19
Kusinda Luhanga mu eghulu
1 Haanu̱ma yʼebi, naaghu̱wa elaka lyamaani̱ li̱su̱si̱ye lya gbadha-gbadha ya bantu, bali mu eghulu mbalimba bati,
“Haleluuya! Kujuna, ki̱ti̱i̱ni̱sa na bu̱toki̱,
byona mbya Luhanga waatu.
2 Nanga niiye akuhaagha bantu bifubilo bi̱hi̱ki̱ye kandi byamajima.
Mukali̱ malaaya wamaani̱ munu oghu akabhi̱i̱ya nsi na bu̱syani̱ buwe aamu̱si̱ngi̱si̱i̱ye musango
kandi aamwoleki̱ye ki̱i̱ni̱gha kiye haabwa saghama ya baheeleli̱ya be aati̱ye.”
3 Baatodha baagolela kimui bati,
“Haleluuya! Mwi̱ka oghu̱ku̱lu̱gha mu kibugha eki ghulaakalagha ngucuuka bilo nʼebilo.”
4 Niibuwo bakulu abili na bbanaa hamui na bihanguwa bbinaa byomi̱i̱li̱ baateehi̱ye hansi, baatandika kulami̱ya Luhanga oghu asitami̱ye haa ntebe ya bukama, mbaghila bati, “Haleluuya! Aami̱i̱na.”
5 Elaka lyalu̱gha haa ntebe ya bukama ndighila liti,
“Musinde Luhanga waatu, enu̱we boona baheeleli̱ya be,
enu̱we bato na bakulu abamu̱hu̱ti̱i̱ye!”
Ki̱ghenu̱ kya Kyana kya Ntaama
6 Niibuwo naaghu̱u̱ye elaka lya gbadha-gbadha ya bantu, mbagolela kimui nga lya kiijulumba kyamaani̱, kandi lili nga lya nkuba yamaani̱ ndighila liti,
“Haleluuya! Mukama wa Bu̱toki̱ Bwona niiye alemi̱ye.
7 Oleke tusemeleluwe, tudheedhuwe kandi tuhe Luhanga ki̱ti̱i̱ni̱sa,
nanga ki̱ghenu̱ kya kuswela kya Kyana kya Ntaama kyahi̱ki̱ye,
kandi mugholi akuswela aamali̱ye kweteekani̱ja.
8 Baamu̱si̱i̱mi̱lani̱i̱ye ku̱lu̱wala lughoye lukubbyokelela,
lweli̱ye kandi lusemeeye.”
Nanga lughoye lukubbyokelela olu lukumani̱i̱si̱ya bikoluwa bi̱hi̱ki̱li̱i̱ye bya bantu baa Luhanga.
9 Niibuwo malai̱ka oghu angi̱li̱ye ati, “Ohandiike oti: Bali na mu̱gi̱sa aba balibilikila haa ki̱ghenu̱ kya kuswela kya Kyana kya Ntaama.” Aatodha angila ati, “Ebi ni bighambo bya Luhanga byamajima.”
10 Obu naaghu̱u̱ye eki, du̱mbi̱ naateeli̱ya malai̱ka oghu mu maghulu kumulami̱ya. Bhaatu angila ati, “Otakikola! Si̱ye ndi mu̱heeleli̱ya nga uwe, kandi nga baanakyawe abakwete buukai̱so bwa Yesu. Olami̱ye Luhanga enkaha.” Nanga buukai̱so bwa Yesu obu, niibuwo bukuhaagha balangi̱ byaku̱bu̱gha.
Nkai̱na njelu na oghu aghi̱ni̱i̱ni̱yʼo
11 Niibuwo naaboone eghulu li̱i̱ghu̱li̱ki̱ye, naabona nkai̱na njelu! Oghu akaba aghi̱ni̱i̱ni̱yʼo baamughilaghamu Mwesighibuwa kandi Wamajima, niiye aku̱twi̱lagha bantu musango mu majima kandi alwana bulemo mu bwengani̱ja. 12 Maaso ghe ghaabbeni̱yagha nga mulilo, kandi alu̱wete sipeewa sikani̱ye sya bukama mu mutuwe. Akaba ahandi̱i̱ku̱u̱wʼo li̱i̱na eli muntu nʼomui atamani̱ye kuuyʼo eye enkaha. 13 Akaba alu̱wete nkanji̱ eghi elu̱bi̱ki̱ye mu saghama, kandi li̱i̱na liye aaliiye Kighambo kya Luhanga. 14 Biigambi̱ bya baasilikale bʼomu eghulu baamukwama bani̱i̱ni̱ye nkai̱na sikani̱ye sinjelu, balu̱wete nkanji̱ sikubbyokelela, syeli̱ye dhiyo kandi sisemeeye. 15 Mu kanu̱wa ke haalu̱ghamu kihiyo kyoghiiye kya ku̱jombi̱ya mahanga, kandi alibalema na mwi̱gho ghwa kyoma.* 19:15 Jabbu̱li̱ 2:9 Alikpeetagila ngi̱ghu̱ siye mu ndeeba ya ki̱i̱ni̱gha kya Luhanga wa Bu̱toki̱ Bwona. 16 Haa nkanji̱ yee kandi haa luhande lwa kibelo kiye bakaba bahandi̱i̱ki̱yʼo li̱i̱na bati, Mukama wa bakama kandi Mu̱lemi̱ wa balemi̱.
17 Niibuwo naaboone malai̱ka aamiliiye haa musana haagu̱u̱li̱. Aabilikila nʼelaka lyamaani̱ noni̱ syomu mwanya syona esikuliyagha mi̱ku̱ ati, “Mwise, mwekumaani̱li̱ye hamui haabwa ki̱ghenu̱ eki Luhanga alimabakolela. 18 Mwise muliye mi̱ku̱ ya ngi̱ghu̱ sya Luhanga abaku̱ku̱wa: mi̱ku̱ ya bakama, bakulu baa baasilikale, bantu abaalwanagha na maani̱ ghaabo ghoona, nkai̱na syabo, na baasilikale abaalwanagha basi̱ni̱i̱ni̱yʼo, bantu boona, baabughabe na basyana, kandi bakulu na bato boona.”
19 Niibuwo naaboone kisolo eki na bakama boona baa munsi, hamui na baasilikale baabo mbeekumaani̱ya kulwani̱i̱si̱ya oghu akaba ani̱i̱ni̱ye haa nkai̱na njelu kandi na baasilikale be. 20 Bhaatu kisolo eki baakikwata hamui na mulangi̱ wa bisubha oghu aakolagha byakuswekani̱ya mu maaso ghaakiyo. Byakuswekani̱ya ebi byahabi̱i̱si̱yagha aba baataayʼo kabonelo kaa kisolo eki na abaalami̱i̱ye kisasani̱ kyakiyo. Kisolo eki na mulangi̱ wa bisubha, bombi baabakuba banaakaaye mu nanja ya mulilo ghwamaani̱. 21 Abaati̱ghaayʼo baabaata na kihiyo ekyalu̱ghagha mu kanu̱wa kaa oghu akaba asitami̱ye haa nkai̱na. Noni̱ syaliya mi̱ku̱ yabo, syona syakutila kimui.