1 मिनु काबु येसुमी परमप्रभु यावे आ खिंमी बाक्‍शा, मुर आन कली ग्‍येरपाइक्‍तीक लोव़ शेंना शेंन बाक्‍मेनु, 2 ठेयब चढ़ेब, सास्‍त्री नु जोक्‍ब तुइक्‍ब खाल्‍पापुकीमी “तेको अधिकारमी मोदेंशो पवी? इ कली अधिकार गेब सु बाक्‍बा, लो देन” देंमा बाक्‍त। 3 मिनु येसुमी “गो इन कली लोव़ का हिल्‍लो पाइनुङ। मिनु आं हिल्‍लो पशो लोव़ लेत्‍तीने। 4 यूहन्‍नामी मुर आन कली ब्‍वाक्‍कुम ख्रुम्‍शा ग्रुंइतीक अधिकार स्‍वर्ग रे तवा देय मुरपुकी रे तवा?” दे हिल्‍लो पामी बाक्‍त। 5 मिनु मेकोपुकीमी “स्‍वर्ग रे तवा बाक्‍त देंतय हना, मो हना यूहन्‍ना आ लोव़ मारदे थमा मसुइक्‍नी? देंब। लूका ७:२९-३० 6 मुरपुकी रे तवा बाक्‍त देंतय हना, एकेर बाक्‍बपुकीमी इं कली फुल्‍लु आप्‍शा साइक्‍नीम। मारदे हना यूहन्‍ना परमप्रभु यावे आ लोव़ पाइब बाक्‍त, दे थमा सुइक्‍ब बाक्‍नीम” दे शुश मिम्‍शा लोव़सी पामे बाक्‍त। 7 मिनु शुश मिम्‍शा “यूहन्‍ना कली अधिकार सुमी गेवा सुम? गो मतुइक्‍नीकी” देंमा बाक्‍त। 8 मिनु येसुमी “मो हना तेको अधिकारमी एको गेय पङा, गो यो मशेंनन्‍नी” दे माइक्‍मी बाक्‍त।

9 मिनु मुर आन कली कथा सेल्‍शा “मुर कामी ठेयब रूमी अङगुर ख्रुमा बाक्‍त। मिनु नोले ‘गो रागी हिरथ लाइनुङ’ दे मिम्‍शा, आ रू बुम्‍था पाइब आन कली गेशा वोदा बाक्‍त। मिनु लशा, शुश नाक्‍त मलेम्‍माक्‍त। 10 अङगुर मीशा सेक्‍ची जाक्‍मेनु, होव़पमी आ गेय पाइब का कली ‘अङगुर योक्‍शा चाक्‍को’ दे ब्रथ सोइक्‍ता बाक्‍त। मिनु गेय पाइब जाक्‍दीम्‍मेनु, बुम्‍था पाइबपुकीमी तुप्‍शा, श्‍येत्‍थ सोइक्‍तमे बाक्‍त। २इतिहास ३६:१५-१६ 11 मिनु लेंशा अर्को गेय पाइब का कली सोइक्‍ता बाक्‍त। मेको कली तुप्‍शा मुने तोक्‍शा, श्‍येत्‍थ सोइक्‍तमे बाक्‍त। 12 मोपा यो लेंशा गेय पाइब का कली सोइक्‍ता बाक्‍त। मेको कली यो हुश यिथ्री तुप्‍शा खेरमे बाक्‍त। 13 मिनु नोले ‘मार पङ? मुल आं दाक्‍शो तौ कली सोइक्‍नुङ। मेको कली तशा मान पाइनीमी कों?’ दे मिम्‍ता बाक्‍त। मिनु आ तौ कली सोइक्‍ता बाक्‍त। 14 मिनु बुम्‍था पाइबपुकीमी आ तौ कली पिशो तशा ‘एको हक ताइब बाक्‍ब। लो, साइय्‍‍य। मिनु रू, अङगुर नेल्‍ल इं केन दुम्‍ब’ देंशा गारमा बाक्‍त। 15 मिनु रू रे ग्रुंइशा सदमे बाक्‍त। रू आ होव़पमी मोदेंशो पाइब आन कली मार पाइबा? 16 जाक्‍शा मेको बुम्‍था पाइब आन कली साइक्‍ब। मिनु आ रू अरु आन कली गेब” दे शेंदीमी बाक्‍त। आ लोव़ नेंबपुकीमी मेको कथा नेंशा “मोदेंशो मदुम्‍ल” देंमा बाक्‍त। 17 मिनु येसुमी आ लोव़ नेंब आन कली मिक्‍च मयाक्‍थु कोव़शा “परमप्रभु यावेमी ब्रेक्‍पाइश्‍शो एको लोव़ रे मार रुम्‍सीबा, लो देनीन ‘खिं सेल्‍बपुकीमी गारो प्रोव़ङमेनु, एको फुल्‍लु मगार’ दे ताइक्‍तमे बाक्‍त। मेको मगारथु ताइश्‍शो फुल्‍लु चहिं सुर ङा सुरे फुल्‍लु दुम्‍माक्‍त। भजन संग्रह ११८:२२ 18 सु मेको फुल्‍लु तारी थिप्‍बा, मेको खतम दुम्‍ब। मेको फुल्‍लुम सु कली चिप्‍ता, मेको फस दुम्‍ब” दे शेंदीमी बाक्‍त। दानीएल २:३४,३५,४४,४५ 19 मिनु ठेयब चढ़ेब नु सास्‍त्रीपुकीमी “इं कली कका एको कथा देंमाक्‍त” दे रुप्‍शा चुरशा, येसु कली ग्‍याइक्‍पाइक्‍चा माल्‍मे बाक्‍त। तन्‍न शुश मुरुमी आ लोव़ नेंशो तशा हिंमा बाक्‍त।लूका १९:४८

20 सास्‍त्री नु ठेयब चढ़ेबपुकीमी मुर योव़शा, येसु आ थुं नाक्‍शा, आ लोव़ खुइ पथ सोइक्‍तमे बाक्‍त। मारदे हना दोस गेशा हुकुम पाइब आ गुइमी गेचा माल्‍शो बाक्‍मा बाक्‍त। मेको सोइश्‍शोपुकीमी येसु आ लोव़ नेंशा, थमा सुइश्‍शो खोदेंशो प‍खु पामे बाक्‍त। लूका ११:५४; लूका २३:२ 21 मिनु मिलो शिलो पा “शेंब, गे रिम्‍शो शेंनीनी। सुइ कली तशा महिंथु, मुर आन कुल मकोव़थु, परमप्रभु यावे आ लोव़ थमा पा शेंनीनी। मुल लोव़ का शेंदीकी, 22 मार लोव़ देंशा हना, पिप सिजर कली तिरो थाप्‍चा माल्‍बा देय मथाप्‍थु यो दुम्‍बा?” दे हिल्‍लो पखु पा, लोव़ ख्राइक्‍पाइक्‍चा माल्‍मे बाक्‍त। 23 मिनु येसुमी मेको आन थुं ङा लोव़ तुइश्‍शा 24 “देनार का कोंइदीनी। एको सु का आ नेंमी ख्रोइश्‍शो बाक्‍मे?” देंमेनु “सिजर आ नेंमी ख्रोइश्‍शो बाक्‍त, हजुर” देंमा बाक्‍त। देनार का चांदी के क्‍येट बाक्‍त। मेको नाक्‍त का ङा गाल्‍च बाक्‍त। 25 मिनु प्रभु येसुमी “मो हना पिप सिजर आ मार मार बाक्‍मे, मेको सिजर कली गेने। परमप्रभु यावे आ मार मार बाक्‍मे, मेको परमप्रभु यावे कली गेने” देंमाक्‍त। रोमी १३:१,७ 26 मिनु मेकेर देल्‍शो मुर आन ङोंइती आ लोव़ ख्राइक्‍पाइश्‍शा मारेइ दोस गेने मचाप्‍मे बाक्‍त। आ लोव़ लेश्‍शो नेंशा छक लाक्‍शा सिक्‍सी पामे बाक्‍त।

27 मिनु सदुकीपुकी जाक्‍मा बाक्‍त। सदुकीपुकीमी “मुर बेक्‍शो रे मसेंसीनीम” दे शेंबाक्‍मा बाक्‍त। 28 मेको जाक्‍बपुकीमी येसु कली “शेंब, मोसामी ब्रेक्‍शो लोव़मी ‘मुर का आल मथिथु बेक्‍त हना, आ लोक्‍बमी आ भोग्‍यु वोंइसीशा, आ दाग्‍यु आ पा ङा खिं ङा मुर मजाम्‍मल, दे तमी तौ थिल’ दे ब्रेक्‍शो बाक्‍ब। ब्‍‍यवस्‍था २५:५-६ 29 साइ ७ जना लोक्‍ब बाक्‍मा बाक्‍त। मिनु जेठाम ग्‍युंबे पवा बाक्‍त। मिनु आल मथिथु बेक्‍माक्‍त। 30 मिनु माइलामी आ भोग्‍यु वोंइसे बाक्‍त। मिनु मेको यो आल मथिथु बेक्‍माक्‍त। 31 मिनु साइलाम आ भोग्‍यु वोंइसे बाक्‍त। मेको यो आल मथिथु बेक्‍माक्‍त। मोदेंशो पा ६ जनामी आन भोग्‍यु वोंइसीशा, आल मथिथु बेक्‍मा बाक्‍त। 32 नोले मेको मीश मुर यो बेक्‍माक्‍त। 33 मुर बेक्‍शो रे सेंसीशा ब्रोंइमानु, मेको ७ जना वोंइश आन मीश दुम्‍शो मीश मुर तेको आ मीश दुम्‍बा?” दे हिल्‍लो पामे बाक्‍त। 34 मिनु येसुमी मेको आन कली “एको रागीमी बाक्‍मानु, मुरपुकीमी ग्‍युंबे पांइसीनीम। ग्‍युंबे पा गेनीम। 35 तन्‍न बेक्‍शो रे सेंसीशा परमप्रभु यावे नु बाक्‍चा शिरशोपुकी ग्‍युंबे मपांइसीनीम, ग्‍युंबे पा यो मगेनीम। 36 मेकोपुकी गेनायो मबेक्‍ब दुम्‍शो बाक्‍नीम। बेक्‍शो रे सेंसीशा, परमप्रभु यावे आ स्‍वर्ग ङा गेय पाइबपुकी खोदेंशो दुम्‍नीम। मेकोपुकी परमप्रभु यावे आ तमी तौ बाक्‍नीम। १यूहन्‍ना ३:१-२ 37 बेक्‍शो रे सेंसीशा ब्रोंइचा तांइसीब, दे इं किकी पिपी मोसामी अरु आन कली तुइक्‍पदा बाक्‍त। दोपा तुइक्‍पदा बाक्‍त देंशा हना, परमप्रभुमी मोसा कली मी ब्रशो बुटा रे तपांइसेनु, मोसामी परमप्रभु यावे कली ‘गे अब्राहाम, इसहाक नु याकूब आ परमप्रभु यावे ननी’ दे ब्रेत्‍ता बाक्‍त। प्रस्‍थान ३:६ 38 परमप्रभु यावे बेक्‍शो मुर आन परमप्रभु ममाइ। ब्रोंइशो आन परमप्रभु यावे बाक्‍ब। मारदे हना परमप्रभु यावे आ ङोंइती नेल्‍ल ब्रोंइशो बाक्‍नीम” देंमाक्‍त। रोमी १४:८ 39 मिनु सास्‍त्री का निक्‍शीमी “शेंब, गे रिम्‍शो शेंताक्‍नी” देंमा बाक्‍त। 40 मारदे हना सदुकीपुकीमी लेंशा हिल्‍लो पचा हिंशा सिक्‍सी पामे बाक्‍त।

41 मिनु येसुमी मेकेर बाक्‍ब आन कली “ख्रीस्‍त दाऊद आ तौ बाक्‍ब, दे दोपा देंनीमी? 42 मारदे हना दाऊद आ ब्रेक्‍शो भजन संग्रह माइश्‍शो कुम्‍सो किताबम 43 ‘प्रभुमी आ प्रभु कली इ जोरी सत्रु आन कली इ खोइल थेक्‍तीके मसेलु सम्‍म आं ग्‍युरा गे बाक्‍को’ दे ब्रेक्‍ताक्‍व। भजन संग्रह ११०:१ 44 दाऊदमी मेको कली ‘प्रभु’ देंब। मिनु दोपा आ तौ दुम्‍मे? लो, देनीन” देंमाक्‍त।

45 मेकेर बाक्‍ब शुश मुरुमी येसु आ लोव़ नेन्‍मे बाक्‍त। मिनु येसुमी आ शेंसीब आन कली 46 “लाइश्‍शो वा फेक्‍शा एर ओंथ गाक्‍ब, बजार मेर गाक्‍मानु, सेउ ताक्‍चा दाक्‍ब, ग्रुम्‍तीक खिं लशा, ठेयब नित्‍तीकेम नित्‍चा दाक्‍ब नु भोजमी लशा, मान ताइब आन नित्‍तीकेम नित्‍चा माल्‍ब, सास्‍त्री आन कली तशा होस पा बाक्‍कीन। लूका ११:४३ 47 मेकोपुकीमी वोंइश बेक्‍शो मीश मुर आन खिं रोइक्‍नीमी, दुइश्‍शो प्रार्थना पा कोंइखु पाइनीम। मोदेंशो पाइबपुकी अरु आन क्‍येङा शुश सजाइ ताइनीम” देंमाक्‍त।