Bbaluwa eghi Paulo aahandiikiiye
Ti̱to
Kwanjula
Ti̱to akaba ali musaasa Mu̱gi̱li̱ki̱ oghu akafooka Mu̱ki̱li̱si̱taayo. Aakoonela Paulo mu ngendo siye sikani̱ye kutebeja Makulu Ghasemeeye ghaa Yesu Ki̱li̱si̱to. Haanu̱ma Paulo aamutuma kuhikila bi̱bbu̱la bya Bahi̱ki̱li̱ja mu kyalo kya Ku̱leete.
Mu bbaluwa eni Paulo alaghikiliiye Ti̱to kukoma bantu baa ngeso sisemeeye kuba beebembeli̱ baa bi̱bbu̱la bya bahi̱ki̱li̱ja. Atodhi̱ye aamuhabula ngoku akwegheesi̱ya gu̱lu̱u̱pu̱ sya mbaghani̱ja mu ki̱bbu̱la kya bahi̱ki̱li̱ja, basaasa bakulu, bakali̱ bakulu, batabhana, na basyana. Haakumaliilila, aasu̱ki̱ya Ti̱to ngoku Baki̱li̱si̱taayo boona babhonganuuwe kuukala bali mu mpempa kandi bali mu bu̱u̱bhootu̱. Aamughila ati babhonganuuwe kuba na kwelinda, kutoohana, kutaba na mpaka, kandi kuteebaghani̱jamu.
1
Paulo naahandiikila Ti̱to
1 Ni̱i̱si̱ye Paulo mu̱heeleli̱ya wa Luhanga kandi mukwenda wa Yesu Ki̱li̱si̱to. Nkatumibuwa kulangilila aba Luhanga aakomi̱yemu, mulingo ghwa ku̱hi̱ki̱li̱ja kandi kumanya majima ghaa kuukala ngoku Luhanga abbali̱ye. 2 Kandi bamanile kimui ngoku bakutunga bwomi̱i̱li̱ butahuwʼo, obu Luhanga hambele atakahangi̱ye nsi aalaghi̱i̱sani̱i̱ye kuha abaku̱hi̱ki̱li̱ja Yesu. Kandi bakubutunga nanga Luhanga oghu taakuhaagha bisubha. 3 Nahabweki, obu bwile bwonini bwahi̱ki̱ye, Luhanga Mu̱ju̱ni̱ waatu aahaayo butumuwa buwe obu kandi andaghila kulangilila ebi aabu̱ghi̱ye.
4 Naahandiikila uwe Ti̱to, mwana wanje haabwa ku̱hi̱ki̱li̱ja oku etu̱we bombi tuli nakuwo.
Luhanga Eseetu̱we na Ki̱li̱si̱to Yesu Mu̱ju̱ni̱ waatu, bakughilile ngughuma kandi bakuhe mpempa yonkaha.
Ababhonganuuwe kuba beebembeli̱
5 Obu naali ndi naawe e Ku̱leete eghi, nkakughila nti oti̱ghaleyo niikuwo oteekani̱ye kusemeeye ebyali binati̱ghaalilaane, okome beebembeli̱ baa bi̱bbu̱la bya bahi̱ki̱li̱ja mu tau̱ni̱ syona sya mu kyalo kya Ku̱leete. Oosuke ngoku naakulaghiiye nti, 6 abhonganuuwe abe atali na ngeso sibhi, oghu ali na mukali̱ omui, oghu baana be bahi̱ki̱li̱i̱je, kandi bateesaaghi̱ye. 7 Mu̱loleeleli̱ haabwa kuba na bujunaani̱ji̱buwa bwa mulimo ghwa Luhanga, akulaghiluwa kuba oghu atali nʼeki bakumusoghosa. Ataba wa myepanko kedha wa ki̱i̱ni̱gha kya bwangu-bwangu kedha mutami̱i̱li̱, kedha mulwana-lwani̱, kedha wa mululu. 8 Bhaatu abe mwenge, abbali̱ye kukola bisemeeye, eeli̱ndi̱ye, ahi̱ki̱li̱i̱ye, alukwela, kandi wa ngeso sisemeeye. 9 Akulaghiluwa abe ali oghu ahi̱ki̱li̱i̱je kighambo kyamajima eki baamwegheeseei̱ye, niikuwo agubhe kwegheesi̱ya banji njegheesi̱ya esemeeye kandi asi̱ngu̱le abakumuhakani̱ya.
10 Haliyo bantu bakani̱ye ntaaghu̱wa, abaku̱ndi̱ye ebitali na mughaso, ngobi̱ya, kukila munu abaalu̱ghi̱ye mu di̱i̱ni̱ ya Ki̱yu̱daaya, abakughilagha bati bantu basaluwe. 11 Bantu ngʼaba obhonganuuwe kubatanga, nanga haabwa mululu ghwa sente bakuhabi̱i̱si̱yagha maka ghoona, mbeegheesi̱ya ebitabhonganuuwe. 12 Kandi muntu omui mu bantu baa Ku̱leete, mulangi̱ wabo, akaghila ati, “Bantu baa Ku̱leete, mbahi̱ baa bisubha, bali nga bisolo bibhi, mbaghala ababbali̱ye kuliya kwonkaha.” 13 Ebi aababu̱ghi̱yʼo ebi ni majima. Nahabweki obatanukile kimui, niikuwo bagumile haa ku̱hi̱ki̱li̱ja kwonini. 14 Baleke ku̱tegheeleli̱ya njegheesi̱ya yʼomu bighano bya Ki̱yu̱daaya kedha ku̱hu̱ti̱ya bilaghilo bya abakuhakani̱ya majima. 15 Hali abasemeeye, bintu byona bisemeeye, bhaatu hali ababhi̱i̱hi̱ye nʼabatali bahi̱ki̱li̱ja, taaliyo ekisemeeye; nanga mitima yabo na byeli̱li̱kano byabo bikamala kubhiiya. 16 Bakughilagha bati bamani̱ye Luhanga, kusa ebi bakukola byoleka ngoku bamwehighaane. Mbaghuwa-ghuwa, bajeemeeye Luhanga, kandi tabakugubha kukola kintu kisemeeye kyona.