1 आं परमप्रभु, गे आं पिप बाक्‍नीनी। गो इन कली मान पाइनुङ। इन नें गेना हना यो ठेयब सेल्‍नुङ। 2 गो इन कली नाक्‍त किंत किंत ठेयब सेल्‍नुङ। गो इन नें गेना हना यो ठेयब सेल्‍नुङ। 3 परमप्रभु यावे ठेयब बाक्‍ब। मेको ठेयब सेल्‍चा शिरशो बाक्‍ब। मिनु मेको आ ठेयब दुम्‍तीके सुइमी रुप्‍ने मचाप्‍नीम।

4 पाला का ङा मुरुम आन नोले ङा पाला ङा मुर आन कली “इन गेय ठेयब बाक्‍नीम” दे शेंचा माल्‍नीम। मेकोपुकीमी इन सक्ति पाइश्‍शो गेय आ पर्बम लोव़ पचा माल्‍नीम। 5 आं पिप, गो इन शुश दारस ङा मान ततीके नु इन छक लाक्‍चा ङा गेय आ पर्बम मिम्‍ना मिम्‍न बाक्‍नुङ। भजन संग्रह १९:२-७ 6 मुरपुकीमी इन ठेयब सक्ति आ पर्बम लोव़ पचा माल्‍नीम। मिनु गो इन ठेयब दुम्‍तीके आ पर्बम शेंनुङमी। 7 मेकोपुकीमी इन शुश रिम्‍शो पतीके आ पर्बम चाड मानेचा माल्‍नीम। मिनु इन ठीक पतीके आ पर्बम ठेयब सेंदा पा कुम्‍सो पचा माल्‍नीम।

8 परमप्रभु यावे दाक्‍ब नु शिशी पाइब बाक्‍ब। मेको रीब पा मगाइक्‍ब। मिनु मेको आ गेना हना यो दाक्‍तीके ठेयब बाक्‍ब। प्रस्‍थान ३४:६ 9 परमप्रभु यावे नेल्‍ल आन कली रिम्‍शो पाइब बाक्‍ब। मिनु आ सेल्‍शो नेल्‍ल आन कली शिशी पाइब। 10 परमप्रभु यावे, इन सेल्‍शो मारेइ मारेइमी इन कली “गे रिम्‍शो पाइब बाक्‍नीनी” देंचा माल्‍नीम। मिनु इन कली थमा सुइक्‍बपुकीमी ठेयब सेल्‍चा माल्‍नीम। 11 मेकोपुकीमी इन राज्‍य ङा रिम्‍शो दुम्‍तीके आ पर्बम लोव़ पचा माल्‍नीम। इन सक्ति आ पर्बम लोव़ पचा माल्‍नीम। 12 मेकोपुकीमी इन ठेयब सक्ति पाइश्‍शो गेय नु इन राज्‍य ङा दारस आ पर्बम मुर आन कली तुइक्‍पाइक्‍चा माल्‍नीम। 13 इन राज्‍य गेना हना यो लीब राज्‍य बाक्‍ब। इन सासन पतीके पाला पाला सम्‍म बाक्‍ब। परमप्रभु यावेमी आ देंशो नेल्‍ल पाइब। मिनु आ पशो मारेइ मारेइ शिशीम पाइब।

14 मिनु परमप्रभु यावेमी गोल्‍शो नेल्‍ल आन कली पोक्‍ब। मेकोमी आन थुं लुक्‍च लशो आन कली आन थुं बारपाइक्‍ब। भजन संग्रह १४६:८ 15 मारेइ मारेइमी इन गे कोव़नीम। मारदे हना गे मेको आन कली आन जची ना जचा थोव़क गेनीनी। भजन संग्रह १०४:२७-२८; भजन संग्रह १३६:२५ 16 गे हाइश्‍शो दुम्‍शा, ब्रोंइब नेल्‍ल कली रूपाइक्‍नीनी। 17 परमप्रभु यावे नेल्‍ल ठीक पाइब बाक्‍ब। मिनु आ गेय नेल्‍ले शिशीम पाइब। 18 परमप्रभु यावे आ कली पुंइब नेल्‍ल आन नेक्‍था बाक्‍ब। सु सुमी मेको कली थमा पा पुंइनीमी, मेको आन नेक्‍था बाक्‍ब। 19 मेकोमी आ कली मान पा हिंब नेल्‍ल आन दाक्‍शो गेब। मेकोमी मेको आन पुंइशो नेंब। मिनु मेको आन कली श्‍येत रे प्रोंइब। हितोपदेस १०:२४ 20 परमप्रभु यावेम आ कली दाक्‍ब नेल्‍ल आन कली कोव़ब। तन्‍न मेकोमी आ अरेशो मटीब नेल्‍ल आन कली खतम पोक्‍ब।

21 गो परमप्रभु यावे कली ठेयब सेल्‍शा, लोव़ पाइनुङ। सोक्‍त पाइश्‍शो नेल्‍लेमी मेको कली गेना हना यो ठेयब सेल्‍नीम।