15
स्य्हान्दोदा ह्रो लउ
1 य्हाङ विश्वासरी कोङ्बा मुबागदेसे विश्वासरी कमजोर मुबागदेदा ह्रो लतोःला। ओच्छे य्हाङसे ह्राङदा ज्यबा तबा गे जे आहिन, तर स्य्हान्दोदाएनोन वास्ता लतोःला। 2 य्हाङ जम्मासेन ख्रीष्टदा विश्वास लबागदेदा ज्यबा तगै, ओच्छे थेनीगदे विश्वासरी कोङ्बा तगै भिसी य्हाङसे थेनीगदेदा वास्ता लतोःला। 3 तिग्दा भिसम ख्रीष्टसेनोन ह्राङदा ज्यबा तबा गे जे आलनी। परमेश्वरला बचनरीनोन “ह्राङदा हेला लबागदेसे ङादाएनोन हेला लबा मुला” भिसी भ्रिबा मुला।* भजन ६९:९ 4 तिग्दा भिसम बचनरी भ्रिबा जम्मान तामगदे य्हाङदा लोप्बाला लागिरी भ्रिबा मुबा, चु बचनग्यामसेन य्हाङसे लबा आश याङ्बाला लागिरी जस्तोन दुख तसैनोन नाबारी आँट याङ्ला।
5 दुख नाखम्बा शक्तिदेन आँट पिन्बा परमेश्वरसेन एनीगदेदा ख्रीष्ट येशू ह्रङ्बान दोसी भ्रबारीदेन ह्राङ ह्राङ न्हङरी ढिक्सी चिखम्बा सेम पिन्गै। 6 ओच्छे एनीगदे जम्मान ढिक्सी सुङ गिक तसी य्हाङला प्रभु येशू ख्रीष्टला आबा परमेश्वरला जयजयकार लबारी खम्गै।
अर्गु य्हुलला म्हिगदेला लागिरी थार्बा पिन्बा समाचार
7 थेतबासेलमा ख्रीष्टसे एनीगदेदा माया लबा ह्रङ् लसी परमेश्वरदा मान लबारी एनीगदेसे ह्राङ ह्राङ न्हङरी गिकसेम गिकदा मान लउ। 8 एनीगदेसे ङाला ताम ङ्यान्गो, येशू ख्रीष्टसे लबा गेसे परमेश्वर विश्वास लखम्बा परमेश्वर हिन्ना भिसी यहूदीगदेदा उन्बारी हिन्ना। ओच्छे येशू ख्रीष्टसे य्हाङला आखे म्हेमेदेन छ्याम लबा कबुल पूरा लजी। 9 थेह्रङ् लसीन अर्गु य्हुलला म्हिगदेसे परमेश्वरसे लबा दयाला लागिरी परमेश्वरला जयजयकार लगै भिसीएनोन येशू ख्रीष्टसे चु गे लबा हिन्ना। बचनरीनोन चुह्रङ् भिसी भ्रिबा मुबा,
“थेतबासेलमा ङाइ अर्गु य्हुलला म्हिगदेला गुङरी ह्राङला जयजयकार लला,
ओच्छे ह्राङलान जयजयकार तबा व्हाइ गोला।”* २ शमू २२:५०; भजन १८:४९
10 दोःसी चुह्रङ् भिसीनोन भ्रिबा मुला,
“अर्गु य्हुलला म्हिगदे,
परमेश्वरला म्हिगदेदेन छ्याम ताङ्गो।”* व्यव ३२:४३
11 दोःसीनोन चुह्रङ् भिसीनोन भ्रिबा मुला
“अर्गु य्हुलला जम्मान म्हिगदे,
प्रभुलान जयजयकार लउ,
ओच्छे जम्मान म्हिगदेसे
प्रभुला जयजयकार लगै।”* भजन ११७:१
12 दोःसी यशैया अगमवक्तासेनोन चुह्रङ् भिसी पाङ्बा मुला,
“यिशैला† “यिशै” चा दाऊद ग्लेला आबा हिन्ना। वंशग्याम म्हि गिक फेप्खला,
थेसे अर्गु य्हुलला म्हिगदेथोरी शासन लला,
ओच्छे अर्गु य्हुलला म्हिगदेसेनोन
थेथोरी आश लला।”* यशै ११:१०
13 आश तना लबा परमेश्वरदा विश्वास लबासे लमा थेसेन शान्ति पिन्सी एनीगदेदा पूरान ताङ्ना लगै। थेह्रङ् लसम एनीगदेसे लबा आश परमेश्वरला आत्माला शक्तिग्याम ल्हेबान निला।
अर्गु य्हुलला म्हिगदेला लागिरी पावलसे लबा गे
14 ज्योज्यो आले नाना आङागदे, एनीगदे ल्हानान ज्यबा मुला, ओच्छे एनीगदेला जम्मान ज्ञान बुद्धिसे गिकसेम गिकदा लोप्बारी खम्मुला भिबा ताम ङादा था मुला। 15 तसैनोन परमेश्वरसे ङादा दयामाया लबासे लमा एनीगदेदा ढन्ना लबाला लागिरी ङाइ चु तामगदे भ्रिबारी आँट लबा मुला। 16 परमेश्वरसे दयामाया लसी ङादा अर्गु य्हुलला म्हिगदेला गुङरी गे लबाला लागिरी ख्रीष्ट येशूला मुल चेला स्होजी। ओच्छे अर्गु य्हुलला म्हिगदे परमेश्वरला आत्माग्याम चोखो तसी परमेश्वरदा सेम निबा भेटी दोगै भिसी ङाइ परमेश्वरला मन्दिररी पूजा लबा म्हि ह्रङ्बा दोसी थार्बा पिन्बा समाचार थेःना लजी।
17 थेतबासेलमा ख्रीष्ट येशूसे ङाग्याम परमेश्वरला लागिरी ङाइ लतोःबा गे लम्याङ्मा ङा ल्हानान ताङ्बा मुला। 18 ख्रीष्टदा विश्वास लबा अर्गु य्हुलला म्हिगदेदा परमेश्वरसे कुल्बा अन्छार भ्रबा म्हि स्होबारी ख्रीष्टसे ङाग्याम लबा तामदेन गेला बारेरी जे ङाइ पाङ्बारी भङ लला। 19 ङाइ परमेश्वरला आत्माला शक्तिग्याम उदेकला चिनुगदेदेन उदेकला गेगदे लजी। थेह्रङ् लसीन ङाइ यरूशलेमहेन्से इल्लुरिकन भिबा य्हुल्साधोनान ख्रीष्टला थार्बा पिन्बा समाचार पूरान थेःना लजी। 20 स्य्हान्दोसे थान्बा जगथोरी दिम स्होबा म्हिसे ह्रङ् लसी स्य्हान्दोसे थेःना लबा ग्लारी थेःना लबा ङाला सेम आरे। थेतबासेलमा ख्रीष्टला मिन आथेःबादेन खालैसेन थेःना आलबा ग्लारी जे थार्बा पिन्बा समाचार थेःना लबा ङादा सेम मुला। 21 बचनरीनोन चुह्रङ् लसीन भ्रिबा मुला,
“थेला बारेरी जुन म्हिदा खाइमै पाङ्बा आरे,
थेनीगदेसे थेदा म्राङ्ला।
ओच्छे थेला बारेरी जुन म्हिसे खाइमै थेःबा आरे
थेनीगदेसे परमेश्वरदा ङोसेला”* यशै ५२:१५
पावल रोमरी निइ म्हन्बा
22 थेतबासेलमान ङाइ चु ग्लागदेरी ख्रीष्टला समाचार थेःना लसी भ्रबासे लमा ङा ल्हानान रेम एनीगदे मुबा ग्लारी खबारी म्हाइसैनोन खबारी आखम्नी। 23 तर दाहेन्से चु ग्लारीक्यार ङाइ थार्बा पिन्बा समाचार थेःना लसी जिन्बा मुला। ल्हानान दिङहेन्से एनीगदेदेन छ्याम ह्रुप तबा सेम मुबासे लमा, 24 ङा स्पेन भिबा य्हुल्सारी निबा धुइरी एनीगदेदेन छ्याम चिसी तिगै धिनधोना संगती लबा सेम मुला। ओच्छे एनीगदेदेन छ्याम तिगै धिनधोना चिमाहेन्से ङा थेग्याम स्पेनरी निबा धुइरी एनीगदेसे ङादा ह्रो लला भिसी ङाइ म्हन्बा मुला। 25 तर दान्दे चा ङा परमेश्वरला म्हिगदेदा ह्रो लबारी यरूशलेम शहररी निबान मुला। 26 तिग्दा भिसम माकेडोनियादेन अखैया भिबा ग्लारी मुबा परमेश्वरला म्हिगदेसे ताङ्सी यरूशलेम शहररी मुबा परमेश्वरला म्हिगदे न्हङला प्राङबोगदेदा टाङगा पुइखबा मुला। 27 चु टाङगा पिन्बारी थेनीगदेदा ल्हानान सेम मुबा। तर थेनीगदेसे यहूदीगदेदा पिन्बा टाङगा चा थेनीगदेसे फातोःबा छे ह्रङ्बान हिन्ना। तिग्दा भिसम अर्गु य्हुलला म्हिगदेसे याङ्बा स्वर्गला मोलम यहूदीगदेग्यामसे याङ्बा हिन्ना। 28 थेतबासेलमा चु टाङगा ह्रुप्सी थेनीगदेदा भोर्सी पिन्माहेन्से एनीगदे मुबा ग्लारी खसी ङा स्पेनरी निला। 29 ओच्छे ङा एनीगदे मुबा ग्लारी खमा येशू ख्रीष्टसे पिन्बा मोलमगदेएनोन भसी खला।
30 ज्योज्यो आले नाना आङागदे, य्हाङला प्रभु येशू ख्रीष्टदेन परमेश्वरला आत्मासे पिन्बा मायाग्याम ङाला लागिरी ङादेन छ्यामनोन परमेश्वरदेन छ्याम प्रार्थना लसी पिन्गो भिबा ङाला बिन्ती मुला। 31 ख्रीष्टदा विश्वास आलबा यहूदिया अञ्चलरी मुबा म्हिगदेग्याम जोगब तबारी खम्गै भिसी ङाला लागिरी परमेश्वरदेन छ्याम प्रार्थना लसी पिन्गो। ओच्छे यरूशलेमरी मुबा परमेश्वरला म्हिगदेदाएनोन ङाइ ह्रुप्सी भबा टाङगा सेम निगै भिसीएनोन प्रार्थना लसी पिन्गो। 32 थेह्रङ् लसीन परमेश्वरला सेम मुसम ङा एनीगदे मुबा ग्लारी ताङ्सी ताङ्सी खला। ओच्छे ङा एनीगदेदेन छ्यामनोन चिसी ब्लप्बा न्हला। 33 शान्ति पिन्बा परमेश्वर एनीगदे जम्मानदेन छ्याम तगै। आमेन।