1 जोक्‍ब तुइक्‍ब मीश मुरुमी आंम खिं रिम्‍शो सेल्‍ब। तन्‍न मूर्ख मीश मुरुमी आ खिं कली आंम गुइमी प्रेप्‍ब। 2 सु रिम्‍शो थुं पाइश्‍शो मुर बाक्‍मे, मेकोमी परमप्रभु यावे कली मान पा हिंब। तन्‍न सु हेंथे गाक्‍बा, मेको मुरुमी परमप्रभु यावे कली मदाक्‍ब। 3 मूर्ख आन लोव़मी आंम आन कली तेप्‍ब। तन्‍न जोक्‍ब तुइक्‍ब मुर आन लोव़मी मेको आन कली कोव़ब। 4 ब्‍यफ मबाक्‍त हना, अन्‍न वोइक्‍तीके श्‍येत्‍थ बाक्‍ब। तन्‍न बोल्‍यो ब्‍यफ पाइश्‍शो मुर के शुश अन्‍न बाक्‍ब। 5 थमा लोव़ पाइब सांकछीमी जोल मपाइब। तन्‍न जोल पाइब सांकछीमी जोल पना पन बाक्‍ब। प्रस्‍थान २०:१६; प्रस्‍थान २३:१ 6 शुक्‍शी पाइबमी तुइक्‍तीके माल्‍ना माल्‍न बाक्‍त हना यो, मथिप्‍ब। रुप्‍ब मुर मोशा जोक्‍ब दुम्‍नीम। 7 मूर्खपुकी नु मगाक्‍को। मारदे हना मेकोपुकी नु जोक्‍‍तीक लोव़ मबाक्‍ब। 8 निप्‍स पाइश्‍शो मुर आन तुइक्‍‍तीकेमी तेको लां गाक्‍चा माल्‍नीमी तुइक्‍नीम। तन्‍न मूर्ख आन मूर्ख पतीकेमी हेंथे लां कोंइब। 9 मूर्खमी पाप आ पर्बम चढ़ेतीके कली शुक्‍शी पाइनीम। तन्‍न रिम्‍शो थुं पाइश्‍शो मुरुमी परमप्रभु आ दाक्‍शो तशा ग्‍येरब। 10 थुं ङा श्‍येत थुंम ला तुइक्‍ब। मिनु थुं आ ग्‍येरसीशो थुंमी ला तुइक्‍ब। रोमी १२:१५ 11 परमप्रभु यावे आ अरेशो मटीब आ खिं प्रेत्‍चा पुंइसीब। तन्‍न रिम्‍शो थुं पाइश्‍शो मुर आन ताम्‍बु सोशो बोशो दुम्‍शा लाइब। हितोपदेस १२:७ 12 मुर आन कली आंम पशो लां ठीक तांइसीब हना यो, नोले मेको बेक्‍पाइक्‍ब लां बाक्‍‍ब। 13 मुर आ कुल रिस्‍साक्‍व हना यो, आ थुं खाइश्‍शो बाक्‍ने चाप्‍ब। ग्‍येरसीशो थुं नोले सुर्ता पाइब बाक्‍ब। 14 दूली पाइब आन दूली पशो ङा ताइनीम। मिनु रिम्‍शो पाइबमी आन रिम्‍शो पशो ङा ताइनीम। 15 मारेइ मजोक्‍ब मुरुमी मारेइ मारेइ लोव़ थमा सुइक्‍ब। तन्‍न निप्‍स पाइश्‍शो मुरुमी आन पशो नेल्‍ल मिम्‍नीम। 16 जोक्‍बपुकी होस पा मरिम्‍शो पतीक रे ङोन लाइनीम। तन्‍न मूर्ख मारेइ ममिम्‍थु, होस मपाइब। 17 रीब पा गाइक्‍ब मुरुमी मूर्खे गेय पाइब। मिनु मुर आन कली दोपा श्‍येत गेङा, दे मिम्‍ब। मेको सुइम मदाक्‍चा पुंइसीब। 18 मारेइ मजोक्‍ब मूर्खे गेयम ग्‍योम्‍सीशो बाक्‍नीम। तन्‍न निप्‍स पाइश्‍शो मुर जोक्‍तीके सिरपेच गुप्‍शो खोदेंशो बाक्‍‍नीम। 19 मरिम्‍शो पाइब मुरपुकी रिम्‍शो मुर आन ङोंइती बाप्‍नीम। मिनु परमप्रभु यावे आ अरेशो मटीबपुकी ठीक पाइब आन लाप्‍चोमी बाप्‍नीम। 20 आंम नेक्‍था ङा मुरुमी प्रुङग कली मदाक्‍नीम। तन्‍न शोंप पाइश्‍शो मुर आन के वारच शुश बाक्‍नीम। 21 सुम आ नेक्‍था ङा मुर कली दिप्‍बा, मेकोमी पाप पाइब। तन्‍न सुमी प्रुङग आन कली वारच पाइबा, मेको ग्‍येरसीशो मुर बाक्‍ब। भजन संग्रह ४१:२ 22 मार, मरिम्‍शो मिम्‍शा पाइब हेंथे लां मगाक्‍नीमी, ङा? रिम्‍शो पचा मिम्‍शा पाइबमी गेना हना यो दाक्‍शा मप्रोंइचा पुंइसीनीम। 23 गेय पतीक नेल्‍लेमी दारतीक बाक्‍ब। तन्‍न लोव़ पा ला बाक्‍ब मुर प्रुङग दुम्‍ब। 24 जोक्‍ब मुर आन तुइक्‍तीके आन सिरपेच खोदेंशो बाक्‍ब। तन्‍न मूर्ख आन पशो आन माला खोदेंशो बाक्‍ब। 25 थमा सांकछीमी मुर आन कली प्रोंइब। तन्‍न जोल पाइब सांकछीमी जोल ला पाइब। 26 परमप्रभु यावे कली मान पा हिंचा, मेको मुर आ ख्रुइश्‍शा ब्रोंइशा बाक्‍तीक बाक्‍ब। मेको आ आलपुकीमी यो मेको ताइनीम। हितोपदेस १८:१० 27 परमप्रभु यावे कली मान पा हिंचा ब्‍वाक्‍कु बुक्‍तीक खोदेंशो पा ब्रोंइतीक बाक्‍ब। मेको रे पा मुरपुकी बेक्‍पाइक्‍ब आ ब्‍वारद रे ब्रोंइनीम। 28 पिप आ दारस आ रागी ङा शुश मुर बाक्‍नीम। तन्‍न मुर नुप्‍तेक्‍म हना, हुकुम पाइब जाम्‍शा लाइब। 29 रीब पा मगाइक्‍ब शुश रुप्‍ब मुर बाक्‍ब। तन्‍न रीब पा गाइक्‍ब मुर मूर्ख दुम्‍शा लाइब। हितोपदेस १६:३२; हितोपदेस १९:११ 30 नांइसीशो थुंमी मुर आन कली ब्रोंइचा गेब। तन्‍न गेहेमी मुर आन रुश मुपाइक्‍ब। 31 सुम प्रुङग आन कली दिप्‍बा, मेकोमी प्रुङग आन कली सेल्‍ब कली शुक्‍शी पाइब। तन्‍न सुमी प्रुङग आन कली शिशी पाइबा, मेकोमी परमप्रभु यावे कली मान पाइब। हितोपदेस १७:५; अय्‍युब ३१:१३-१५; मत्ती २५:४० 32 परमप्रभु यावे आ अरेशो मटीबपुकी मरिम्‍शो पतीकेमी जाम्‍शा लाइनीम। तन्‍न ठीक पाइब मुर आंम आन गेना हना यो रिम्‍शो पतीकेमी ब्रोंइशा बाक्‍चा ताइनीम। 33 रुप्‍ब मुर नु तुइक्‍तीक बाक्‍ब। तन्‍न मूर्ख आन थुंमी तुइक्‍तीक मथिंसीब। 34 रागीम ठीक पाइब शुश बाक्‍तेक्‍म हना, मेकोपुकीम मेको रागी ठेयब नु रिम्‍शो सेल्‍नीम। तन्‍न मरिम्‍शो पाइब शुश बाक्‍तेक्‍म हना, मेको रागी कली महिक्‍सीशो सेल्‍नीम। 35 पिपमी जोक्‍‍शा गेय पाइब कली दाक्‍ब। तन्‍न मुने पचा ङा गेय पाइबमी पिप आ गाइश्‍शो ङा सजाइ ताइब। उत्‍पत्ती ४१:३७-४०