1 يِ قٍ تِنشِنشِيٍ دَنفِ شَنبِ، عَسِرِ مَنفّ سٍنَشٍرِبِ نَشَ سٌ يُدَيَ بْشِ مَ، عَ نَشَ تَا مَكَنتَشِيٍ مَبِلِن عَ شَ عٍ سْتْ. 2 شٍسٍكِيَ تٌ عَ كٌلٌن عَ سٍنَشٍرِبِ وَ مَ دَرِ سَلَمُ فٍرٍقٍ نّ، 3 عَ نَشَ كُنتِفِيٍ نُن سْورِ حَلَمَيٍ مَشِلِ. عٍ نَشَ نَتّ تٌنفٌ عٍ شَ يٍ بَدٍيٍ دّ سّ نَشٍيٍ نَ تَا قَرِ مَ. 4 مِشِ فبٍفبٍ نَشَ نَ وَلِ سُشُ، عٍ نَشَ كْلْنيِيٍ دّ سّ، عٍ يٍ كِرَيٍ دّ سّ نَشٍيٍ نُ كٍلِمَ بْشِ بُن مَ. عٍ نَشَ عَ قَلَ، «مُنقٍ رَ وٌن عَ لُمَ عَسِرِ مَنفّيٍ شَ يٍ سْتْ بٍ؟» 5 شٍسٍكِيَ نَشَ وَلِ سُشُ سّنبّ رَ. عَ نَشَ تّتّ يَءِلَن دّننَشّ نُ كَنَشِ، عَ نَشَ ندٍ سَ عَ شَ مَءِتٍ شُن مَ، هَن عَ سَ سْورِيٍ شَ يِرٍ مَكَنتَشِ لِ، عَ نَشَ تّتّ فبّتّ تِ تّتّ سِنفٍ قَرِ مَ، عَ نَشَ مِلٌ يَءِلَن دَوُدَ شَ تَا كُي، عَ نَشَ فٍرٍ سٌسٍيٍ نُن وُرٍ لٍقَ فبٍفبٍ مَلَن. 6 عَ نَشَ سْورِ شُنيِيٍ تِ حَمَ شُن، عَ قَ حَمَ مَلَن تَا سٌدٍ دّ رَ. عَ نَشَ عَ مَسٍن عٍ بّ، 7 «وٌ لِمَنِيَ، وٌ وٌ سّنبّ سٌ. فَاشُي يٌ نَشَ لُ وٌ يِ رَ، وٌ نَشَ كْنتْقِلِ عَسِرِ مَنفّ شَ قٍ رَ، عَ نُن عَ شَ سْورِ فَلِ. نَشَن نَ وٌن سّيتِ مَ نَ فبٌ دَنفِقٍ سٍ بّ نَشَن نَ عَ تَن سّيتِ مَ. 8 عَدَ مَ سّنبّ فبَنسَن نَن نَ عَ يِ رَ، كْنْ وٌن مَرِفِ عَلَتَلَ نَن نَ وٌن مَلِمَ رَ يِ فٍرٍ كُي.» حَمَ نَشَ عٍ شَشِلِ تِ يُدَيَ مَنفّ شٍسٍكِيَ شَ مَسٍنيِ رَ.

9 نَ تٌ دَنفِ، عَسِرِ مَنفّ سٍنَشٍرِبِ نَشَ شّيرَيٍ شّي دَرِ سَلَمُ. نَ تّمُي عَ تَن نُ نَ لَكِسِ فٍرٍقٍ نُن عَ شَ سْورِ بِرِن نَ. عَ نَشَ يِ شّيرَيَ رَ سِفَ يُدَيَ مَنفّ شٍسٍكِيَ مَ، عَ نُن يُدَيَ مِشِيٍ مَ نَشٍيٍ نُ سَبَتِشِ دَرِ سَلَمُ. 10 «سٍنَشٍرِبِ شَ مَسٍنيِ نَن يَ؛ وٌ شَشِلِ تِشِ مُنسٍ رَ نَشَن عَ نِيَمَ وٌ شَ دْشْ تْورّ كُي دَرِ سَلَمُ؟ 11 شٍسٍكِيَ نَ وٌ مَدَشُقٍ نّ عَ قَلَقٍ رَ، ‹وٌن مَرِفِ عَلَتَلَ قَمَ وٌن نَتَنفَدٍ عَسِرِ مَنفّ بّلّشّ مَ.› عَ وَ مَ نّ وٌ شَ قَشَ كَامّ نُن يٍ شْلِ مَ. 12 شٍسٍكِيَ يَتِ بَرَ عَلَ بَتُدٍيٍ نُن سّرّشّبَدٍيٍ كَنَ، عَ قَ عَ قَلَ يُدَيَ نُن دَرِ سَلَمُ بّ وٌ شَ وٌ تُوبِ سّرّشّبَدٍ كٍرٍن نَن فبَنسَن بّ، وٌ شَ سُرَيِ فَن مّننِ. 13 وٌ مُ عَ كٌلٌن شّ مُشُ نَشَن نَبَ سِ فبّتّيٍ رَ، ﭑ تَن نُن ﭑ بَبَيٍ؟ نَ سِيٍ شَ عَلَيٍ بَرَ نْ عٍ رَتَنفَدٍ ﭑ بّلّشّ مَ؟ 14 عَلَ مُندُن نَ سِيٍ يَ مَ، ﭑ بَبَيٍ نَشٍيٍ رَتْن، نَشٍيٍ بَرَ نْ عَ شَ حَمَ رَتَنفَدٍ ﭑ بّلّشّ مَ؟ مُنقٍ رَ وٌ عَ مَحْشُنشِ عَ وٌ شَ عَلَ نْمَ وٌ رَتَنفَدٍ ﭑ مَ؟ 15 وٌ نَشَ عَ لُ شٍسٍكِيَ شَ وٌ مَدَشُ نَ كِ دٍ. وٌ نَشَ لَ عَ رَ، بَرِ مَ سِ شَ عَلَ يٌ مُ نْ عَ شَ حَمَ رَتَنفَدٍ ﭑ بّلّشّ مَ نُن ﭑ بَبَيٍ بّلّشّ مَ. مَنفّيَ يٌ مُ نْ مُشُ رَ. وٌ شَ عَلَيٍ قَن مُ قَمَ وٌ رَتَنفَدٍ ﭑ بّلّشّ مَ.»

16 سٍنَشٍرِبِ شَ شّيرَيٍ نَشَ نَ وْيّنيِ مْولِ شُن مَسَ عَلَتَلَ نُن عَ شَ كٌنيِ شٍسٍكِيَ شِلِ مَ. 17 سٍنَشٍرِبِ نُ بَرَ بَتَاشّ سّبّ نَشَن عِسِرَيِلَ مَرِفِ عَلَتَلَ كٌنبِمَ يِ وْيّنيِ رَ، «سِ فبّتّيٍ شَ عَلَيٍ تٌ مُ نْ عٍ رَتَنفَدٍ ﭑ بّلّشّ مَ، شٍسٍكِيَ شَ عَلَ قَن مُ نْمَ عَ شَ حَمَ رَتَنفَدٍ ﭑ بّلّشّ مَ.» 18 عٍ نَشَ وْيّن عٍبُرُ شُي رَ دَرِ سَلَمُكَيٍ بّ نَشٍيٍ نُ نَ تّتّ كْن نَ عَلَكٌ فَاشُي شَ لُ عٍ يِ رَ، عٍ شَ تَا مَسْتْ. 19 عٍ نَشَ دَرِ سَلَمُ مَرِفِ عَلَ مَنِيَ سِ فبّتّيٍ شَ عَلَيٍ رَ، نَشٍيٍ قِندِشِ كُيٍ يَءِلَنشِيٍ رَ.

20 مَنفّ شٍسٍكِيَ نُن عَمٌسِ شَ دِ عَننَبِ عٍسَيِ نَشَ عَلَ مَشَندِ قْلْ مَلِ رَ. 21 نَ كُي عَلَتَلَ نَشَ مَلٍكّ ندٍ شّي عَسِرِ مَنفّ شَ سْورِ حَلَمَيٍ شِلِ مَ، عَ عٍ بِرِن سْنتْ عَ نُن عٍ شَ يَرٍرَتِيٍ. مَنفّ تٌ نَ تٌ، عَ نَشَ فبِلٍن عَ شْنيِ يَافِ كُي. عَ نَشَ سٌ عَ شَ عَلَ شَ بَنشِ كُي، عَ يّتّ شَ دِيٍ نَشَ عَ قَشَ مّننِ سَنتِدّفّمَ رَ. 22 عَلَتَلَ شٍسٍكِيَ نُن دَرِ سَلَمُكَيٍ رَتَنفَ عَسِرِيَ مَنفّ سٍنَشٍرِبِ بّلّشّ مَ نَ كِ نّ. عَلَ نَشَ عٍ رَتَنفَ عٍ دْشْبٌورٍ بِرِن مَ. 23 مِشِ فبٍفبٍ نَشَ قَ بُحَ قَنيِيٍ رَ دَرِ سَلَمُ عَلَتَلَ نُن يُدَيَ مَنفّ شٍسٍكِيَ بّ. كٍلِ نَ تّمُي مَ شٍسٍكِيَ شِلِ نَشَ تٍ سِ بِرِن يَ مَ.

24 نَ وَشَتِ شٍسٍكِيَ نَشَ قُرَ، عَ فبٍ مُ لُ عَ شَ لَاشِرَيَ. عَ تٌ عَلَتَلَ مَشَندِ، عَلَتَلَ نَشَ عَ شَ دُبّ سُشُ، عَ كَابَنَكٌ رَبَ. 25 كْنْ شٍسٍكِيَ مُ نَ كَابَنَكٌ كٌلٌن عَلَتَلَ بّ، عَ عَ يّتّ عِفبٌ. نَ نَ عَ رَ عَلَتَلَ نَشَ شْنْ عَ تَن نُن يُدَيَ نُن دَرِ سَلَمُ مَ. 26 شٍسٍكِيَ نَشَ تُوبِ عَ شَ يّتّ عِفبٌي شَ قٍ رَ. دَرِ سَلَمُكَيٍ قَن نَشَ تُوبِ. نَ كُي عَلَتَلَ شَ شْنّ نَشَ فبِلٍن عٍ قْشْ رَ شٍسٍكِيَ شَ مَنفّيَ بُن مَ.

27 شٍسٍكِيَ شَ نَاقُلِ نُن عَ شَ بِنيّ نُ بَرَ فبٌ. فبٍتِ، شّيمَ، فّمّ تٌقَنيِيٍ، سُرَيِ، وُرٍ لٍقَيٍ، نُن سٍ قَنيِ فبّتّيٍ نُ نَ عَ يِ رَ. 28 بَنشِيٍ قَن نُ نَ عَ يِ رَ، عَ نُ مّنفِ، وّنِ نّينّ، تُرٍ، نُن شُرُ سٍيٍ رَفَتَمَ دّننَشّ. 29 عَ نَشَ تَايٍ تِ، عَ نَشَ شُرُ سٍ شُنفبٍيٍ نُن عَ لَنمَيٍ فبٍفبٍ سْتْ عَلَ سَابُي رَ. 30 شٍسٍكِيَ مَن نَشَ فِشٌن دُلٌنيِ دّ سّ قُفٍ رَ، عَلَكٌ نَ يٍ شَ دَنفِ دَوُدَ شَ تَا سٌفٍفٌرٌدٍ مَبِرِ. عَ شَ وَلِ بِرِن سْونّيَ نّ.

31 كْنْ بَبِلْن كُنتِفِ ندٍيٍ تٌ قَ شٍسٍكِيَ يِرٍ كَابَنَكٌ شَ قٍ رَ نَشَن نَبَ عَ شَ بْشِ مَ، عَلَ نَشَ عَ رَبٌلٌ عَ يّتّ شَ نَ يَ عِبَ، عَلَكٌ عَ شَ عَ بْحّ مَ قٍ كٌلٌن.

32 شٍسٍكِيَ شَ تَرُشُي دْنشْي نُن عَ شَ دُفُتّفّحَ وَلِ، نَ بِرِن سّبّشِ عَمٌسِ شَ دِ عَننَبِ عٍسَيِ شَ لَامَتُنيِ كُي، عَ نُن عِسِرَيِلَ نُن يُدَيَ مَنفّ شَ تَرُشُي كُي. 33 شٍسٍكِيَ نَشَ لَاشِرَيَ، عٍ عَ رَفَتَ بِنيّ يِرٍ دَوُدَ شَ دِيٍ شَ فَبُرِيٍ يَ مَ. يُدَيَكَيٍ نُن دَرِ سَلَمُكَيٍ بِرِن نَشَ عَ بِنيَ عَ لَاشِرَيَ تّمُي. عَ شَ دِ مَنَسِ نَشَ تِ عَ حْشْي رَ.