1 मिनु काबु नाइक्‍तीक नाक्‍ती मार दुम्‍माक्‍त देंशा हना, येसु फरिसी आ खिंमी खमे जथ लमाक्‍त। मिनु फरिसीपुकीम “मार पाइबा, मार शेंबा” दे योव़की पा बाक्‍मा बाक्‍त। लूका ६:६-११; लूका ११:३७ 2 मिनु मेकेर शुश ब्‍वाक्‍कुम ब्रीशा होम्‍शो रोइ पशो मुर का बाक्‍माक्‍त। 3 मिनु मेको रोइ पशो मुर येसु आ ङोंइती बाक्‍मेनु, येसुमी सास्‍त्री नु फरिसी आन कली “नाइक्‍तीक नाक्‍ती सापाइक्‍चा दुम्‍बा, दे मदुम्‍बा?” दे हिल्‍लो पामी बाक्‍त। 4 मेकोपुकीमी आ लोव़ मलेत्‍थु ब्‍वालेइ पा बाक्‍मा बाक्‍त। मिनु येसुमी रोइ पाइब कली थि‍शा, सापाइश्‍शा, आ खिं सोइक्‍ता बाक्‍त। 5 मिनु मेको योव़की पाइब आन कली “नाइक्‍तीक नाक्‍ती इन ब्‍यफ, इन गधा का इनारम बिक्‍त हना, मग्रुंइनीनी ङा?” दे हुइक्‍तीमी बाक्‍त। लूका १३:१५; मत्ती १२:११ 6 मिनु मारेइ लोव़ लेन्‍ने मचाप्‍मे बाक्‍त।

7 मिनु मेकेर खमे जथ जाक्‍शो शुशेमी ठेयब लेश्‍शा, ठेयब मुर आन नित्‍तीकेमी नित्‍चा माल्‍शो तशा मत्ती २३:६ 8 “जन्‍ती लनीनु, सम्‍दी नित्‍तीकेमी मनिस्‍सीन। हितोपदेस २५:६-७ 9 मारदे हना सम्‍दी जाक्‍मेनु, खिं ङा मुरुमी इन कली पोक्‍शा याक्‍पाइक्‍ब। मिनु सम्‍दी नित्‍तीकेमी सम्‍दी कली निप्‍पाइक्‍ब। इन कली चहिं वाइलपुकी नु निप्‍पाइक्‍ब। मिनु मुने दोक्‍नीनी। 10 जन्‍ती लनीनु, वाइल आन नित्‍तीकेम निस्‍सीने। मिनु खिं ङा मुरुमी इन कली वाइल नु निश्‍शो तशा ‘ए जन्‍तीपुकी, एक पिने’ दे ब्रेश्‍शा, इन कली मान पा ठेयब मुर नु निप्‍पाइक्‍ब। मिनु मेकेर बाक्‍बपुकीमी यो इन कली मान पाइ‍नीम। 11 मारदे हना ठेयब सुंइसीब कली मुरपुकीमी महिक्‍थु मान मपाइ‍नीमी। ठेयब मसुंइ‍सीब कली चहिं मुरपुकीमी ठेयब सेल्‍शा, मान पाइनीम” दे शेंदीमी बाक्‍त। लूका १८:१४; मत्ती २३:१२; याकूब ४:६,१०

12 मिनु खमे जथ ब्रेप्‍ब कली “गे जचा तूचा सेल्‍शा मान पा गेवीनु, आंम मुर वारचपुकी नु शोंप पाइश्‍शो मुर आन कली मब्रेत्‍तीमी। मारदे हना इ कली यो लेंशा ब्रेश्‍शा मान पा जचा गेशा, इ देदेङ लेत्‍नीम। 13 भोज पवीनु, प्रुङग आन कली कूंजी कुंजे, नु मिक्‍च मताइब आन कली ब्रेत्‍तीमी। ब्‍यवस्‍था १४:२९ 14 मिनु मेकोपुकीमी इ देदेङ लेन्‍ने मचाप्‍नीम। तन्‍न परमप्रभु यावेमी निसाफ पची ना इ पशो नेल्‍ले ताइनेवे” देंमाक्‍त। १कोरिन्‍थी १५:२३; प्रेरित २४:१५

15 मिनु मेकेर बाक्‍ब कामी येसु आ लोव़ नेंशा “सु परमप्रभु यावे आ राज्‍यम ओव़शा, जचा ख्रेत्‍चा पुंइसीबा, मेको ग्‍येरसेक्‍ल” देंमाक्‍त। लूका १३:२९ 16 मो देंब कली येसुमी “मुर कामी ठेयब भोज का गेचा कली, शुश मुर आन कली ब्रेत्‍ता बाक्‍त। 17 मिनु जचा तूचा सेल्‍शा, आ गेय पाइब का कली ‘जचा तूचा ठीक पाता। मुल जथ पिन’ दे ब्रेत्‍थ सोइक्‍ता बाक्‍त। 18 मिनु गेय पाइब लशा, खिं कामी जाक्‍दीश्‍शा ‘लो जथ पिने’ देंमेनु ‘गो रू ग्‍याप्‍ता। मुलाक्‍ती कोव़थ लङ देंती। मिनु पिचा मताइनुङ, देंत, देनो’ देंमाक्‍त। 19 मिनु अर्को आ खिंमी जाक्‍दीम्‍मेनु ‘गो ५ हाल ब्‍यफ ग्‍याप्‍ता। मिनु मुलाक्‍त ब्‍वाक्‍शा, कोव़थ लाइनुङ। मोपतीके गो पिचा मताइनुङ, देंत, देनो’ देंमाक्‍त। 20 मिनु अर्को खिं लमेनु, मेकोमी ‘गो ग्‍युंबे पाता। मिनु गो पिचा मताइनुङ’ देंमाक्‍त। का का पा ‘पिचा मताइनुङ’ दे मेको गेय पाइब कली लोव़ लेत्‍मे बाक्‍त। १कोरिन्‍थी ७:३३ 21 मिनु गेय पाइबमी मेको लोव़ नेल्‍ल आ होव़प कली शेंदा बाक्‍त। मिनु मेको गाइश्‍शा ‘मो हना गे सहर मेर हिरशा लावो। मिनु प्रुङग, कूंजी कुंजे, मिक्‍च मताइब नु गुइ खोइल मदुक्‍ब आन कली खुप्‍शा चाक्‍मी’ दे सोइक्‍ता बाक्‍त। 22 मिनु ब्रेत्‍थ लशा चाक्‍शा, आ होव़प कली ‘इन देंशो नेल्‍ल पाता, चिनु नित्‍तीकेम मुर मब्रीम’ देंमाक्‍त। 23 मिनु होव़पमी ‘नित्‍तीके मब्रीम सम्‍म मुर आन कली “जाक्‍कीन है, जाक्‍कीन” दे ब्रेश्‍शा चाक्‍मी। मिनु आं खिं ब्रील। 24 ङोंइती आं ब्रेश्‍शो सुइमी मारेइ यो जचा थोव़क थाम्‍चा मतामेक्‍ल’ ” देंमाक्‍त।

25 येसु गाक्‍मेनु, शुश मुरुमी आ नोले खोदमे बाक्‍त। मिनु येसुमी मेको आन कली कोव़शा 26 “सु सु गो नु बाक्‍चा दाक्‍नीमी, मेकोपुकीमी आम आफ, आंम मीश, आंम वोंइश, तमी तौ, लोक्‍बपुकी नु आंम कली यो ममिम्‍थु, आं नोले खोइय्‍यीमील। मारदे हना मेको मिम्‍बपुकीमी आं नोले खोइक्‍ने मचाप्‍नीम। लूका १८:२९-३०; ब्‍यवस्‍था ३३:९; १कोरिन्‍थी ७:२९ 27 सु सुमी आन श्‍येत कुरशा, आं कली मखोइक्‍नीमी, मेको आं शेंसीब दुम्‍ने मचाप्‍नीम। लूका ९:२३ 28 मार, गेपुकीमी लाइश्‍शो खिं सेल्‍चा क्‍येङा ङोंइती, सेल्‍ने थुम्‍चा कली क्‍येट जाक्‍दीप्‍बा देय मजाक्‍दीप्‍बा, दे हिसाब मपाइनीनी ङा? 29 हिसाब मपथु सेल्‍चा गोशा, खिं सेल्‍ने मथुम्‍थु क्‍येट नुप्‍त हना 30 ‘आ क्‍येट मजाक्‍दीत्‍थु, मार सेल्‍चा गोवा?’ दे शुक्‍शी पाइक्‍चा पुंइसीशा मुने दोक्‍सीब। 31 पिप काम आ बाक्‍शो १० हजार लडाइ पाइब लाइश्‍शा, २० हजार लडाइ पाइब बाक्‍शो पिप नु लडाइ पचा थुं पाप्‍तु हना, मेकोमी ग्राने चाप्‍नुङा देय मचाप्‍नुङा, दे ममिम्‍बा ङा? 32 ग्राने मचाप्‍नुङ, दे मिम्‍ताक्‍व हना, ङोन बाक्‍मानु ‘दुशा बाक्‍य’ दे लोव़सी पचा कली आ मुर सोइक्‍ब। 33 मोदेंशो पा गे यो आं नोले खोइक्‍चा क्‍येङा ङोंइती ‘खोइक्‍ने चाप्‍नुङा देय मचाप्‍नुङा’ दे मिम्‍तीने। गे नु बाक्‍शो मारेइ ममिम्‍थु, आं नोले खोइय्‍यीनी। ममिम्‍थु मचाप्‍नीनी हना, आं शेंसीब दुम्‍ने मचाप्‍नीनी। लूका ९:६२

34 हिक्‍सीम ब्रोव़पाइक्‍ब। तन्‍न आ ङाम्‍चा जाम्‍त हना, मारम मेको कली ङाम्‍पाइक्‍चा। मत्ती ५:१३; मर्कूस ९:५० 35 मेको ना रू कली दुम्‍बा, ना मुर कली दुम्‍बा। मोपतीके मुरुम मेको कली ताइक्‍नीम। सु के नोफा बाक्‍मे, मेकोमी नेनल” दे शेंदीमी बाक्‍त।