4
पाप पशो आ पर्बम चढ़ेतीक
1 मिनु परमप्रभु यावेमी मोसा कली 2 “गे इस्राएली आन कली ‘परमप्रभु यावेमी मपचा, दे शेंशो सुइ मुरुमी मतुइक्थु पाप पाप्तु हना, 3 मिनु तेल लुक्शो चढ़ेबमी पाप पा, मुर आन कली दोस ताइब सेल्तु हना, मेकोमी आ पशो पाप आ पर्बम मारेइ मदुम्शो थम रिम्शो ब्यफ का परमप्रभु यावे आ ङोंइती पाप पशो आ पर्बम चढ़ेचा माल्ब। 4 मेकोमी मेको ब्यफ कली ग्रुम्तीक ताम्बु आ ओव़तीक आ नेक्था परमप्रभु यावे आ ङोंइती चाक्चा माल्ब। मेकोमी आ गुइ मेको ब्यफ आ पिया तारी वोइक्चा माल्ब। मिनु मेको ब्यफ कली परमप्रभु यावे आ ङोंइती साइक्चा माल्ब। 5 मिनु मेको तेल लुक्शो चढ़ेबमी ब्यफ आ हुश इच्का हुइश्शा ग्रुम्तीक ताम्बुमी चाक्चा माल्नीम। 6 मिनु चढ़ेबमी आ ब्रेप्चो हुशेम ख्रुम्शा, मेको हुश परमप्रभु यावे आ ताम्बु आ आगा ङा चोव़खो कोठा आ बारेशो वाम आ नेक्था परमप्रभु यावे आ ङोंइती ७ खेयप ब्रुइक्चा माल्ब। लेवी ९:९ 7 मिनु नोले चढ़ेबमी मेको हुश ग्रुम्तीक ताम्बु आ आगामी बाक्शो धूप चढ़ेतीके आ ग्रोव़पुकीमी ख्रेक्चा माल्ब। मेको ब्रोव़शो रिना पाइश्शो धूप परमप्रभु यावे आ ङोंइती चढ़ेतीके बाक्ब। मिनु लीशो हुश नेल्ले ग्रुम्तीक ताम्बु आ ओव़तीक ङा चोशा चढ़ेतीक आ पुंम मोइक्चा माल्ब। प्रस्थान ३०:१,६; प्रस्थान ४०:६ 8 मेकोमी पाप आ पर्बम चढ़ेशो ब्यफ आ बोंसो नेल्ल शोल्चा माल्ब। गा क्यी आ तार ङा नु मेको कली गिल्शो बोंसो, 9 आ चिच निम्फा, मेको आ क्रातो तार ङा बोंसो नेल्ले नु आ आइदीम क्येप्शो बोंसो नेल्ल ग्रुंइचा माल्नीम। 10 दुशा बाक्चा आ पर्बम चढ़ेशो ब्यफ आ बोंसो ग्रुंइशो खोदेंशो पा शोल्चा माल्ब। मिनु चढ़ेबमी मेको मीम चोशा चढ़ेतीकेमी चढ़ेचा माल्ब। लेवी ८:१७ 11 तन्न ब्यफ आ कुशुल, मेको आ श्ये नेल्ल, मेको आ पिया, खोइली नु मेको आ गा क्यी गोबर सुन्दा, 12 ब्यफ आ लीशो नेल्ले मुर बाक्तीके रे ङोन चोव़खो पुलु ताइक्तीकेमी लाइश्शा, शी तार वोइश्शा चोचा माल्नीम। लेवी ६:४
13 इस्राएल ङा मुर नेल्लेमी मतुइक्थु पाप पशो बाक्तेक्म हना, परमप्रभु यावेमी मपचा दे शेंशो मारेइ पशो बाक्तेक्म हना, मेको पाप मेको मुर आन दातेमी ख्रुइश्शो बाक्त हना यो, मेकोपुकी दोस ताइब दुम्नीम। गन्ती १५:२२-२६ 14 मिनु मेको आन पशो पाप ग्रूमेनु, मेको इस्राएली नेल्लेमी पाप आ पर्बम चढ़ेतीके ब्यफ चाक्शा ग्रुम्तीक ताम्बु आ ङोंइती जाक्चा माल्नीम। 15 मिनु इस्राएल ङा खाल्पा नेल्लेमी परमप्रभु यावे आ ङोंइती मेको आन गुइ ब्यफ आ पिया तारी वोइक्चा माल्नीम। मिनु मेको ब्यफ परमप्रभु यावे आ ङोंइती साइक्चा माल्नीम। 16 मिनु नोले तेल लुक्शो चढ़ेबमी मेको ब्यफ आ हुश इच्का ग्रुम्तीक ताम्बु आगा चाक्चा माल्नीम। 17 मिनु चढ़ेबमी मेको आ ब्रेप्चो हुशेमी ख्रुम्शा, परमप्रभु यावे आ ङोंइती बारेशो वा आ पुंमी ७ खेयप ब्रुइक्चा माल्ब। 18 मिनु नोले मेकोमी ग्रुम्तीक ताम्बु आगाम बाक्शो धूप चढ़ेतीक आ ग्रोव़पुकीम परमप्रभु यावे आ ङोंइती ख्रेक्चा माल्ब। मिनु लीशो हुश नेल्ल ग्रुम्तीक ताम्बु आ ओव़तीके आ ङोंइती बाक्शो चोशा चढ़ेतीक आ पुंम मोइक्चा माल्ब। 19 मेकोमी मेको आ बोंसो नेल्ल शोल्शा, चढ़ेतीकेम चोचा माल्ब। 20 मेकोमी पाप आ पर्बम चढ़ेशो ब्यफ कली दोदेंशो पामे, मेको ब्यफ कली यो मोदेंशोन पचा माल्ब। मोपा चढ़ेबमी मेको आन पर्बम पाप क्याम्तीक गेय पाइब। मिनु मेकोपुकीम माफ ताइनीम। 21 मेकोमी मेको ब्यफ कली मुर बाक्तीके रे ङोन ग्रुंइशा लाइक्चा माल्ब। ङोंइती ङा ब्यफ चोशो खोदेंशो पा चोचा माल्ब। मेको इस्राएली आन पाप आ पर्बम चढ़ेशो बाक्ब। लेवी ४:११-१२
22 मिनु सासन पाइब कामी मतुइक्थु, परमप्रभु यावेमी मपचा, दे शेंशो पाप पाप्तु हना, मेको दोस ताइब दुम्ब। 23 मिनु मेको आ पशो पाप तुइक्तमे नोले, मेकोमी मारेइ मदुम्शो थम रिम्शो बोका का चाक्चा माल्ब। 24 मिनु मेकोमी आ गुइ मेको बोका आ पिया तार वोइक्चा माल्ब। मिनु तेकेर परमप्रभु यावे आ ङोंइती चोशा चढ़ेतीक साइक्नीमी, मेकेर रेन मेको साइक्चा माल्ब। मेको पाप आ पर्बम चढ़ेतीके बाक्ब। 25 मिनु चढ़ेबमी आ ब्रेप्चो हुशेमी ख्रुम्शा, चोशा चढ़ेतीक आ ग्रोव़पुकीम ख्रेक्चा माल्ब। मेको लीशो हुश चोशा चढ़ेतीक आ पुंम मोइक्चा माल्ब। 26 मेको आ बोंसो नेल्ले चढ़ेतीक आ तार चोचा माल्ब। मेको दुशा बाक्तीक आ पर्बम चढ़ेशो बोंसो खोदेंशो पा चढ़ेतीकेमी चोचा माल्ब। मोपा चढ़ेबमी मेको आ पाप आ पर्बम पाप क्याम्तीक गेय पाइब। मिनु मेको माफ ताइब।
27 मिनु मुर आन दाते ङा कामी मतुइक्थु पाप पाप्तु हना, परमप्रभु यावेमी मपचा, दे शेंशो पाप्तु हना, मेको दोस ताइब दुम्ब। 28 मिनु मेको आ पशो पाप तुइक्तमे नोले, मेकोमी आ पशो पाप आ पर्बम चढ़ेचा कली मारेइ मदुम्शो थम रिम्शो क्यारश का चढ़ेचा कली चाक्चा माल्ब। गन्ती १५:२७-२८ 29 मिनु मेकोमी आ गुइ मेको पाप आ पर्बम चढ़ेतीक तार वोइक्चा माल्ब। मिनु मेको पाप आ पर्बम चढ़ेतीके कली मेको चोशा चढ़ेतीक आ नेक्था साइक्चा माल्ब। 30 मिनु चढ़ेबमी आ ब्रेप्चो हुशेमी ख्रुम्शा, चोशा चढ़ेतीक आ ग्रोव़पुकीम ख्रेक्चा माल्ब। मेको लीशो हुश चोशा चढ़ेतीक आ पुंम मोइक्चा माल्ब। 31 मेकोमी आ बोंसो नेल्ल दुशा बाक्चा आ पर्बम चढ़ेशो आ बोंसो खोदेंशो पा शोल्चा माल्ब। मिनु चढ़ेबमी मेको चढ़ेतीकेमी चोशा परमप्रभु यावे आ दाक्शो ब्रोव़शो रिना पाइक्चा कली चोचा माल्ब। मोपा चढ़ेबमी मेको आ पाप आ पर्बम पाप क्याम्तीक गेय पाइब। मिनु मेको माफ ताइब। लेवी ३:१४-१५
32 मेकोमी आ पाप आ पर्बम चढ़ेचा कली भेडा चाक्तु हना, मारेइ मदुम्शो थम रिम्शो भेडा चाक्चा माल्नीम। 33 मिनु मेकोमी आ गुइ मेको पाप आ पर्बम चढ़ेतीक तार वोइक्चा माल्ब। मिनु तेकेर चोशा चढ़ेतीक साइक्नीमी, मेकेर मेको पाप आ पर्बम चढ़ेतीके साइक्चा माल्ब। 34 मिनु चढ़ेबमी आ ब्रेप्चो हुशेमी ख्रुम्शा, चोशा चढ़ेतीक आ ग्रोव़पुकीम ख्रेक्चा माल्ब। मेको लीशो हुश चोशा चढ़ेतीक आ पुंम मोइक्चा माल्ब। 35 मेकोमी आ बोंसो नेल्ल दुशा बाक्चा आ पर्बम चढ़ेशो आ बोंसो खोदेंशो पा शोल्चा माल्ब। मिनु चढ़ेबमी मेको चढ़ेतीकेमी अरु चोशा चढ़ेतीक नु परमप्रभु यावे कली चोचा माल्ब। मोपा चढ़ेबमी मेको आ पशो पाप आ पर्बम पाप क्याम्तीक गेय पाइब। मिनु मेको माफ ताइब।