1 Xquiꞌya Xtyiꞌi ycuiꞌ Ndyosi nchca cuayáꞌ tiꞌ na ñiꞌya̱ caca tyempo nde loo la, chaꞌ ntsuꞌu ñati̱ nu cua ngusñi tyucui̱i̱ jiꞌi̱ Jesucristo nquichaꞌ, loꞌo liꞌ tyuꞌutsuꞌ nguꞌ biꞌ tyucui̱i̱ jiꞌi̱ ycuiꞌ nu Xuꞌna na. Xtyanu ñati̱ biꞌ jiꞌi̱ Ni liꞌ, chaꞌ cñiloꞌo cuiꞌi̱ cuxi nu nduꞌni cña cuentya jiꞌi̱ nu xñaꞌa̱ jiꞌi̱ nguꞌ; tyiji̱loo cuiꞌi̱ cuxi biꞌ jiꞌi̱ nguꞌ biꞌ liꞌ. 2 Ntsuꞌu nguꞌ nu nchcuiꞌ tucua lo chaꞌ, nu ngaꞌaa ntyujuꞌu tiꞌ chaꞌ ngusñi nguꞌ chaꞌ cuiñi nu nchcuiꞌ nu xñaꞌa̱; jiꞌi̱ nguꞌ cuiñi biꞌ cuna xi nguꞌ tyaꞌa na, tyuꞌutsuꞌ nguꞌ jiꞌi̱ tyucui̱i̱ tsoꞌo liꞌ. 3 Ncluꞌu nguꞌ cuiñi biꞌ chaꞌ ná tsoꞌo caja clyoꞌo na; ncluꞌu nguꞌ chaꞌ ntsuꞌu tsa na ndacu na nu ná tsoꞌo cacu na, nacui̱ nguꞌ biꞌ. Tlyu tsa chaꞌ cuiñi nu nda nguꞌ biꞌ. Pana ngüiñá ycuiꞌ Ndyosi lcaa na nu ndacu na chaꞌ tsoꞌo ti cacu na jiꞌi̱, lcaa tyaꞌa na nu ntsuꞌu chaꞌ jiꞌna loꞌo Jesucristo; biꞌ chaꞌ tya na xlyaꞌbe jiꞌi̱ ycuiꞌ Ndyosi loꞌo cua cacu ti na, chaꞌ jlo tiꞌ na chaꞌ tsoꞌo jiꞌi̱ ycuiꞌ Ni. 4 Tsoꞌo tsa cña nguaꞌni Ni, tsoꞌo ngüiñá Ni lcaa lo na; biꞌ chaꞌ ná tsoꞌo si xcua̱a̱ na sca chaꞌ tsoꞌo nu ngüiñá Ni. Xñi na lcaa chaꞌ tsoꞌo biꞌ, loꞌo liꞌ ndiꞌya̱ chcuiꞌ na loꞌo ycuiꞌ Ndyosi: “Tsaa xlyaꞌbe jinuꞌu̱, Ndyosi Sti ya”, ñacui̱ na. 5 Juaꞌa̱ chcuiꞌ na loꞌo ycuiꞌ Ndyosi chaꞌ nda Ni lcaa na nu tsoꞌo chaꞌ cacu na; culacua̱ Ni jiꞌi̱ lcaa na nu ndacu na liꞌ, chaꞌ chacuayáꞌ jiꞌi̱ ycuiꞌ Ndyosi ndacu na jiꞌi̱.

6 Culuꞌu nuꞌu̱ lcaa chaꞌ nu nscua naꞌ lo quityi re jiꞌi̱ ca taꞌa ñati̱ jiꞌi̱ Jesucristo cajua, chaꞌ caca nuꞌu̱ sca ñati̱ nu tsoꞌo tsa nduꞌni cña jiꞌi̱ Jesucristo, Timoteo. Tyiꞌu tsoꞌo tiꞌ nuꞌu̱ lcaa chaꞌ liñi nu cua ngusñi nuꞌu̱, chaꞌ jiꞌi̱ ycuiꞌ Ni; ñaꞌa̱ ti xñi tsoꞌo nuꞌu̱ tyucui̱i̱ jiꞌi̱ ycuiꞌ nu Xuꞌna na liꞌ, ñiꞌya̱ nu ndyuꞌni ti nuꞌu̱. 7 Ná taquiyaꞌ nuꞌu̱ jiꞌi̱ cuentyu nu ná nchcuiꞌ chaꞌ liñi jiꞌi̱ ycuiꞌ Ndyosi, chaꞌ cuxi tsa laca chaꞌ biꞌ. Pana nuꞌu̱ ni, ntsuꞌu chaꞌ quiꞌi̱ nuꞌu̱ chaꞌ cuaꞌni nuꞌu̱ xcuiꞌ cña nu ndiya tiꞌ ycuiꞌ Ndyosi. 8 Tsoꞌo xi chaꞌ nguiꞌi̱ quiyaꞌ na chaꞌ tyaꞌa̱ na, nguiꞌi̱ yaꞌ na chaꞌ cuaꞌni na cña; pana tsoꞌo la si quiꞌi̱ tyiquee na chaꞌ taquiyaꞌ na jiꞌi̱ ycuiꞌ Ndyosi lcaa tyempo. Tsoꞌo ti tyiꞌi̱ na nde chalyuu, nu loꞌo cuaꞌni na cua ñaꞌa̱ ca cña nu ntiꞌ nu Xuꞌna na chaꞌ cuaꞌni na; la cuiꞌ tsoꞌo ti tyiꞌi̱ na ca slo ycuiꞌ Ndyosi, si cuaꞌni na ñiꞌya̱ nu ntiꞌ Ni chaꞌ cuaꞌni na. 9 Chañi tsa chaꞌ nu nscua naꞌ nde, juaꞌa̱ ntsuꞌu chaꞌ xñi tsoꞌo na chaꞌ biꞌ. 10 Jlya tiꞌ na jiꞌi̱ ycuiꞌ Ndyosi nu luꞌú ca; biꞌ chaꞌ lye cuaꞌni na cña jiꞌi̱ Ni, masi lyaꞌ tsa tiꞌ nguꞌ jiꞌna. Loꞌo ycuiꞌ Ndyosi ni, cuaꞌni lyaá Ni jiꞌi̱ lcaa ñati̱ si taquiyaꞌ nguꞌ jiꞌi̱ Ni. Loꞌo xñi na chaꞌ jiꞌi̱ Ni, liꞌ ca cuayáꞌ tsoꞌo la tiꞌ na chaꞌ biꞌ.

11 Culo nuꞌu̱ cña nu nguscua naꞌ re jiꞌi̱ lcaa nguꞌ tyaꞌa ma̱, culuꞌu tsoꞌo nuꞌu̱ chaꞌ biꞌ jiꞌi̱ nguꞌ. 12 Ná ta nuꞌu̱ chacuayáꞌ xtyí loꞌo nguꞌ jinuꞌu̱ chaꞌ tya cuañiꞌ nuꞌu̱, ntiꞌ nguꞌ. Cuaꞌni nuꞌu̱ xcuiꞌ cña tsoꞌo chaꞌ ñaꞌa̱ lcaa tyaꞌa ñati̱ jiꞌi̱ Jesucristo; xcuiꞌ chaꞌ tsoꞌo chcuiꞌ nuꞌu̱, xcuiꞌ chaꞌ tsoꞌo cuaꞌni nuꞌu̱, loꞌo juaꞌa̱ tsoꞌo tsa tyuꞌu tyiquee nuꞌu̱ ñaꞌa̱ nuꞌu̱ jiꞌi̱ xaꞌ la ñati̱. Liꞌ ca cuayáꞌ tiꞌ nguꞌ chaꞌ tsoꞌo tsa ngusñi nuꞌu̱ chaꞌ jiꞌi̱ Jesucristo, xquiꞌya chaꞌ xcuiꞌ lubii ti cresiya jinuꞌu̱ ndyuꞌni nuꞌu̱ cña. 13 Laja loꞌo tya lyiji ti tyalaa naꞌ slo nuꞌu̱, ñaꞌa̱ ti tya chcuiꞌ nuꞌu̱ lcaa chaꞌ nu nscua lo quityi jiꞌi̱ ycuiꞌ Ndyosi loꞌo nguꞌ; tya chcuiꞌ la nuꞌu̱ ñiꞌya̱ laca chaꞌ liñi biꞌ, tya culuꞌu la nuꞌu̱ chaꞌ tsoꞌo biꞌ jiꞌi̱ nguꞌ tsa tlyu ti loꞌo tyuꞌu tiꞌi̱ nguꞌ. 14 Na cua nda ycuiꞌ Ndyosi tyucui chacuayáꞌ jiꞌi̱ Ni jinuꞌu̱ loꞌo ngusta yaꞌ nguꞌ cusuꞌ hique nuꞌu̱, chaꞌ cuaꞌni nuꞌu̱ cña cuentya jiꞌi̱ ycuiꞌ nu Xuꞌna na. Cua nchcuiꞌ nguꞌ cuentya jiꞌi̱ Xtyiꞌi ycuiꞌ Ndyosi chaꞌ cuaꞌni nuꞌu̱ cña biꞌ; biꞌ chaꞌ cuiꞌya tsoꞌo nuꞌu̱ cuentya jiꞌi̱ chaꞌ tsoꞌo nu cua nda ycuiꞌ Ndyosi jinuꞌu̱ tsa̱ biꞌ, chaꞌ talo nuꞌu̱ jiꞌi̱ cña nu ntsuꞌu jinuꞌu̱.

15 Loꞌo ycuiꞌ nuꞌu̱ ni, cuiꞌya tsoꞌo nuꞌu̱ cuentya jiꞌi̱ lcaa chaꞌ nu nguscua naꞌ nde; liꞌ ñaꞌa̱ nguꞌ chaꞌ cua ndyaca tsaꞌa̱ tsoꞌo nuꞌu̱ chaꞌ caca nuꞌu̱ loo jiꞌi̱ nguꞌ. 16 Talo nuꞌu̱ jiꞌi̱ cña biꞌ. Cuaꞌa nuꞌu̱ jiꞌi̱ ycuiꞌ ca chaꞌ xcuiꞌ chaꞌ tsoꞌo ti cuaꞌni nuꞌu̱. Tsoꞌo ti culuꞌu nuꞌu̱ jiꞌi̱ nguꞌ tyaꞌa na, chaꞌ juaꞌa̱ cuna tsoꞌo nguꞌ chaꞌ nu ncluꞌu nuꞌu̱ jiꞌi̱ nguꞌ, chaꞌ cuaꞌni lyaá ycuiꞌ Ndyosi jiꞌi̱ nguꞌ biꞌ liꞌ. Loꞌo juaꞌa̱ cuaꞌni lyaá Ni jinuꞌu̱ liꞌ.