1 «وٌ وٌ يَ تِ، ﭑ قَمَ نّ ﭑ مَ شّيرَ شّيدٍ نَشَن كِرَ يَءِلَنمَ ﭑ بّ. وٌ مَرِفِ، وٌ نَشَن قٍنقٍ، عَ قَمَ نّ سٌدٍ عَ شَ هْرْ مْبَنشِ كُي كٍرٍن نَ. سَاتّ شّيرَ، وٌ وَ مَ نَشَن شْن، عَ نَ قَقٍ. مَنفّ عَلَتَلَ شَ مَسٍنيِ نَن نَ كِ.»

2 «عَ نَ قَ، ندٍ نْمَ سُو سَدٍ عَ رَ؟ ندٍ نْمَ تِدٍ عَ يَ عِ؟ بَرِ مَ عَ لُمَ نّ عَلْ شَبُرٍ تّ نَشَن سٍ رَشُنُمَ. عَ لُمَ نّ عَلْ شْسِ بَسٍ دُفِ شَيٍ نَشَن نَوَلِمَ. 3 عَ قَمَ نّ فبٍتِ رَشُنُدٍ، عَ عَ فبِ بَ. عَ لٍوِ شَ دِيٍ رَ سّنِيّنمَ نّ. عَ عٍ رَشُنُمَ نّ عَلْ شّيمَ عَ نُن فبٍتِ، عَ عٍ فبِ بَ. عٍ شَ قِندِ سّرّشّدُبّيٍ رَ عَلَتَلَ بّ نَشٍيٍ سّرّشّ بَمَ تِنشِنيِ كُي.»

4 «نَ تّمُي، يُدَيَ نُن دَرِ سَلَمُ شَ سّرّشّ رَقَنمَ نّ عَلَتَلَ مَ عَلْ تّمُي دَنفِشِ، عَلْ وَشَتِ قٌرِ. 5 ﭑ قَمَ نّ وٌ شَ كِيتِ سَدٍ. ﭑ كِيتِ سَمَ نّ كٍرٍن نَ مَندُرُلَيٍ، يّنّلَيٍ، وُلٍ قَلّيٍ، نُن مِشِ كٌبِيٍ مَ نَشٍيٍ وَلِكّ سَرٍ دٌنمَ، نَشٍيٍ كَاحّ فِنّيٍ، كِرِدِيٍ، نُن شْحّيٍ تْورْ مَ. ﭑ كِيتِ سَمَ نّ مِشِيٍ مَ نَشٍيٍ مُ فَاشُمَ ﭑ يَ رَ. مَنفّ عَلَتَلَ شَ مَسٍنيِ نَن نَ كِ.»

6 «ﭑ تٌ قِندِشِ عَلَتَلَ نَن نَ، نَشَن مُ عَ شُي مَسَرَ مَ، وٌ تَن يَشُبَ شَ دِيٍ تَن مُ قَشَ. 7 كَبِ وٌ بٍنبَيٍ شَ تّمُي، وٌ بَرَ ﭑ مَ سّرِيّ كَنَ، وٌ بَرَ عَ مَتَندِ. يَكْسِ، وٌ شَ فبِلٍن ﭑ مَ، ﭑ قَن فبِلٍنمَ نّ وٌ يِرٍ. مَنفّ عَلَتَلَ شَ مَسٍنيِ نَن نَ كِ.»

«كْنْ وٌ نَ ﭑ مَشْرِنقٍ، ‹مُشُ شَ فبِلٍن عِ مَ دِ؟› 8 ﭑ قَن شَ وٌ مَشْرِن. عَدَ مَدِ نْمَ عَ مَرِفِ عَلَ مُحَدٍ؟ كْنْ وٌ تَن يَتِ بَرَ ﭑ مُحَ. وٌ نُ قَ ﭑ مَشْرِن، ‹مُشُ بَرَ مُنسٍ مُحَ عِ مَ؟› ﭑ شَ وٌ يَابِ. وٌ بَرَ ﭑ مَ قَرِلّيٍ نُن ﭑ مَ سّرّشّيٍ مُحَ. 9 ﭑ بَرَ وٌ بْنسْي بِرِن دَنكَ نَ مُحّ شَ قٍ رَ. 10 وٌ شَ قَ قَرِلّ بِرِن نَ عَلَ شَ بَنشِ، قَرِلّ رَفَتَدٍ، عَلَكٌ بَلٌي شَ لُ ﭑ مَ بَنشِ كُي. وٌ شَ ﭑ تَن مَنفّ عَلَتَلَ مَتٌ، شَ ﭑ مُ قَمَ بَرَكّ فبٍفبٍ رَفٌرٌدٍ وٌ مَ كٍلِقٍ كٌورٍ نَشَن دَنفِ وٌ شَ سٍ رَفَتَدٍيٍ رَ. 11 ﭑ نِمَسٍيٍ قَشَمَ نّ نَشٍيٍ وٌ شَ شّيٍ نُن وٌ شَ وّنِ بِلِيٍ كَنَمَ. مَنفّ عَلَتَلَ شَ مَسٍنيِ نَن نَ كِ. 12 نَ تّمُي سِ بِرِن قَمَ نّ وٌ شَ بْشِ شِلِ قَلَدٍ حّلّشِن بْشِ، بَرِ مَ بَرَكّ نَ وٌ شْنيِ. مَنفّ عَلَتَلَ شَ مَسٍنيِ نَن نَ كِ.»

13 عَلَتَلَ نَشّ، «وٌ بَرَ وْيّنيِ شْرْشْي قَلَ ﭑ بّ، كْنْ وٌ ﭑ مَشْرِنقٍ، ‹مُشُ بَرَ وْيّنيِ شْرْشْي مُندُن قَلَ عِ بّ؟› 14 ﭑ شَ وٌ يَابِ. وٌ نَشّ، ‹فٍينِ يٌ مُ نَ عَلَ شَ بَتُي كُي. مُشُ بَرَ عَ شَ سّرِيّ سُشُ، مُشُ بَرَ تْورْ عَ شَ قٍ رَ، كْنْ مُشُ فٍينِ مُندُن سْتْشِ مَنفّ عَلَتَلَ رَ؟ 15 مُشُ تَن بّ، مِشِ نَشَن عَ يّتّ عِتٍمَ، عَ حّلّشِنمَ نّ، مِشِ كٌبِ نَن فٍينِمَ، عَلَ مَتَندِلَ مُ حَشَنكَتَمَ.›»

16 نَ وْيّنيِ شَنبِ، مِشِ نَشَن نُ فَاشُمَ عَلَ يَ رَ، عٍ بَرَ لُ يِرٍ كٍرٍن، عٍ وْيّن عٍ بٌورٍ رَ. عَلَتَلَ بَرَ عٍ شُي مّ عَ قَنيِ رَ. نَ عَلَ يَرَفَاشُييٍ شِلِ بَرَ سّبّ سّبّلِ ندٍ رَ عَلَ يَ عِ، بَرِ مَ عٍ نُ بَرَ عَلَتَلَ شِلِ بِنيَ. 17 مَنفّ عَلَتَلَ نَشّ، «نٍيٍ قِندِشِ ﭑ مَ حَمَ يَتِ يَتِ نَن نَ. ﭑ عٍ رَتَنفَمَ نّ كِيتِ سَ لْشْي عَلْ بَبَ نَشَن كِنِكِنِمَ عَ شَ دِ قَنيِ مَ. 18 نَ كُي وٌ مَن قَمَ نّ مِشِ كٌبِ نُن مِشِ قَنيِ تَفِ رَ سَ كٌلٌندٍ، عَلَ بَتُلَيٍ نُن عَلَ مَتَندِلَيٍ.»

19 «نَ لْشْي قَمَ نّ. عَلَ قَمَ نّ تّ بٍلٍبٍلٍ رَ يّتّ عِفبٌي نُن مِشِ كٌبِيٍ بّ. عَ عٍ فَنمَ نّ عَلْ سّشّ. مَنفّ عَلَتَلَ شَ مَسٍنيِ نَن نَ كِ. عٍ شَ قٍ سٍسٍ مُ لُمَ نَا. 20 كْنْ وٌ تَن نَشٍيٍ فَاشُمَ ﭑ شِلِ يَ رَ، ﭑ يَلَنيِ رَقَمَ وٌ مَ عَلْ سٌفٍ يَلَنيِ نَشَن نَمِنِمَ فّيسّفّ. وٌ بِرَ مَ نّ عَلَ قْشْ رَ حّلّشِنيِ كُي عَلْ نِنفٍ يْرّ نَشَن بِرَ مَ حٌوفٍ نّينّ قْشْ رَ. 21 وٌ مِشِ حَاشُييٍ مَبٌرٌنمَ نّ عَلْ شُبٍ نَشَن لُمَ وٌ سَنيِ بُن مَ. ﭑ نَ نَ لْشْي رَقَلَقٍ وٌ بّ. مَنفّ عَلَتَلَ شَ مَسٍنيِ نَن نَ كِ.»

22 «وٌ شَ رَتُ ﭑ مَ كٌنيِ مُنسَ شَ سّرِيّ مَ، ﭑ يَامَرِيٍ نَشٍيٍ قِشِ عَ مَ شٌرٍبٍ فٍيَ قَرِ عِسِرَيِلَكَيٍ بِرِن بّ. 23 ﭑ قَمَ نّ عَننَبِ عٍلِيَ شّيدٍ وٌ مَ، بٍينُ عَلَتَلَ شَ لْشْي بٍلٍبٍلٍ مَفَاشُشِ شَ قَ. 24 عَ بَبَيٍ نُن عٍ شَ دِيٍ دّ رَقَنمَ نّ، شَ نَ مُ عَ رَ، ﭑ قَ وٌ شَ بْشِ هَلَكِدٍ.»