स्वर्ग ङा गेय पाइब नु यहोसु
13 यहोसु यरीको आ नेक्था बाक्मेनु, मेको आ ङोंइती गुइमी तरवार शेशा मुर का दोक राप्शो ताप्तु। मिनु यहोसु मेको आ नेक्था लशा “गे आंइ मुर ननी देय आंइ जोरी सत्रु आ मुर ननी?” दे हिल्लो पाप्तु। गन्ती २२:२३,३१ 14 मिनु मेकोमी “ममाइ, गो परमप्रभु यावे आ फौज आन कली चलेब नङ। मोपतीके जाक्ती” देंत। मिनु यहोसुमी गु बाप्शा सेउ पशा “आं प्रभु, गो इन गेय पाइब नङ। आं कली मार लोव़ पाइनीनी?” दे हिल्लो पाप्तु। 15 मिनु परमप्रभु यावे आ फौज आन कली चलेबमी यहोसु कली “इ लिक्शो जुत्ता प्रुतो। मारदे हना इ बाक्शो परमप्रभु यावे आ बाक्तीक बाक्ब” देंत। मिनु यहोसुमी मेको आ देंशो खोदेंशो पा आ जुत्ता प्रुइक्तु। प्रस्थान ३:५