1 मिनु सुइ मुरुमी परमप्रभु यावे कली अन्‍न चढ़ेचा थुं पाप्‍तु हना, मेको अन्‍न चढ़ेतीक थम रिम्‍शो फस बाक्‍चा माल्‍ब। मिनु मेकोमी मेकेर तेल लुक्‍शा, धूप सुप्‍चा माल्‍नीम। लेवी ७:१०; गन्‍ती १५:४ 2 मिनु मेकोमी मेको चढ़ेब हारून आ तौ आन बाक्‍तीके चाक्‍चा माल्‍ब। मिनु चढ़ेबमी मेको तेल नु धूप ब्‍वाइश्‍शो रिम्‍शो फस मुठी का हुइश्‍शा, मीम चोचा माल्‍ब। मिनु मेको परमप्रभु यावे कली आ दाक्‍शो ब्रोव़शो रिना पाइश्‍शो मीम चोशा चढ़ेतीके बाक्‍ब। 3 मेको अन्‍न चढ़ेशो रे लीशो चहिं हारून नु आ तौ आन के दुम्‍ब। मेको परमप्रभु यावे कली मीम चोशा चढ़ेतीक ङा नेल्‍ल क्‍येङा चोव़खो चोशा चढ़ेतीक बाक्‍ब। लेवी ६:२२

4 अन्‍न चढ़ेतीक चाक्‍चा थुं पाम्‍तेक्‍म हना, चो‍शो शोब्‍‍ले चाक्‍चा माल्‍नीम। मेको शोब्‍ले रिम्‍शो फस के, तेलमी निशा बोरब ओख्‍ती मसुप्‍थु चोचा माल्‍नीम। बटुक तेलमी निशा बोरब ओख्‍‍ती मसुप्‍शो दुम्‍चा माल्‍नीम। तेलम मनिशो बाक्‍त हना, शोब्‍ले कली तेल ख्रेक्‍शो बाक्‍‍चा माल्‍ब। लेवी ७:९ 5 मिनु इन चढ़ेतीक अन्‍न बाक्‍त हना, तेल ब्‍वाइश्‍शो बोरब ओख्‍ती मसुप्‍शो रिम्‍शो फस बाक्‍‍चा माल्‍ब। 6 मेको आइक्‍च आइक्‍च सेल्‍शा, तेल लुक्‍चा माल्‍ब। मेको अन्‍न चढ़ेतीक बाक्‍ब। 7 इन चढ़ेतीक दिउरेम क्‍येशो अन्‍न चढ़ेतीक बाक्‍त हना, मेको तेलम क्‍येशो रिम्‍शो फस के दुम्‍चा माल्‍ब। 8 मोपा चोशो क्‍येशो अन्‍न चढ़ेतीक परमप्रभु यावे आ बाक्‍तीक लाइक्‍चा माल्‍नीम। मिनु मेको चढ़ेब आन बाक्‍तीक चाक्‍मे नोले चढ़ेबमी मेको चढ़ेतीक आ नेक्‍था चाक्‍चा माल्‍ब। 9 मिनु चढ़ेबमी मेको अन्‍न चढ़ेतीक रे मुठी का हुइश्‍शा, मेको चढ़ेतीक ङा मीम चोचा माल्‍ब। मेको परमप्रभु यावे कली आ दाक्‍शो ब्रोव़शो रिना पाइश्‍शो मीम चोशा चढ़ेतीके बाक्‍ब। 10 मेको अन्‍न चढ़ेतीके आ लीशो चहिं हारून नु आ तौ आन के दुम्‍ब। मेको परमप्रभु यावे कली मीम चोशा चढ़ेतीक ङा नेल्‍ल क्‍येङा चोव़खो चोशा चढ़ेतीक बाक्‍ब।

11 गेपुकीमी परमप्रभु यावे कली अन्‍न चढ़ेतीकेमी गेनायो बोरब ओख्‍ती सुप्‍चा मदुम्‍ब। परमप्रभु यावे कली मीम चोशा चढ़ेतीकेमी बोरब ओख्‍ती नु खुदो गेनायो चोचा मदुम्‍ब। 12 खुदो नु बोरब ओख्‍ती सुप्‍शो चढ़ेतीक लाइश्‍शा परमप्रभु यावे कली चढ़ेने चाप्‍नीनी। तन्‍न मेको कली चढ़ेतीक मीम हुम्‍चा मदुम्‍ब। गन्‍ती १८:१२-१३; २इतिहास ३१:५ 13 गेपुकीमी इन अन्‍न चढ़ेतीक नेल्‍ल हिक्‍सी सुप्‍शा, हिक्‍सी ङाम्‍शो सेलीन। इन परमप्रभु आ कबल ङा अन्‍न चढ़ेतीकेमी हिक्‍सी मङाम्‍शो मदुम्‍ब। इन चढ़ेतीक नेल्‍लेमी हिक्‍सी सुप्‍शो चढ़ेचा माल्‍नीनी। गन्‍ती १८:१९; २इतिहास १३:५

14 परमप्रभु यावे कली ङोंइती मीशो अन्‍न चढ़ेचा थुं पाइतीनी हना, इन ङोंइती मीशो नक बाला आन अन्‍न मीम क्रोइश्‍शा चढ़ेन। ब्‍यवस्‍था २६:२-११ 15 मेको तारी तेल लुक्‍शा, धूप वोइक्‍चा माल्‍ब। मेको अन्‍न चढ़ेतीक बाक्‍ब। 16 मिनु चढ़ेबमी मेको तेल लुक्‍शा, धूप वोइश्‍शो रे मुठी का हुइश्‍शा, मीम चोचा माल्‍ब। मेको परमप्रभु यावे कली मीम चोशा चढ़ेतीक बाक्‍ब।