Bbaluwa yaakabili eghi Paulo aahandiikiiye
Batesolonika
Kwanjula
Paulo akahandiikila Baki̱li̱si̱taayo baa Tesolonika bbaluwa eni haanu̱ma ya meeli̱ ghakee abahandiikiiye yʼoku̱du̱bha. Mu bbaluwa eni aabeekambi̱i̱si̱ya kuukala banagu̱mi̱ye mu ku̱hi̱ki̱li̱ja kwabo, nankabha bantu mbababona-boni̱ya. Bantu bakaba mbaabaghambiiye bati Ki̱li̱si̱to akaba naamali̱ye kukuuka munsi muni, bati kedha akukuuka bwangu, nahabweki tabakwetaaghisibuwa kuukala mbanakola milimo.
Paulo aabahabula kutategheeleli̱ya bantu ngʼaba. Aabasoboolola ati Baki̱li̱si̱taayo tababhonganuuwe kuba baghala. Aabaghambila ati Ki̱li̱si̱to atakaku̱u̱ki̱ye, haaku̱du̱bha haabʼo bubhi bwamaani̱ bweyongele munsi muni, kandi muntu mubhi oghu akudimaaga bantu kuleka mbahwelekeelela.
1
Paulo neekambi̱i̱si̱ya bahi̱ki̱li̱ja
1 Si̱ye Paulo na Silaasi hamui na Ti̱mi̱seewa twahandiikila enu̱we ki̱bbu̱la kya bahi̱ki̱li̱ja bʼomu tau̱ni̱ ya Tesolonika, bantu baa Luhanga Eseetu̱we na Mukama Yesu Ki̱li̱si̱to. 2 Luhanga Eseetu̱we na Mukama Yesu Ki̱li̱si̱to babaghilile ngughuma kandi babahe mpempa yonkaha.
3 Tubhonganuuwe kandi tu̱hi̱ki̱i̱ye ku̱si̱i̱magha Luhanga haabwanu bwile bwona, nanga ku̱hi̱ki̱li̱ja kwanu niibuwo kweyongela kandi niibuwo mweyongela kukundangana. 4 Eki kikulekagha twehi̱ghu̱wa ntwesi̱i̱ma mu bi̱bbu̱la bya bahi̱ki̱li̱ja bya Luhanga, haabwanu kuukala munagu̱mi̱si̱li̱i̱je kubona-bona kwona na bijibu ebi mulimu kandi mu̱neesi̱ghi̱ye Yesu.
5 Ebi byoleki̱ye ngoku Luhanga ali na bwengani̱ja ku̱tu̱wamu ati mubhonganuuwe kuba mu bu̱lemi̱ buwe, obu mukwete kubona-bonela. 6 Luhanga ahi̱ki̱i̱ye kubona-boni̱ya abakwete kubona-boni̱ya enu̱we. 7 Obu Mukama Yesu aliboneka naalu̱gha mu eghulu, aliisa na mulilo hamui na baamalai̱ka be baamaani̱, enu̱we aba endindi bantu bakwete kubona-boni̱ya, Luhanga alibaha kuhuumula, hamui naatu dhee. 8 Yesu alifubila boona abatasi̱i̱mi̱ye Luhanga kuba Mukama wabo, kandi abakubhengagha Makulu Ghasemeeye ghaa Mukama waatu Yesu. 9 Alibaha kifubilo kya kubabhinga hambali ali mu bu̱toki̱ bwa ki̱ti̱i̱ni̱sa kiye kyamaani̱ kandi abahe kifubilo kya kuhwelekeelela bilo nʼebilo. 10 Ebi bilibʼo kilo eki alikuuka niikuwo bantu be bamu̱hu̱ti̱ye haabwa kubajuna, kandi niikuwo abaamu̱hi̱ki̱li̱i̱je boona badheedhuwe. Kandi naanu muli mu bantu aba, nanga mukasi̱i̱ma makulu ghʼebi twaboone, ebi twabaghambiiye.
11 Nahabweki, niikiyo kikulekagha tuukala ntubasabila tuti Luhanga aakalaghe aboone mubhonganuuwe kuba mu bantu be aba aabilikiiye, kandi tuti haabwa bu̱toki̱ buwe abagu̱bhi̱i̱si̱ye kukola bilungi byona ebi mubhonganuuwe kukola, ebi bantu bahi̱ki̱li̱i̱je Yesu babhonganuuwe kukola. 12 Tukusabagha tutiyo niikuwo bantu bahu̱ti̱ye Mukama Yesu haabwa ebi akwete kukola mu bwomi̱i̱li̱ bwanu, kandi niikuwo naye asi̱i̱me enu̱we bahi̱ki̱li̱ja be. Luhanga akukuukamu kusaba kwatu oku kwoleka ngoku eye hamui na Mukama Yesu Ki̱li̱si̱to bali na ngughuma.