Bbaluwa baahandiikiiye
Bahebbulaayo
Kwanjula
Oghu akahandiika bbaluwa eni taamanu̱u̱we, bhaatu kyeyoleki̱ye ngu ni Mu̱ki̱li̱si̱taayo mwebembeli̱. Naye dhee oghu akaba ali mwebembeli̱ mu bi̱bbu̱la bya bahi̱ki̱li̱ja bwile obu Paulo aabahandiikilagha maabbaluwa ghe. Bbaluwa eni bakaghihadiikila Bayu̱daaya abaabaagha mbaafooki̱ye Baki̱li̱si̱taayo bhaatu mboohebuwa kuleka ku̱hi̱ki̱li̱ja Yesu.
Bbaluwa eni eki̱li̱ye munu kwoleka bukulu bwa Yesu haabwa Baki̱li̱si̱taayo boona. Yooleki̱ye ngoku ali Mwana wa Luhanga, nahabweki asaai̱ye baamalai̱ka aba Bayu̱daaya bahi̱ki̱li̱jagha. Asaai̱ye balangi̱ bʼomu Ndaghaano Nkulu, kandi asaai̱ye nankabha Musa oghu akaleetela Bayu̱daaya bilaghilo bya Luhanga.
Oghu akahandiika kitabo kini, ooleki̱ye dhee ati Yesu asaai̱ye bahongi̱, nanga Yesu taabaagha mu̱si̱i̱si̱. Akahayo bwomi̱i̱li̱ buwe nga kihonguwa kisemeeye kandi kyakumaliilila haabwa bibhi bya bantu boona baa bwile bwona.
Haakumaliilila kwa bbaluwa eni, oghu akaghihandiika, ooleki̱ye ngoku baataata baa Bayu̱daaya, aba bahandi̱i̱ki̱yʼo mu Ndaghaano Nkulu, boona baaleki̱ye Luhanga aadheedhuwa haabwa kumwesigha. Nahabweki aasu̱ki̱i̱ye Baki̱li̱si̱taayo ati nabo dhee babhonganuuwe kuukala baneesi̱ghi̱ye Luhanga kandi bataabululuwa ebi Yesu aakoli̱ye kandi ebi eegheeseei̱ye.
1
Luhanga naabu̱gha kukwama mu Mwana wee
1 Hambele Luhanga aabu̱ghagha na baataata baatu mu bwile bukani̱ye kandi mu milingo ekani̱ye naakwamila mu balangi̱. 2 Bhaatu mu bilo bini byokumaliilila, niibuwo aabu̱gha naatu naakwamila mu Mwana wee Yesu, oghu aagweti̱ye bu̱li̱ kintu kyona, kandi oghu aakwamiiyemu kuhanga bintu byona. 3 Mwana wee oghu niiye akwolekagha kwonini ki̱ti̱i̱ni̱sa kya Luhanga kandi ngoku Luhanga ali. Niiye akulekagha bintu byona bibʼo haabwa maani̱ ghe. Haanu̱ma ya kutukolela mukolo ghwa ku̱tu̱semeli̱ya ewaa Luhanga kutuuyʼo bibhi byatu, aani̱i̱na mu eghulu aasitama haa luhande lwa mukono ghwabuliyo ghwa Luhanga wa ki̱ti̱i̱ni̱sa wʼomu eghulu. 4 Nahabweki aafooka wa bu̱toki̱ kusaali̱ya baamalai̱ka boona, nanga Luhanga akamuluka li̱i̱na elisaai̱ye mali̱i̱na ghaa baamalai̱ka aba.
Yesu asaai̱ye baamalai̱ka
5 Nanga taaliyo malai̱ka oghu Luhanga aaghi̱li̱ye ati;
“Nuuwe Mwana wanje,
ti̱ obwalo naafooki̱ye Sowaawe.”* 1:5 Jabbu̱li̱ 2:7
Kedha ati;
“Nkuba Ese wee,
kandi naye abe Mwana wanje.”* 1:5 2 Samwi̱li̱ 7:14; 1 Kyamu̱bu̱si̱nge 17:13
6 Ti̱ dhee obu Luhanga aatu̱mi̱ye munsi mwana wee wʼoku̱du̱bha, Luhanga aaghila ati,
“Oleke baamalai̱ka baa Luhanga boona balami̱ye mwana wee oghu.”* 1:6 Kyabilaghilo 32:43
7 Aabu̱ghʼo baamalai̱ka naaghila ati,
“Luhanga akufoolagha baamalai̱ka be kuba nga mpwegha,
kandi aafoola baheeleli̱ya be kuba nga mulilo.”* 1:7 Jabbu̱li̱ 104:4
8 Bhaatu aabu̱ghʼo Mwana wee oghu ati,
“Ai̱ Luhanga, ntebe yaawe ya bukama ni ya bilo nʼebilo,
kandi mwi̱gho ghwawe ghwa bukama ni ghwa bwengani̱ja.
9 Oku̱ndi̱ye bi̱hi̱ki̱ye kandi wooha bubhi;
nahabweki Luhanga, oghu ali Luhanga waawe,
aaku̱seesi̱yʼo magita ghaa kudheedhuwa kusaali̱ya baanakyawe.”* 1:9 Jabbu̱li̱ 45:6, 7
10 Luhanga aatodha aaghila ati,
“Nuuwe Mukama oghu ku̱lu̱gha mu ntandiko okahanga nsi,
kandi waahanga byona ebili mu eghulu.
11 Ti̱ byona bilihwelekeelela, bhaatu uwe ookalʼo,
byona bilibhiiya nga lughoye.
12 Olibikuna-ku̱na nga ki̱lu̱walo;
bilisuhuuka nga lughoye.
Bhaatu uwe oliikala ngoku okali,
kandi toolihuwʼo.”* 1:12 Jabbu̱li̱ 102:25-27
13 Buuye haliyo malai̱ka nʼomui oghu Luhanga aaghi̱li̱ye ati,
“Ositame haa luhande lwa mukono ghwabuliyo ghwanje
ku̱hi̱ki̱ya obu ndifoola ngi̱ghu̱ syawe
katebe kaa bighele byawe?”* 1:13 Jabbu̱li̱ 110:1
14 Ningila baamalai̱ka bo mbaheeleli̱ya kwonkaha kandi myoyo eghi Luhanga akutumagha kuloleelela aba akujuna.