1 سّنبّمَ ندٍ نُ نَ عِسِرَيِلَ بْشِ مَ، نَشَن شِلِ بٌو سُ. عَ قَتَن عٍلِمٍلٍكِ شَبِلّ نَن نَ. 2 رُتِ مٌوَبَكَ نَشَ عَ قَلَ نٌوٍ مِ بّ، «ﭑ وَ مَ سِفَقٍ شّ مَ قُندٍن مَنِيّ دْنشْييٍ مَتٌنفٌدٍ. تّمُندٍ ﭑ شّ كَنيِ ندٍ تٌمَ نَشَن هِننّمَ ﭑ نَ.» نٌوٍ مِ نَشّ، «عَوَ ﭑ مَ مَمَدِ، عِ ﭑ لِمَ بٍ.»

3 رُتِ نَشَ سِفَ قُندٍن مَنِيّ دْنشْييٍ مَتٌنفٌدٍ شّ وَلِكّيٍ شَنبِ رَ. عَلَتَلَ نَشَ عَ رَفِرِ، عَ شَ عَ شُن تِ بٌو سُ، عٍلِمٍلٍكِ شَبِلّ مِشِ ندٍ شَ شّ رَ. 4 نَ وَشَتِ بٌو سُ نُ بَشِ سٌدٍ كٍلِ بّتّلّيمُ. عَ نَشَ عَ شَ وَلِكّيٍ شّيبُ، «وٌ نُ وَلِ، عَلَتَلَ شَ وٌ رَتَنفَ.» عٍ نَشَ عَ رَتِن، «عَمِنَ، عَلَتَلَ شَ بَرَكّ قِ عِ قَن مَ.» 5 بٌو سُ نَشَ مَشْرِنيِ تِ وَلِكّيٍ شُنيِ مَ، «ندٍ نَ نَ سُنفبُتُنيِ رَ؟» 6 عَ نَشَ عَ يَابِ، «نَ سُنفبُتُنيِ مٌوَبَكَ نَ عَ رَ، نَشَن قَ نٌوٍ مِ مَتِدٍ كٍلِ مٌوَبَ بْشِ مَ. 7 عَ مَيَندِ نَن تِ عَ شَ قُندٍن مَنِيّ دْنشْييٍ مَتٌنفٌ وَلِكّيٍ شَنبِ رَ. كَقِ عَ قَ فّيسّفّ، هَن يَكْسِ عَ نَ وَلِقٍ، قٌ عَ تٌ عَ مَلَبُقٍ يِ كِ بَفٍ بُن مَ.»

8 نَ تّمُي بٌو سُ نَشَ عَ قَلَ رُتِ بّ، «ﭑ مَ دِ، عِ تُلِ مَتِ. عِ شَ لُ بٍ ﭑ مَ وَلِكّ فِنّيٍ شَنبِ رَ. هَلِ عِ مُ سِفَ شّ فبّتّ مَ قُندٍن مَنِيّ دْنشْييٍ مَتٌنفٌدٍ. 9 عٍ نَ سِفَ شّ نَشَن مَ، عِ قَن شَ بِرَ عٍ قْشْ رَ. ﭑ بَرَ حُنفُي لُ ﭑ مَ شّمّيٍ مَ، عٍ نَشَ عِ تْورْ. شَ يٍ شْلِ عِ سُشُ، عِ شَ سِفَ يٍ مِندٍ، وَلِكّيٍ شَ يٍ نَشَن سَشِ قّحّ كُي.»

10 رُتِ نَشَ عَ عِفٌرٌ بْشِ مَ حّلّشِنيِ سَابُي رَ، عَ قَ عَ قَلَ، «ﭑ تَن، بٍكَ مُ ﭑ نَ، كْنْ عِ بَرَ هِننّ ﭑ نَ. عِ هِننّشِ ﭑ نَ مُنقٍ رَ؟» 11 بٌو سُ نَشَ عَ يَابِ، «مِشِيٍ بَرَ عَ قَلَ ﭑ بّ، عِ نَشَن نَبَشِ عِ مَمَ بّ كَقِ عِ شَ مْرِ نَشَ قَشَ. عٍ نَشّ، عِ بَرَ عِ بَبَ يٌ، عِ نفَ يٌ، نُن عِ بَرِدٍ، عِ بَرَ عَ بِرِن بّحِن، عِ قَ سِفَ مِشِيٍ شْنيِ عِ مُ دّننَشّ كٌلٌن. 12 عَلَ شَ عِ بَرَايِ. عِسِرَيِلَ مَرِفِ عَلَ شَ عِ سَرٍ رَكَمَلِ، عِ شَشِلِ تِشِ مَرِفِ نَشَن نَ.» 13 رُتِ نَشَ عَ قَلَ بٌو سُ بّ، «ﭑ مَ مَنفّ، عِ بَرَ هِننّ ﭑ نَ، عِ بَرَ ندٍ بَ ﭑ مَ تْورّ رَ. عِ شَ وْيّنيِ بَرَ سٌ ﭑ تَن عِ شَ كٌنيِ بْحّ كُي، نَ بِنيّ فبٌ ﭑ تَن بّ.»

14 عٍ دّفٍ وَشَتِ بٌو سُ نَشَ عَ قَلَ رُتِ بّ، «قَ بٍ، عِ شَ تَامِ نُن بْرّ ندٍ دٌن.» رُتِ نَشَ دْشْ وَلِكّيٍ قّ مَ. بٌو سُ نَشَ قُندٍن مَنِيّ فِلِنشِ ندٍ سٌ عَ يِ رَ. عَ نَشَ نَ دٌن هَن عَ لُفَ، عَ قَ عَ دْنشْي رَفَتَ. 15 عَ مَن تٌ سِفَ قُندٍن مَنِيّ مَتٌنفٌدٍ، بٌو سُ نَشَ يَامَرِ قِ عَ شَ وَلِكّيٍ مَ. عَ نَشّ، «هَلِ عَ سٌ عَ شَبَتَرٍ قَن شْورَ، وٌ نَشَ سْنشْ عَ مَ. 16 وٌ نَ قُندٍن مَنِيّ رَشِرِ، وٌ شَ ندٍ لُ نَا، عَ شَ نَ قَن مَتٌنفٌ. هَلِ وٌ مُ سٍسٍ قَلَ عَ بّ.»

17 رُتِ نَشَ وَلِ هَن نُنمَرٍ. عَ تٌ فّ وَلِدٍ، عَ نَشَ قُندٍن مَنِيّ بْنبْ، عَ كٌنبٌ يَ قِرِن نَن سْتْ. 18 رُتِ تٌ سٌ نَ بِرِن نَ تَا كُي، عَ نَشَ عَ مَسٍن نٌوٍ مِ بّ. عَ دٌنسٍ نَشَن دٌن بٌو سُ يِرٍ، عَ نَشَ نَ دْنشْي قَن سٌ نٌوٍ مِ يِ رَ. 19 نٌوٍ مِ نَشَ رُتِ مَشْرِن، «عِ وَلِشِ شّ مُندُن مَ تٌ؟ عِ يِ قُندٍن مَنِيّ مَتٌنفٌشِ مِندٍن؟ عَلَ شَ نَ مِشِ بَرَايِ نَشَن هِننّشِ عِ رَ.» رُتِ نَشَ عَ بِرِن يَ مَشَرَن عَ مَمَ بّ. عَ مَن نَشَ عَ قَلَ، «مِشِ نَشَن ﭑ مَلِشِ، عَ شِلِ نّ بٌو سُ.» 20 نٌوٍ مِ نَشَ عَ قَلَ عَ شَ دِ شَ فِنّ بّ، «عَلَ شَ عَ بَرَايِ، عَلَ نَشَن مُ عَ شَ سَاتّ قَنيِ كَنَمَ، عَ قَ هِننّ عَ شَ مِشِيٍ رَ نَشٍيٍ نَ دُنِحَ عَ نُن نَشٍيٍ نَ عَلِفِيَمَ. يِ شّمّ لَنشِ وٌن شَبِلّ مِشِ ندٍ نَن مَ. وٌن شَبِلّ رَتَنفَمَ نَن عَ رَ.»

21 رُتِ مٌوَبَكَ نَشَ عَ يَابِ، «نَ شّمّ نَشّ، عَ ﭑ شَ وَكِلِ عَ شَ وَلِكّيٍ قْشْ رَ هَن قُندٍن مَنِيّ شَبّ شَ بَ عَ رَ.» 22 نٌوٍ مِ نَشَ عَ قَلَ عَ شَ دِ شَ فِنّ بّ، «ﭑ مَ دِ، عَ لَنمَ عِ شَ بِرَ عَ شَ وَلِكّ فِنّيٍ قْشْ رَ، عَلَكٌ مِشِ يٌ نَشَ عِ تْورْ شّ فبّتّيٍ مَ.»

23 نَ كُي رُتِ نَشَ لُ بٌو سُ شَ وَلِكّ فِنّيٍ قْشْ رَ هَن قُندٍن مَنِيّ نُن مّنفِ مَنِيّ شَبّ نَشَ حْن. رُتِ سَبَتِ نٌوٍ مِ شْنيِ، نَ كِ نّ.