1 نَ شِ سَشَن ندٍ مَ، قُتِشِرِ شُلُنيِ ندٍ نَشَ رَبَ كَانَ، نَشَن نَ فَلِلٍ بْشِ مَ. عِسَ نفَ نُ نَ نَ شُلُن مِشِيٍ يَ مَ. 2 عِسَ قَن نُ شِلِشِ نَا، عَ نُن عَ قْشِرَبِرّيٍ. 3 وّنِ تٌ حْن، عِسَ نفَ نَشَ عَ قَلَ عَ بّ، «وّنِ بَرَ حْن يِ مِشِيٍ يِ رَ.» 4 عِسَ نَشَ عَ مَشْرِن، «ﭑ نفَ، عِ وَ مَ مُنسٍ شْن مَ ﭑ نَ؟ ﭑ مَ وَشَتِ مُ نُ عَ لِ سِندٍن.» 5 عَ نفَ نَشَ عَ قَلَ بَنشِ كٌنيِيٍ بّ، «عَ نَ نَشَن يٌ قَلَ وٌ بّ، وٌ عَ رَبَ.»

6 قّحّ سٍننِ فّمّ دَاشِ نُ نَ مّننِ، نَشٍيٍ رَقٍمَ يٍ رَ يُوِقِيٍ عٍ يّتّ رَ سّنِيّنمَ نَشَن نَ. لِتِرِ تٌنفٌ سٌلٌمَسَشَن هَن لِتِرِ كّمّ مْشْحّن نُ نْمَ سَدٍ قّحّ كٍرٍن كُي. 7 عِسَ نَشَ عَ قَلَ كٌنيِيٍ بّ، «وٌ يِ قّحّيٍ رَقٍ يٍ رَ.» عٍ نَشَ عٍ بِرِن نَقٍ تَثُ. 8 عَ مَن نَشَ عَ قَلَ عٍ بّ، «يَكْسِ، وٌ عَ ندٍ بَ، وٌ عَ شَنِن شُلُن شُنيِ شْن مَ.» عٍ نَشَ نَ قَن نَبَ. 9 شُلُن شُنيِ تٌ نَ يٍ مِن عِسَ نُ بَرَ نَشَن مَقِندِ وّنِ رَ، عَ مُ نُ عَ كٍلِدٍ كٌلٌن، كْنْ كٌنيِ نَشٍيٍ يٍ بَشِ، نٍيٍ تَن عَ كٌلٌن. عَ تٌ عَ مِن، عَ نَشَ فِنّقٍنيِ شِلِ، 10 عَ عَ قَلَ عَ بّ، «شُلُن كَنيِ بِرِن وّنِ قَنيِ نَن سِنفٍ رَ مِنِمَ، مِشِيٍ نَ سِيسِ، عٍ قَ وّنِ فبّتّ رَ مِنِ. كْنْ عِ تَن بَرَ وّنِ قَنيِ رَفَتَ هَن يِ تّمُي!»

11 نَ نَشَ قِندِ عِسَ شَ تْنشُمَ سِنفٍ رَ. عَ عَ رَبَ كَانَ نّ، فَلِلٍ بْشِ مَ. نَ قٍ كُي، عَ عَ شَ نْرّ نَن مَكّنّن، عَ قْشِرَبِرّيٍ نَشَ لَ عَ رَ.

12 نَ شَنبِ، عَ نَشَ سَ فٌرٌ كَثّرّنَمُ، عَ نُن عَ نفَ، عَ شُنيَيٍ، نُن عَ قْشِرَبِرّيٍ. عٍ نَشَ سَ شِ ندٍيٍ رَدَنفِ نَا.

13 يُوِقِيٍ شَ سَيَمَلٍكّ دَنفِ سَلِ تٌ مَكْرّ، عِسَ نَشَ تٍ دَرِ سَلَمُ. 14 عَ نَشَ سَ لِ، نِنفٍ، يّشّي، نُن فَنبّ مَتِيٍ نُ نَ هْرْ مْبَنشِ يِرٍ، كْبِرِ مَسَرّيٍ قَن نُ دْشْشِ نَا. 15 عِسَ نَشَ لُوتِ ندٍيٍ يَءِلَن لُشُسِنيِ رَ، عَ يُلّيٍ بِرِن كٍرِ هْرْ مْبَنشِ كُي، عَ نُن عٍ شَ نِنفٍيٍ نُن يّشّييٍ. عَ نَشَ كْبِرِ مَسَرّيٍ شَ كْبِرِ رَيٍنسٍن بْشِ، عَ عٍ شَ تٍيبِلِيٍ رَبِرَ. 16 عَ نَشَ عَ قَلَ فَنبّ مَتِيٍ قَن بّ، «وٌ يٍيٍ تٌنفٌ بٍ! وٌ بَ ﭑ بَبَ شَ بَنشِ قِندِقٍ مَكِتِ رَ!» 17 عَ قْشِرَبِرّيٍ نَشَ رَتُ نَ كِتَابُي سّبّلِ مَ نَشَن عَ قَلَمَ، «شَنُنتٍيَ بَرَ فبٌ يّ ﭑ بْحّ كُي عِ شَ بَنشِ شَ قٍ رَ.»

18 نَ كُي، يُوِقِ كُنتِفِيٍ نَشَ عَ مَشْرِن، «عِ تْنشُمَ مَكَابَشِ مُندُن نَبَمَ نَشَن عَ مَسٍنمَ مُشُ بّ عَ عَ لَن عِ شَ يِ مْولِ رَبَ؟» 19 عِسَ نَشَ عٍ يَابِ، «وٌ يِ هْرْ مْبَنشِ رَبِرَ. شِ سَشَن بُن مَ ﭑ تَن عَ رَكٍلِمَ.» 20 يُوِقِ كُنتِفِيٍ نَشَ عَ قَلَ، «يِ هْرْ مْبَنشِ نَشَن تِشِ حّ تٌنفٌ نَانِ نُن سٍننِ بُن مَ، عِ تَن نَ رَكٍلِمَ نّ شِ سَشَن بُن مَ؟» 21 كْنْ عِسَ تٌ هْرْ مْبَنشِ شَ قٍ قَلَ، تَالِ وْيّنيِ نَن نُ عَ رَ. عَ نُ عَ قَتٍ نَن مَ قٍ قَلَقٍ. 22 عَ تٌ كٍلِ قَشّ مَ، عَ قْشِرَبِرّيٍ نَشَ رَتُ عَ شَ وْيّنيِ مَ. نَ كُي، عٍ نَشَ لَ كِتَابُي شُي رَ، عٍ نَشَ لَ عِسَ شُي رَ.

23 عِسَ تٌ نُ نَ دَرِ سَلَمُ، سَيَمَلٍكّ دَنفِ سَلِ وَشَتِ، مِشِ فبٍفبٍ نَشَ دَنشَنِيَ عَ مَ عٍ تٌ تْنشُمَ مَكَابَشِيٍ تٌ، عَ نُ نَشٍيٍ رَبَمَ. 24 كْنْ عِسَ مُ نُ لَمَ عٍ رَ، بَرِ مَ عَ نُ عَدَ مَدِ بِرِن كٌلٌن. 25 عَ هَيِ يٌ مُ نُ عَ مَ، مِشِ يٌ شَ عِبُنَدَ مَ شَ قٍ قَلَ عَ بّ، بَرِ مَ عَ تَن نُ عَدَ مَدِ بْحّ كٌلٌن.