1 عَلَتَلَ نَشَ عَننَبِ مُنسَ شِلِ عَ شَ هْرْ مْلِنفِرَ كُي، عَ عَ مَسٍن عَ بّ، 2 «عَ قَلَ عِسِرَيِلَكَيٍ بّ، نَشَن نَ وَ سّرّشّ بَقٍ ﭑ تَن عَلَتَلَ بّ، عَ شَ شُرُ سٍ لَنمَ شَ نَ مُ عَ رَ شُرُ سٍ شُنفبٍ بَ. 3 شَ عَ وَ مَ شُرُ سٍ شُنفبٍ نَن بَقٍ سّرّشّ فَن دَاشِ رَ، قٌ عَ شَ قِندِ تُورَ رَ لَنيُرُ مُ نَ نَشَن مَ. عَ شَ قَ نَ رَ ﭑ تَن عَلَتَلَ شَ هْرْ مْلِنفِرَ سٌدٍ دّ رَ، عَلَكٌ ﭑ شَ عَ تٌنفٌ. 4 سّرّشّبَ شَ عَ بّلّشّ سَ شُرُ سٍ شُن تَفِ، عَلَكٌ ﭑ تَن عَلَتَلَ شَ نَ سّرّشّ تٌنفٌ، عَ شَ قِندِ عَ شُنسَرٍ رَ عَ شَ يُنُبِ شَ قٍ رَ. 5 نَ تُورَ شَ قَشَ ﭑ تَن عَلَتَلَ يَ عِ. هَرُنَ شَ دِ سّرّشّدُبّيٍ شَ قَ نَ تُورَ وُلِ رَ، عٍ شَ عَ كَسَن سّرّشّبَدٍ سّيتِيٍ مَ، سّرّشّبَدٍ نَشَن نَ ﭑ مَ هْرْ مْلِنفِرَ سٌدٍ دّ رَ. 6 عٍ شَ تُورَ بُرَ، عٍ قَ عَ عِسّفّ. 7 هَرُنَ شَ دِ سّرّشّدُبّيٍ شَ يٍفٍ رَدْشْ، عٍ تّ رَدّشّ. 8 عٍ مَن شَ سّرّشّ سُبٍ، عَ شُنيِ، نُن عَ تُرٍ سَ تّ عِ سّرّشّبَدٍ. 9 عَ قُرِنفّ نُن عَ سَنيِيٍ شَ رَشَ. سّرّشّدُبّ شَ نَ بِرِن فَن سّرّشّبَدٍ. سّرّشّ فَن دَاشِ نَ عَ رَ نَشَن شِرِ رَقَن ﭑ تَن عَلَتَلَ مَ.»

10 «شَ مِشِ وَ مَ سّرّشّ فَن دَاشِ بَقٍ شُرُ سٍ لَنمَ رَ، عَ شَ قِندِ يّشّي كٌنتٌنيِ رَ، شَ نَ مُ عَ رَ سِكْتّ، لَنيُرُ مُ نَ نَشَن مَ. 11 سّرّشّبَ شَ نَ كْن نَشَبَ سّرّشّبَدٍ كْولَ مَبِرِ ﭑ تَن عَلَتَلَ يَ عِ. هَرُنَ شَ دِ سّرّشّدُبّيٍ شَ عَ وُلِ تٌنفٌ، عٍ شَ عَ كَسَن سّرّشّبَدٍ سّيتِيٍ مَ. 12 عٍ نَ فّ سُبٍ عِشَبَدٍ، سّرّشّدُبّ شَ عَ سُبٍ، عَ شُنيِ، نُن عَ تُرٍ سَ تّ سّرّشّبَدٍ قَرِ. 13 سّرّشّبَ شَ سّرّشّ قُرِنفّ نُن عَ سَنيِيٍ رَشَ. سّرّشّدُبّ شَ نَ بِرِن فَن سّرّشّبَدٍ. سّرّشّ فَن دَاشِ نَ عَ رَ نَشَن شِرِ رَقَن ﭑ تَن عَلَتَلَ مَ.»

14 «شَ عَ وَ مَ شْنِ بَقٍ سّرّشّ فَن دَاشِ رَ ﭑ تَن عَلَتَلَ بّ، قٌ عَ شَ قِندِ كٌلٌكٌندٍ نَن نَ، شَ نَ مُ عَ رَ فَنبّ يْرّ رَ. 15 سّرّشّدُبّ شَ قَ عَ رَ سّرّشّبَدٍ، عَ عَ شُنيِ بٌلٌن عَ دّ عِ، عَ عَ سَ تّ، عَ عَ فَن. عَ وُلِ شَ عِقِلِ سّرّشّبَدٍ سّيتِيٍ مَ. 16 عَ شَ عَ فّمّ بْوتْ بَ، عَ عَ وْلّ تّ عِ شُبٍ شُن، سّرّشّبَدٍ سٌفٍتٍدٍ مَبِرِ رَ. 17 سّرّشّدُبّ شَ عَ سُشُ عَ فَبُتٍنيِيٍ مَ، عَ عَ عِبْو. عَ شَ عَ فَن، عَ قِندِ سّرّشّ فَن دَاشِ رَ، نَشَن شِرِ رَقَن ﭑ تَن عَلَتَلَ مَ.»